Nikum November ni 13-a Bungthuam tlangval Zarzokima kaphlumtu ni ngeia hriat Tuikuk 6 chu Mizoram Special Investigation Team chuan an man ta a, midangte pawh zawn zui mek zel an ni.
Zarzokima thattute hi man turin Mizoram sorkar chuan Special Investigation Team (SIT) dinin, mi 6 an man tawh zinga an man hnuhnung pahnihte zinga pakhat Barsila (23) s/o Talmawi, Khakchang, Tripura chu Damchera leh Kanhmun inrina bulah man a ni a. Zirtawpni khan Tripura Police ten Dharmanagar (Tripura)-ah midang pakhat an man leh bawk.
Special Investigation Team hriat dan chuan Zarzokima thattute kha mi 8 an ni a, a meizang hlaptu ber (kingpin) chu Zirtawpni khan man ngei an inbeisei laiin, Kanchanpur (Tripura)-ah an man thelh hlauh nia hriat a ni. He pa hi SIT te hian an hrechiang thawkhat tawh a, man thuai theih beiseina a lian hle tih thudawnna chuan a sawi. Hemi bakah hian midang pakhat man tul an la awm bawk.
Zarzokima thattute man kawngah hian a thattu nia hriat Tuikukte chettlatna hmun hi state pawn lam a nih avangin duh angin Mizoram Police te tan chet zung zung a harsa deuha sawi a ni a. Ningani-a an mi man Barsila hi Aizawl thlenpui tawh a ni a, Aizawl Police Thana-ah thu zawhfiah tura kawl a ni a, Central Jail lamah thawnliam thuai a nih a rinawm, thudawnna chuan a ti.
Tripura Police ten Zirtawpni-a an lo man chu Mizoram Police ten Zoram lamah lak tumin Production Warrant nen an thang mek nia hriat a ni.
Zarzokima thattu nia hriat SIT-in an man tawhte chu
1.Vanlalfela (36) s/o Taitea (L), Tuirum
2.Chusarai @ Lalrinfela (32) s/oBonarai, Tuipuibari
* January ni 17, 2010 ah man an ni.
3.Lalthazuala @ Yakcho/Orno (28)
* January ni 22, 2010-ah Mizoram Police leh Assam Rifles joint operation an neihnaah man a ni a. BLFM Army Chief hlui a ni nge, Mizoram chhung leh pawna pawikhawihna hrang hrangah a inhnamhnawih tawh.
4. R.Laldawngliana s/o Ranguna (L), Meidum
* Mizoram sorkar leh Bru hnam aiawhte Aizawl-a an inbiaknaah telin, inbiak zawh hnu-a an haw lam chu January ni 23 khan Kanhmunah man a ni. Amah hi Mizoram Bru Displace People Forum-a General Secretary ni lai a ni a. Bru hel leh pawla hruaitu hlun tak nia sawi a ni.
5. Barsila (23) s/o Talmawi, Khakchang
* Damchera leh Kanhmun inrina bulah man a ni.
6. Tripura Police te man, SIT-in an lam mek
