mi(sual).com

Aizawlah rau rau pawh Tuikhuahtlangah kher kher nula ka rim ang tih hi rin harsa ti fe fe an awm ka ring. Mahse, a takin a thleng a. He nula hi ka rim mai hman si loh avangin thianpa RC-a, a hmun hma vel lo thlithlai hmasa turin ka ti dawn em maw ni le ka ti a. Ani lah chuan, a piantirh ata mahni inrintawkna la tlachham hauh lo tih takah, “ A hming leh a phone number min han pe la, zanah an In atangin kan rawn phone ang che”, te a ti vel a. Nguntaka ka ngaihtuah vang vang hnuah, he nula tana thil tha chauh lo chu ka duhsak miau loh avangin RC-a te ang hmelhriattir ve ngawt chu a felhlelin ka hria a. Ka pe leh duh ta lova. Keimah ngeiin, Masi lai, Zoram chuanchhuah remchan laiin rim tumin ka thawkchhuak ta a.

Kolkata-a thlawhna tumhmuna kan awm lai daih atang tawhin nasa takin ka ngaihtuahna ka seng a. Eng nge sawi hmasak chi ang a, eng nge sawi loh tawp tur thilte ni ang tih vel te pawh ka ngaihtuah lawk vek a. Orissa atanga a tan liau liauva muffler ka hawn, ka bag-a ka dah te chu ka han phawrh a, a vawi eng emaw zatna atan ka han thlek kual leh vel a.

Hmm..a lawm tur a ni ringawt. Lengpuiah thianpa Chama’n min lo hmuak a. Nula a rawn hruai a. Kan hawlam khan a nula hruai khan motor a ruih avangin kawng lakah kan ding zauh zauh a. Thim dawn ruai-ah Aizawl khawpui kan lut a. Mission Venga thianpa Dina In luahah ka innghat sauh sauh a, zanriah eikham chuan inkhuihpial than chungin ka chhuak a. Ka phur em avangin Sikulpuikawn leh Mission Vengthlang kawn inkar step chhovah te chuan a changin ka tlan vel a. Ka ngaihtuah let leh hian ka nuih te pawh a za lek lek mai.

Sikulpuikawn leh Tuikhuahtlang inkara ka chhoh lai chuan ka speed ka thlak a. Muang raihin ka chhova. An in ka thlen hma-in, Tuikhuahtlang atang chuan Aizawl khawpui pe un mai te chu ka han thlir leh hnuhnawh a. Chutah muangchanga inherin ka chho zel a, Bike chung chuang chak fe fe-a min rawn pel leh fua thinho chu ka haw lek lek mai. Bike nei ve ila chuan an chak lo ngawt ang. An in bul ka han thleng a. An kawtzawl hmu thei tawk chuan Gate bulah ka ding ta vang a. Gate chu ka han hawng mai dawn a.

Chhunglam atangin tala lianin an lo kalh tlat mai a. Chutah ka phone ka han phawrh a. Ka Orissa sim card a thawh tawh loh avanga tlaia ka sim card lei thar hmang ngei chuan kan thiani chu ka han phone a. A tlang hleithei lova. BSNL ho mi rawih tuemawni hian “ The number you are trying to call does not exist” a rawn ti vei tawlh tawlh a. A exist-zia hrechiangtu tan chuan a ngeiawm duh kher mai. Thin a rim lek lek a. Ka han bei leh ngial a; a tlang thei ngang lova. Ka au vak mai dawn em maw ni aw ti tein ka ngaihtuah a. Mahse, chu em chu tihchi niin ka hre si lo. Gate chu ka han sawi deuh hlek a. Tala inthen ri hria chuan ui lian mang kheng hi bauh tuar tuar chungin a rawn tlanchhuak a.

