mi(sual).com

A hmasa berah chuan thil reng reng hi amaha awma sual ngawt a awm lo, mihringte chauh lo chu. A chhan chu a chhia leh a tha hriatna neia siam kan ni. Chemte hi mi vih hlumna atan an hmang fo a, mahse chemte kha amahin a sual lo va, hmanraw tangkai tak kha a hmangtuin a hman dik loh chuan pawikhawihna te thlentu a lo ni thei ta zawk a. Chutiang bawkin ZU hi amahin sual a ni lo va, chhia leh tha hriatna nei a ni lo va, thil nung pawh a ni lo va, a siamtuin a siam dan leh a siam chhan a pawimawh hmasa ber a, a dawt lehah chuan a hmangtuin a hman dan a dik loh chuan sualna hmanrua, mihringte nun tichhetu leh min ei chhetu a lo ni thei ta zawk a ni. A tha zawnga hman dan erawh a hre tlem ber pawl ka ni thung.

Zu chu enge ? – Mimawl ka ni a, sawi zau tehchiam tur ka hre lo. Zu chi hrang hrang a awm ang. Hnam hrang hrangin zu an neih pawh a in ang lovin a rinawm. A tam ber chu han in a, mihring taksa leh ngaihtuahna ti danglam a, min ti rui thei a ni a. In tam tawh hnu-ah chuan a lova awm harsa tihna thlen thei khawpa taksa leh thisen luhchilh thei a ni.

Kan Society-ah hian zu in hian nghawng a nei em ? – He thu sawi hma hian khawvel ram hrang hranga hnam hrang hrangte chungchang ngaihtuah hmasak a tulna chen a awm thei a. Kan pianna leh chenna leilung leh kan hnathawh mila society hrang theuh nei kan ni a. Chuvangin, kan chenna society hi a pawimawh ber a nih avangin society dang chu tehkhin nana hman loh hi a tha berin ka hria a. Kan nunphung a zir zelin kan social evils hi a danglamin a hrang thei a. Tin, kan economy dinhmun in an loh lutuk vangte leh kan work culture in an loh lutuk avang hian hnam dang leh ram dang society thlir chiam hi a tul ka ti lem lo

Mizo society-ah chuan ZU in hi kan socials evil a ni ka ti ngam. Pi pu te hunlai ka thlir thiam lova, tun kum tlemte chhung hi ka thlir thiam a ni. Zu ruih avanga nupa nun buai, zu ruih avanga chhungkaw buai, zu ruih avanga thi, zu ruih avanga hnathawk tha thei lo, zu rui avanga khawtlang kan buaina, zu ruih thin avanga nih tur ang ni pha ta lo, zu ruih vanga tualthahna, zu in thin avanga chhungkaw tla ran, zu in thin avanga nun chhe ta, zu in thin avanga Pathian pawh thei lo hi kan ramah hian ka hmu hnem ta em a ! Chuvangin Mizo Society-ah hian zu in leh ruih hian nghawng tha pakhatmah a chhuah ka la hre lo va, a chhe lam erawh chu sawi dawn ila taihmak ngai khawpa ziah tur tam a ni thung.

Zu in leh kan rinna thu – Mizo zingah zu in thinin Lal Isua tana nun duha a pianthar chuan a zu in a bansan thin. Hei hian thu tam sawi ngailovin min ngaihtuah zui tir theih ka ring. Mihring taksa ti danglama ngaihtuahna fim tibuai thei zu in thin leh a zu inin a thawh tir thin dan hi kristian rinna nen a inmil thei thlawt lo va, chuvang chuan Mizo Kristian-te chuan zu in hi Lal Isua hnung zui tumna nena inmil thei lovah kan ngai a, chu chu a dik a ni.

Zu khap mek leh zalen tir duhna chungchang – Mizoram-ah chutiang khawpa zu in kan thlalaite te leh chhungkaw pa-ah te, khawtlangah te rah tha lo a chhuah takah chuan Kohhran hote hmalakna a zarah Sawrkar-in kum 17 lai mai a khapna dan a lo hmang ta a. He dan kan hman hi a tlangpui thu-a thlir chuan a tha thlawt a ni, chhungkua, khawtlang-ah te a rah lo lang hi kan hmuh hmaih theih ka ring lo. Mahse, dan lek kawhna kawngah kan dinhmun a hniam avangin a hlawhtlin lohna hmuh tur tam tak a awm. A hlawhtlin loh chhan hi ZU-IN a lo that tak vang nilovin, dan lekkawhna kawngah kan duh ang leh beisei anga sawrkar a chet theih loh vang a ni. Dan engkawhtuten chak takin han keng kawh sela chuan he khapna dan hi a va tha lehzual dawn tehlul em.

