Thorang Bialtu MLA I&PR Minister ni bawk Zodintluanga’n March ni 10 atanga 13 chung khan a bial chhung, lirthei tlawh pawh loh khua New Sachan atanga Tuikawi inkar lawng-in a fanga, Tui tlem lai a nih avangin hmun tam tak ke a kal ngai lai a awm bawk. Heng a tlawh khuate hian bialtu Minister an lo nei fo tawh a, an khua tlawha riah chilhtu an la awm meuh lo niin an sawia, Pu Zodintluanga chungah an lawm zia an sawi bang thei lo.
Ni khatah khaw tam tlawh theih a nih loh avang leh khua leh khua inkar a hlat bawk si avangin, Minister hi lui kam thlam ruakah zan khat a riaka, tuk thuanah chaw,dal leh chi, tui ti tak in a ei ve bawrh bawrh a ni. Hetianga mahni bial mipuite tlawhchhuah duh vanga, Thlama riak khawpa minister a inpe hi a fakawm a ni. Pu Zodintluanga hian a bial mipui te chu kumin chhunga NLUP sem a nih tur thu hrilhin, NLUP chu mirethei dawm kan na tur a nih angin a dawngtu tur te chu rinawm leh diktaka, din chhuah pui ngei tura hnathawk tura inbuatsaih lawk turin a chah a, NLUP chu Congress sorkar chuan hlawhtlin pui ngei a tum dawn a, a hmang dik lo te chu sorkar in dan anga a hrem tur thu a sawi bawk.
A bial chhung khaw hrang hrangte chu trade in ang hlawhtlin pui ngei tur, a hlawpa thlang turin a fuih bawk. Lui dunga lawnga a chuan lai pawh hian a bial mite hian an mamawh te tawngka leh lehkha hmangin an thlen renga, Minsiter hian tha tak in a lo dawng sawng thei zel a ni. Tun tuma Pu Zodintlanga’n a bial a fanna hi Bangladesh nena kan inrina ramri hrul a ni a, heti chung hian a PSO bak vengtu dang a hruai belh lova, official a inzui tir duah duah lo bawk a, a tlawh khaw VC te chu, chaw leh sa buatsaih turin a beisei kher lova, an chhawp ang ang a ei ve mai a ni.
Pu Zodintlunga hian amah zui tur hian party mi Pu Mafaka, Pu Rina, Pu Sawmte-a leh Pa remhre tak Pu Hruaia bakah he thu ziak tu Omom-i Pa te a sawm a, heng bakah hian PSO leh Driver pahnih bak a hruai lova, hautak lo taka, ram rawngbawltu nih inhriaa a zin hi, amah tawiawmtu te tan chuan a chhuanawma, minister hnungzui e ti lo chuan, minister ai mahin kan tuar a zuau emaw tih mai tur a ni a, a inpekna a ropuia, a hnung zui zawh erawh a har khawp mai.
A zam a tha a, a inpe zo bawk si a, fak vak mai a chakawm a, mahse engemaw beiseia fakah, miten min lo ngai ang tih ka hlau bawk si a, chuvang chuan, a bula kal, a hnungzuitu nih a nuama, ram a vei tak taka, hnathawh kawr a ha peih tak tak ti chauh hian, a hmawr ka bawk mai ange.
