Haw haw leh khuangpui nen chumchilha nawr chi a ni lo. Rilru fim tak, thluak leh kut themthiamna hmangkawpa khelh chi a ni a, tunah chuan Mizoram mipuiin he game hi kan hmelhriat tak tak ta. Tun hmaa Pool Parlour-a intihhlimna boruak ang kha a ni tawh lova, he game atang hian eizawnna tling, mite hriat hlawhna tak tak a awm a nih hre chiang hmasa tuten an luhchilh mek a, chung mite chu Millenium Centre-ah an inphochhuak ta.
Inrinni khan Joshua L Zama 9 Balls Masters Cup 2010 khelh zawh a ni ta a, mipuite lawm hlawh leh tlang rin top seed R.Lalrinsanga, Tuikhuahtlang a champion. Rinsanga hian final-ah 3rd seed K.Lallawmkima, Khatla South chu 11-8 a hnehin tuilet hnu leh leilung pian tirh ata Mizoram-a Masters Cup champion hmasa ber a ni.
Mizoram Snookers & Billiards Association chhuan pahnih inhmachhawn an ni a, inhnehtawk hle tura ngaih an ni.
Top seed Rinsanga’n a break hmasa a, a zo nghal deuh thuak. A dah ban ball tlema zawng chu cueball awmna harsa tak hmanga thenfai turin a kalsan a, chu chu Lawma tan thil khirhkhan zet mai a ni tlat. A che fuh ta lo reng a, Rinsanga zo zuiin frame hmasa a la nghal hmak. An khel cho zel a, frame 4 zet mai Rinsanga lak tawh umin Lawma’n a hnaih chho thuak thuak reng a, frame 9 Rinsanga’n a lak thlengin chak zawk tut rinthiam har tak a ni la ni zel. Mahse Rinsanga nge nge chuan No.1 a nihna pholangin a tawpah ropui takin hnehna a chang a, frame 11-na a lakna tur chu hlah miah lovin a zo nghal hmiah a,
Mizoram champion a ni ta.
Final-ah hian Sports Minister Pu Zodintluanga chu khuallian a ni a, Minister chuan, ” Mizoten infiamna kawng hrang hrangah hma nasa takin kan sawn chho mek a, chu chu hmuh theihin a langchhuak mek a ni. Inzirna mumal pawh nei lovin 9 ball-ah Mizo players-in India ram champion lai a hneh thei a nih chuan Mizote hian talent tha tak kan nei a ni tih a chiang. Infiamni ringawt ni tawh lovin Sports hi eizawnna tling a ni tawh a, BA/MA hna hmu lo tam tak kumin an chhuah chur chur mek lain tih tak taka ti tan chuan sports-ah hian eizawnna tling a awm tih hi kan hriat a pawimawh ” a ti. Sports minister chuan midangte chochuah nan leh sports promote-na tura sum leh pai tumtu David Zama te chu entawntlak a tih thu a sawi bawk.
He tournament atana sum leh pai hi 2003-a chatuan ram pan ta an fapa Jushua’n hriatreng nana Chwlhhmun pa Pu David-a te chhung tum a ni a, Pu David-a chuan, ” Kan duh ber chu sports hmasawnna tura a kila lung pawimawh nih bakah he thil atanga midangte cho chhuah a ni. Theihtawp kan chhuah zel dawn a, chutiang tur chuan mi dangte lo penchhuak ve se kan duh a ni” a ti. Lawmman te hi a nupui Meggie nen an sem nghal a, an chhungkuain he masters cup hi an tawiawm tha thin hle.
Mizoram Snookers & Billiards Association President Pu John Kima chuan tournament hlawhtling tak an neih theihna chu Pathian awmpuina vang a nih thu a sawi a. Mipuiten an rin phak baka an hlut thu leh an kal zelna turah hei hian nasa taka phurna a pek dawn thu a sawi a. ” Sum leh pai min tum saktu Pu David Zama te chungah lawmthu kan sawi a, kan chanchin kimchanga min puanzar sak thintu print media leh electronic media te chungah lawmthu kan sawi tak meuh meuh a, tournament kan neihna hmuna min tawiawm thintu Assocaition hrang hrangte chungah MS&BS chuan lawmthu kan sawi bawk” a ti.
