Ka ngaihtuahna ah pawh awm tawh ngailo tih theih tur mai chu ka ngaihtuah chhuak thut mai a, kan mitthla chiang a lung a van tileng thei ve mawle!
Kan rawlthar chhuak tan tih chuan Mizo nula te chuan mahni puan bih tur emaw, an chhawm tur emaw an tah lai hi kan rim ve dat dat thin a. Tunlai Burma lam puantah khawl anga rang nilo mahse, Mizo Thembu ngei maia puantah an nih avang khan a hlu bik ka ti a, puan tah tur pawh kha a hahthlak avangin mi hrisel tak nih angai thin a ni.
An puantahna kiangah lo thu ve in, an La hman tur te kan lo hlum sak ve thin kha ania. Chutianga la te hlum chung chuan hlim takin thianghlim takin kan lo inrim ve thin. Kan in zah tawn em em thin a, tawngkam lah a hawihhawm thin hle. Laih deuh nen chet sual palha an Themtleng a in chhuih palh kha a na duh in a zahthlak duh angreng khawp mai.
An tah tur La an han chhum hluai maia, chumi chu kawmchar lamah an pho dul thin (La a siam tawh a ni thung!). Suvel ah hlumin, Themtangin kan Ngalah kan Tlei thin kha ania, nuam kha kan ti ve em em thin. Themtang suih sak te khan rilru takah hlimna te kha min pe thin. Themtleng erawh ka pu in Tum kung hmanga suih min zirtir ngial chung pawn, hman nuamin ka suih thiam thei talo a ni.
Tun hma chuan, La par kha Herawtah an her a,chu chu an sai leh a,La tui siamin an Chawn leh a, Hmuiin La tui chu La zaiah an kai leh a, La chu Tingin emaw an dum leh a, an zar rova, Suvel hmangin an hlum leh a, tichuan puan atan an bang leh thin. Mahse, Herawta an her lai te hmu ve thin tho mah ilang, rawng thlak sa an zawrh, chhum zawi ngai chi ang kha ka hriat lar ve zawk a ni thung! Thembu ah hian hmanrua te chu Sakuh (hmul), Tukrek, Themtleng, Themtang, Kawngvawn etc te a ni.
Thingtlang ah ka khawsa/zin nasa thin bawk a puantah rim tur an awm nawk thin. An puantah kan thut chilh, ti ti a tui viau thin, an nin inleng ngaihtuah in an Kawngvawn an thlah dula, an puantah lai dah in, nui sen sen chunga thingpui sa vet vawt tak mai min han thlit kerh kerh mai te kha avan hlu tak em vele. Kan mitthla a, an thingpui thli tur Tap pan na lama an Dap chhuat rap ri thuap thuap te kha ka mitthla ah a lo lang iai iai mai. Sakuh (hmul) te kha a tangkai em em mai kha a ni si a le!
Khanglai inrim dan kha tunlai han ngaihtuah chuan kan inkawm dan leh kan in thlahlel dan kha a lo van thianghlim awm e, ka ti ta a ni. A lunglen thlak mange aw! Lenkhang zara Tlawngnuar riah lai te a Khawrihnim nula han rim nal nal te kha a lo awm ve reng ah ka ngai ta e.
Similar Posts:
- Mit Hrik leh Hrik Dangte
- Chan chin dang lam te chu.
- I ngaihtuah ve ngai em ti hian?
- Sorkar Thingkung
- Mizo hmeichhiate’n puan an veng tawh.
February 14th, 2010 at 6:04 am
@HV : Tiny Tots Principle i tih hi Principal i tihna ni tak maw? Ka fate pathum lai Tiny Tots-a engemaw chen inzir an ni ve. Sikul tha deuh, Tiny Tots neitu ber kha College-a kan kalpui thin, Drama changho zak zak kan ni thin asin. Chutah chuan C. Lalrosanga (AIR?), Malsawma IAS te … ka sawi kim seng lo! NEHU-ah drama-ah 2-na kan ni ve tlat! Ka lung i tileng lehzual! Handloom lamah ka kual lut vek em ni? Loin Loom tahtu ai chuan Handloom tahtute an tawng a fiah lo zawk ka ti deuh mai a nia! Ha ha ha!
Report this comment
February 14th, 2010 at 10:32 am
chawnghilh, Principal ni e Mapuia chu. Bah Steer an a rawn be tawh che em?
Tunah chuan a director lawm ni?
“Heihi All India Radio Aizawl a ni, chanchinthar, a chhiar tu C.Lalrosanga,” tih aw thum nalh tak kha ka mitthla zawk mai.
Report this comment
February 14th, 2010 at 10:34 am
Thembu… Thembu… Thembu… Aizawl, here I come…
Report this comment
February 14th, 2010 at 10:38 am
shailendra, Tiau ah nimin i kal a, tunah Azl lam maw, ngal chak ve tak chu i nih hi mawle
Report this comment
February 14th, 2010 at 11:05 am
HV. ha ha ha, nuam ve a lom, ti raw. Vawin chu motor atangin handset leh char char mai teh ang. Buannel chu chho zawng in 4 hrs vel kal a ngai don, nimin a an lo sawi dan chuan… hui hammm… :roll:
Report this comment
February 14th, 2010 at 11:28 am
Pu Shai, Pu Mapuia khan biak che a duh a ni maithei.
Report this comment
February 14th, 2010 at 12:14 pm
samuela. Aizwl ka pan mek a, ka chhung te atang khan ka no a hriat theih ang
Report this comment
February 14th, 2010 at 1:48 pm
@HV, lung i va ti leng ve mawle. Puan tah nula hi ka rim ve zauh zauh thin a, ka nu puan tah tur hi a ban saktu ber ka ni thin. Bawhtah-puan ka ta tur ka nuin min tah sak dawn phei hi chuan ka phur thei rap.
Report this comment
February 14th, 2010 at 8:28 pm
chepa, keipawh ka lung a tileng khawp mai. Ka pi damlai a a puan tah tur ka ban sak thin lai te, ka nun puan a la tah theih lai te kha min ti hrechhuak thin. Kan u Peter(ka ni fapa) Catholic puithiam a an nemngheh dawn te khan a puithiam kawr kha ka nun a tah sak ngat kha ania, kan unauin kan bang thung.
Thingtlang nula hi rim an nuam ka ti thin, an hawihhawm a, fiamthu an dawl bawk, titi ah fashion lam a tel vaklo bawk a… a tam mai.
Report this comment