Mi ngo/Sap ngaisang ta ngang chuan khawthlang movies/films te hi Mizo te hian kan lo en nasa ve khawp mai a. Phak tawk tawkah kan Cinema Hall neihchhun Zodin Cinema Hall leh JL Cinema Hall te meuh pawh en tawp thak khawpin Hollywood movie hi kan lo pawngpaw atchilh ve a niang chu! Chung zinga actor (hranghlui deuh) kan hriatlar ber ber te chu Arnold (Terminator) te, Sylvester (Rambo kan tih mai…a polythene thlengin a larpui) te, Bruce Willis (Die Hard) te chuan movie/film an changho ve dawn tlat mai!
He film hming tur hi ‘The Expendables’ tih a ni a, Sylvester hi Director nih pahin a chang dawn a, August 13, 2010 ah release a ni ang. Sholin Kungfu lama kan hriat lar Jet Li te, Jason Statham (Transporter) te, Dolph Lundgren (Univeral Soldier-a misual) te, WWE Wresler Steve Austin(Stone Cold) te, UFC Heavyweight Champion thin Randy Couture bakah kan hmelhriat vak lemloh milar dangte nen he movie hi an changho dawn a ni.
Arnold hian California Governor Office chu nikhat chiah chawlh lain he film hi a chang a ni. Sylvester hian hranghlui lawrkhawm ang reng deuhin Jean Claude Van Damme leh Steven Seagal pawh a sawm a, mahse an ni hian an lo hnawl a ni
Mizoten Hollywood actors/actress kan ngaisang thin bawk a, kan ngaihsan zawngte (hrang hlui leh a thar pawh) sawikhawmna remchangah he post hi ka hawng e! Naupan laia kan sawi thinte sawizawm pahin tunah Internet kaltlangin (misual movie lovers ten) i sawikhawm leh ang u.
source: movies.yahoo.com