Dan lekkawh tuten beisei anga zu khapna dan an lekkawh zo loh chhuanlamin zalen taka zu in duhten chhuanlam hrang hrang siamin zu zalen tir an chakna an pholang nasa em em a. Khawtlang nun tha neih tuma beitu YMA pawhin theihtawp a chhuah chung pawhin a mi leh sa pahnih khat chetsual changa beihlet duh tu an tam tawlh tawlh a. Chu chu tuna kan ram dinhmun pakhat chu a ni mek a ni. Ka ngaihdan chuan zu khapna dan hi kawng tam taka a hlawhtlinna hmu duh lova, a hlawhtlinlohna lai chang chawi a, zalen taka zu in duhte au chhuak hian zu-in hi a tha ta tih lantirna pakhatmah a lan chhuahpui ka la hre chuang lo a ni. Inhnial fiamna te, mi thuziak te, chanchinbu lama ka hmuhte atanga zu zalen tir duhtu te point hrang hrang ka han la chhuak ve chhin teh ang.
** Sawrkar sum lakluh a lo tam phah nan (Revenue)
** Zu tha lo a pung a, miin an chhiat pui zawk
** Khap tak tak theihloh leh miin an zawm tak tak theih loh a nih avangin khaploh mai a control a tha.
** Dan zahawmlohna a hring
** Zu inthiam inzirtir zawk a, control chunga tih zalen a tha.
** Isua pawhin a ti pung a; Bible pawhin zu a khap lo.

Ka han chhang ve dawn chhin teh ang – Kan sawrkar chak tak (?) hian zu chhiah avanga a indaih lohna a phuhruk thei dawn emaw, a sum lakluh a lo pung thei dawna kan hria hi a dik a ni. Mahse, chhungkaw tam tak budget ti buaitu a nih tho si chuan kan socio economy-in a hlawkpui dawn chuang lo tih hi a chiang reng a. Chhungkaw tinin kan sum lak luh dan han chhut ila, chhungkaw pa in emaw, thlalaiin emaw zu tha control chunga a lei a, a in a in chuan eng angin nge chhungkaw economy-in a tuar dawn tih hi chhut hmasak a tulin ka hria. Miin zu tha lo a in chu duhsak pui loh avang leh zu tha in tura duhsak tute aw ka rawn chhuak thin hi a lawmawm letling thin zawkin ka hria. Midangte hmangaih niawm taka hetiang ang rawn sawi thinte hian hei hi an duh tak tak a nih chuan miin zu a in lohna tura theihtawpa beitu nih a thlanawm zawk ka ring a, zu chhia pawh in duh khawpa zu duh mi chu a tha-ah pawh a chhiat pui hmasa tu a ni tho ang.

Khap tak tak theihloh ni a hriat avanga zu zalen tir duh tute hi a tam zawk chu zalen taka zu in duh an ni chawk. Hetianga au chhuak thinte hi zu khap tute leh khawtlang thatna tura beitu NGO-te tha ti chak a, khapna dan ti chak tura beitu te an ni ngai lo. A tha hria a, mahse zawm theih dawn loh chuan a tha lo pawh ti zalen ila ti duhtu an ni chawk. Dan kan siam hi a siam tute leh a zawmtu turten kan palzut nasat chuan dan zahawmna a tibo telh telh a, chu chuan dan hnuaia leng mipuiteah nungchang leh rilru put hmang dik lo nasa takin a thlen tir a. Dan humhalh tura ke pen chhuak emaw au chhuak emaw silova a chhiatna lai behchhan a duh thala tal duh mi kan tam in ka hria.

Zu inthiam chugchang hi mihring mize hrang theuh kan nih avangin sawi a har ka ti. Zu in thinah hian sawma pakhat hi thiam taka zu in a, a taksa leh ngaihtuahna ti chhe duhlo leh hnawksak lova zu in thin mizo zing-ah hian an awm ang em le (?) ka ti a ni. Kei chuan ka ring lo hul hual. Bible-a zu chungchang lo langte leh a in tute chungchang lo langte la vawng a, rawn irh chhuah pui thinte hi tawngtai chung leh Pathian pawlna chang tuma Bible chhiar thinte an nih ka ring lo. Thufingte bu chauh pawh hi chhiarchhuak se la an harh chhuakin ka ring.

