mi(sual).com

(Mizo Footballer ka hmuh ve phakah thiam ka tih leh ka ngaihsan ber a ni a, zah takin heng thu te hi kan ziak ve a ni)

Bicycle kick/ back volley, volley thiam tia sawi thin, goal thun thei leh leadership nei tha tak, Mizo footballer zinga arsi eng hmasa leh chuai thei lo tur a ngaih Mizo football chanchin sawi apianga a hming sawi hmaih ngai miah lo tur khawp a, inkhel thiam, a ni ang a goal thun thei ‘born scorer’ an tih ang chi kha Mizo footballer zingah an la awm leh lo ti pawhin sawi ila, a inthlahrun awm miah lo. An la awm lo miau a.

Mizo tlangval India aiawha khel hmasa ber chu K Kawla a ni a, 1977 khan India aiawhin Kabul Football tournament-ah a khel. Hemi hnu hian K Kawla hian India aiawh bawkin kum 1978-ah khan Aga Khan Cup, Bangladesh-a khelhah India aiawhin a khel leh. Kum 9 emaw vel zet a vei hnuah kum 1986- khan Zomuanthanga chuan Asian School Games 86, Brunei-a khelah ah India aiawha khelin, jersey no 10 ha pha ngat tiin kan chhuang thin hle a nih kha.

Mizoram football mipui nawlpuiin kan buaipui luih luih lai khan Mission Veng tlangval Zomuanthanga chu chanchin ngah pawl leh Zohminga Zote thlaktu ni hial a sawi thin a ni a. A ball thiam dan leh penalty box chhunga mawi leh zei fahran a chet thinna te kha theihnghilh phal chi rual a ni lo ang. Khatih lai khan tunlai angin media a la chak lo a. tlangkam ti ti kha inkhel thiam te chanchin kan hriat theih dan awmchhun a ni deuh mai a. Chuti chung chuan naupang thleng thleng khan Zomuanthanga hming hre lo chu an tlem ngawt ang. Khatih laia club tha MAP tih lohah chuan Zomuanthanga kha a khelkim vek a. AFC, Power Department SC, PHE, PWD leh AFC ah te khan a khel kim vek hman a.Mizoram Footballer ropui ber zinga mi, 1986-a India ram aiawha India School team-a khel phak Zomuanthanga, Mission Veng chu April 2 zing khan Kum 46 mi niin a boral.

Zomuanthanga hi Mizoram football ah mi hming tha ber pawl a ni a, a vanglai chuan defender zawng zawngin chan huphurh ber te zinga mi niin, penalty box chhungah chuan half chance pawh goal a chantir thei khawp a hlauhawm a ni, khawi atang pawhin penalty box chhunga a team mate ten ball an vawrh luh thei a nih ngat chuan goal a thun lo a nih pawhin goal hlauhawm a siam thei deuh zel thin a ni.

Football a khelh tan tirh lamah Aizawl South team inngahna ber chu Zomuanthanga a ni a, a inkhelh pui thin leh amah lo kaihruai fo thin tu te zinga mi Lalremtluanga,tunah Mizoram Football Association a Hony. Secretary ni mek chuan ” A ni ang tluk a player talented kha an vang ngawt ang, a taksa a vawng uluk a, a pian pawh kha a footballer hliah hliah a, leadership a nei tha a, goal a thun thei a, penalty box chhungah a ni ang a hlauhawm leh goal thun thei kha, Mizo zingah a la awm lo a, Zomuanthanga ang kha MFA chuan kan nghak leh mek a ni” a ni tiin Zozam a hrilh.

Kum 1985 khan khatih laia club lar El El Football club ah bul a tan a, a hming a chher nghal hle a. Goal a thun thei hle a. Hemi hnu lawk hian khatih laia department club te kha chuan an club a khel turin an sawm deuh vek a, heng sawmna te hi hnawlin AFC a zawm ta zawk a. AFC ah khan khatih laia footballer lar tak lo ni tawh Pa Dinga kha Jersey No 10 ha thin a ni a, mi thenkhat sawi dan chuan Padinga khan No 10 a lo ha tawh si a, No 10 ha tur a phu ve tho Zomuanthanga hian a kian ta zawk niin sawi a ni thin a, Aizawl Football Club player zingah pawh No 10 ha tur a an duh zawk chungchangah pawh an inhnial fo nia sawi thin a ni.

Mizoram Football chanchin a sawi hmaih loh tur chu kum 1989 khan Bordoloi Trophy ah Mizoram Football team chuan India ram club tha Mohammedan SC te, East Bengal te an hneh a nih kha. Khami tum pawh khan Mizoram player pawimawh leh chakna ber pakhat chu Zomuanthanga kha a ni a, hemi tum hian Iran club tha Esteghal, Tehran lakah an tlawm ta hlauh a nih kha.

Kum 1986 khan India School aiawhin Brunei ah a kal a, hemi tum hian India rawlthar chuanvawr Bruno Coutinho te nen an kal khel tlang a. Hemi tum hian No 10 ha tur Bruno nge Muanthanga tiin sawi a thin a, Zomuanthanga hian goal a thun theih zawk vangin No 10 hi a ha ta zawk niin sawi a ni bawk. Bruno Coutinho hi India rama an kir leh hnuah a lar chhunzawm ta zel zawk a, India national team captain te pawh a ni ta hial a.

Bruno te ang hian Zomuanthanga khan India ram a an kir leh hnuah inzir zelna tur nei chhunzawm nise India senior team ah khan a tel phak lohna tur a awm lo. Mahse khatih lai khan Mizo te hi Indian football ah hmelhriat kan la hlawh lo a, tribal nih vanga hnawl kan nih chang a tam hun lai kha a ni a. Mahse chuti chung chuan Zomuanthanga chuan Subroto Cup 1986 hnawl ngam loh khawpin a rualpui zingah chuan player tha a nih avangin, India School aiawh khan Asian School Football Championship 86 Brunei a khelah India aiawh in a khel ta hial reng a ni.

Similar Posts:

• Mizoram football team an champion
• Mizo footballer state pawna insawnchhuak te
• Mizo footballer ten India tan an thawhhlawk
• Mizo club tel lohna 2nd-division I-league final round
• MIZORAM IN BIHAR A SAWP

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Saturday, April 10th, 2010 at 3:39 am and is filed under Information, More than words. You can follow any responses to this entry through the RSS 2.0 feed. You can leave a response, or trackback from your own site.