Tlemin ka tawlh hnung deuh a. Ui hrim hrim hi kan ui an nih loh chuan ka nel lo. A bauh thawmah chuan an rawn chhuah ngei ka ring a. Mahse, an rawn chhuak mai lo tlat. Ngaiah an neih tawh te pawh a ni ta ve ang. Khatih laia bawng saruh ka mamawh tluk zet khan engtik lai mahin bawng saruh ka la mamawh ngai lova, a pawimawhzia pawn ka ngaihtuahna a la luah chhin eih ngai lo. Mahse, hmuh phakah bawngsaruh a awm mai si lo. Min bauh tuar tuar chungin Gate bulah chuan a vei thuak thuak a.

Tihdan ngaihtuah a ngai a ni. Val hi ka talbuai chhiava a ni. Mahse, ui naran vangin nula rim ka thulh thiang lo. Ka suangtuahnaah he zan thianghlim hian hmun a channa a rei tawh lutuk. Gate chu ka han hnaih hret a. Chu ui chu a nu a nih ngei ringin, “ Jenny Jenny,” te kan ti ngial a. Duh aiin Gate chu ka hnaih deuh nge ni, min rawn hap deuh thuak hian ka hria a. Ka thinin a tuar ta ngang lova, lung tum ka zawng a. Chu lah ka hmu mai lo. Brick bung, te deuh hi ka chhar fuh ta hlauh a. Han vawm pawp hi ka tum a. Mahse, ka thelh a; Gate chu ka vawm ri pawp a. Chumi hnu lawk chuan nula ni lovin, pa a lo chhuak a; “Tu nge ?” a rawn ti a. Ui chu a bauh nasa sauh hian ka hria. “ James-a ka nia ka pu, in ui hi..”. Chutah, ui chu a han kova. Jenny a lo ni awzawng lo. “ Spencer” a lo nia. A nu ni lovin a pa ngei a lo ni.

Kan thawmah chuan kan nula-i pawh a rawn chhuak a. Min rawn nuih vawr vawr a. Thinrim pawh a dai huai huai mai. “Spencer-a hi kan lo thlun theihnghilh a. Inleng a lo bauh leh chiam thin,” tih pah chuan Gate chu a hawng a. Lung muang takin inchhungah kan inchhawmlut a. Thianpa RC-a te ang chu ni se, ui bauh tirh khan hmanhmawh baklengin a tlan haw dur dur ang chu. Mahse, kei zawng ui lungmawl vanga nula rim thulh mi ka ni tlat lo.

Pawn boruak vawt zet atanga inchhung kan han lut chu a nuam kher mai. Mahse, a lum ta sawt e tih lohvah chuan a nuam hran hauh lo. Ka tum lawk aiin an inchhung chu a lo ropui a. Ka leng ta chu ka inchhir lek lek mai. In lama kan TV neih ve chhun let li dawna lianah hian Korean Movie an lo chhuah a. Kan khaw lama kan tih thin dan ang lo deuhvin an ni chuan ‘sikri’ ai lovin electric heater vam sen hiam mai chu an lo kil thap a. Chutia hmelhriat ngai hauh lohvin an in ka han chuangkai ta chu, an Korean Movie en lai theihnghilh thak hian min lo melh hlawm a. Thut pawh thu muang khawtlai lova haw leh nghal rum rum tak hi ka nap a.

Chutah, kan nula-i chuan an meilum ai kiangah chuan ka thutna tur min han hnuhhnaihsak a; muang fan raih hian ka han thu a. Ka kut hem pah chuan, TV chu ka han thlir a. Ka-a chhang, zawhna leh chhanna hunin a zawm ta nghal a. Ka-a chhanga exam ka beih lohna a rei tawh fu nain pass mark chu ka hmu phak maiin ka ring. Zawhna pakhatna chu khawi venga awm nge ka nih tih a ni a. Ka thiam chiang khawp mai ! ‘Rulchawm’. Rulchawm awmna lam zawhnain a zawm leh nghal zat a.