Ti hian ka han hnial ve chhin – Zu sawimawi tute zingah zu in sawimawi tu pakhatmah ka la hmu lo. Engang pawhin miin lo sawiin lo zalen pui duh mahsela hei hi an hnena ka zawhna a ni –
** A fapa, a fanu hi zu in ve turin a duh ngai em ?
** A nupui hi zu in ve turin a duh ngai em ?
** A tute lo thanglian pawhin zu hi in ve zel se a duh angem ?
** A farnu hian zu in ve se a duh angem ?
** An chhungkua in control tak chung siin zu in hun siam thin sela a duh ang em.
** Zu chu an chawei dawhkanah, an sitting room-ah an chhungkua a tlan za ho turin an chawp dial dial duh angem.
** Zu in thin piangthar ta se la, a zu in bansan lovin a piangthar theiin a ring em ?

Heng zawhna pasarih hi mizopa inti chuan ‘AIH’ tiin a chhan ka ring. ‘Zu in thin leh zu duh mi chuan anmahni chauh an inngaihtuah fo’ ti a ka pa in min hrilh thin hi a lo dik a nih ka ring. Kei chuan, ka thisen zawmpui ka chhungte leh thian tha te hian zu hi in ve miah lo sela tih hi ka duh ber a ni. Ka chhungte tana ka duhpui loh midang tana duhpui ang hrim a zu sawimawi ni chiah si lova zalen tir duhtu nih chu ka duh hauh lo a ni.

Hmanah damdawi atana zu tha titu leh chutianga hman duhtu nen kan ti ti a. “Doctor i rawn ngai em”, ka ti a. A rawn thin thuin min chhang a, “anih leh i damdawi atan zu inchawh tir turin emaw, zu a that i rin thu i hrilh em,” ka ti a, aih tiin min chhang a. “A nih leh a that ringin a chawh tawh che em,” ka ti a. Aih ti bawkin min chhang. Aman zu in a chak a, a thatpui a ring tlat bawk a, mahni inthiamna inneih tir a duh a, atan pawina awm lo niin a sawi ta mai niin ka hria.

Tunah hian kan ramah zu in thinte leh zu in duhte nasa takin Setana’n a bum mek. Mahni inthiam chawp tir duhna hmangin a bei mek a; dan lekkawh zawhlohna hmangin dik ve ni a inhriat tirna hmangin a bum mek a; damdawi atan atha tihna hmangin bumin an awm mek a; midang tihsualte chan khana lak tir duhna hmangin bumin an awm mek. He a bumtu Setana hian an boralna bak a ngaihtuah lo tih ngaihtuah ngam leh zu hian kan khawtlang, chhungkua leh mimal nun a tichhe nasa tawh em a ni, chuvangin mizo tlangval hian ka do tur a ni ti a rilru pu ngam erawh an awm lo.

A tawp berah chuan miin a eiru a, miin dan a lo palzam a, chumi avanga dan palzam emaw, dan hlih emaw duhna lo piang hi Kristian rilru put hmang tur aniin ka hre ngai lo. Thil thalo ti tute avanga intilungngai lo tur leh fello taka tite awt lo tur asin kan nih zawk. Zu hi amahin sual a ni lo a, a ni thei lo, zu in ruihna leh a hman khawlohna hian sual nasa tak a thlen thin a, chu chu kan khawtlang, kan chhungkua, mimal nun tana boralna leh chhiatna thlen thei a ni zawk. Zu thatna hria emaw, zu in thatna hria emaw-in thiam taka a ziak ka chhiar chak a, kan chhungkaw tan leh kan khawtlang nun tana zu in thatna hria in thiam taka a ziak ka hmu chak a ni. Tin, kan thenawm hnaiah hian zu rui thin awm lo se ka duh kher thin mai, a chhan chu buaina a thleng leh thin.

Similar Posts:

• TLANGAU (Krismas ka hman dan tur)
• Mizoram- Kristian ram
• In chhungkua in dam tlang em?
• Zu in hi Kristian te tan sual a ni em?
• Thihthu…

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Thursday, September 5th, 2013 at 9:00 am and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.