Chutah, Rulchawm chu Aizawl atanga 70km vela hla, Champhai lama awm a ni tih ka han sawi leh a. A la chiang tawk ta lo fo. Saitual khaw bul lawka awm a ni tih ka sawi hnu chuan, zawhna zawttu, paber lung a awi ta chauh a. Aizawlah chuan bazaar tura lokal em ni ka nih ? Nge lehkha ka zir zawk ? tih zawhna chu nula lamin min chhansak ta hlauh a. Khami zan khan zawhna leh chhanna hun kha kan hmang rei khawp mai. Ka inbuatsaih loh dan hlirin zawhna kha an set a. Korean Movie en lovin, Japanese movie ‘insat sawk sawk’ awmna lam te en ta zawk ni ila, zawhna kha min zawt tam lutuk lo zawk te’n ka ring hial a.

Orissa-a khawsa ka ni tih an han hriat chuan nuberin zawhna a rawn zawt ve ta thung a. Paber zawhna kha chu ka chhang tha hlawm viau a. Paper II pawh uluk taka chhan a ngai a ni. “ Kristian tihduhna a nasa sia, a hlauhawm lo maw ?” tih zawhna chu a hlauhawm lohzia uar taka sawiin ka hrilhfiah a. Example pawh ka pe nghal thlap bawk. Ka hmel a han en vang vang chuan Hindu hovin duhtawka an sawisak hrep hnu ka nih a ring a ni chek ang chu, “Kandhamal buai lai khan an khawih ve che em ?” min han ti a. He zawhna hi ‘rinna chak lo deuh ho chu min khawih ve lo’ tia chhan ka chak a. Mahse, a zawhna zawttu a uan loh em avangin tha takin ka chhang a. Hemi hnu hian Orissa-ah Kristian an tam leh tam loh te min zawt a. Tin, Orissa-a Kristiante tana an tawngtai thin thute pawh a sawi siam siam a. Boruak pawh a nuam chho tan viau mai.

Khami zan khan zawhna zawttu nih ka chak. An pa ber bur kha (keini thuziak te chu a lo hmufuh em lovang chu maw, a, hmu pawh ni se a chhiar peih tawp nang !), a pian leh murna te, a sikul kal ve laiin ‘Simple Pass’ kan tih ang hlir hian em ni a pass chhoh, pawl sawm eng division-ah nge a pass tihte ka zawt chak khawp mai a. Mahse, heng zawng zawngte hi zawt lovin, NLUP a hlawhtlin a rin leh rin loh te ka zawt a. Daih mai a. Maenga te ho khan ka titi vawrh phung hi lo zir rawh se. Nula rimna hmuna titi vawrhdan te hi hriat ve reng reng tur. Zawhna mawl mang tak tak, in zawh chak deuh deuh kha zawh chi a ni lo tih hriat tlat tur a ni. Nu leh pa lam paw’n, tlangvalte hian zawhna chhan nuam tih loh chin kan nei a ni tih te hi hriat ve hrim hrim pawh a tha.

Nia, khami zan khan nula kha nge a nu leh pa kha ka rim ber zawk ka chiang ngam ta meuh lo. Nula kha chu ka rim ve ngei chuan ka hria. Ka muffler hawn pawh a nghawngah a bah hnap kha. Mahse, khami zana kan in mangtha hnu khan kan la in mangtha leh ta reng reng lo. A hming leh phone number te pawh hi RC-a pek ve tawh mai tur em maw ni !

(He article hi zawlbuk.net lamah pawh in lo chhiar tawh maithei a mahse misual.com ah hian a ziaktu tho hian a rawn chhuah ve leh ani e a zau zawka kan lo chhiar theih nan)

Similar Posts:

• Computer Muang
• Zo-zia leh Sap-zia
• PA vrs PASAL
• HEMI PIAHAH HIAN ENGE AWM?
• Nula Rim Thu

Recent Posts:

• CFL Hmingthanga Thihcham Vawikhatna Pualin
• NGAIHNAWM KAWLEKSAWN – 2 :
• Pathian Kut Dinglam {Sunday Pual}
• ZO NUNMAWI HLUTNA
• NGAIHNAWM KAWLEKSAWN – 1 :

This entry was posted on Tuesday, April 13th, 2010 at 8:55 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.