Inkhawmna-ah, Biak In chhungah, midang zawng zawng sakramen thianghlim dawng tura an inbuatsaih laiin Bike (motor bike) ringawt in ngaihtuah ve tawh em? A zia lo duh teh a sin. Thenkhatin thlarau thianghlim chan ngei tuma an rilru leh taksa an buatsaih sauh sauh lai leh, awm zawna kut insuih chunga Biak In banga khenbeh lem lian fahran mai an tar an melh vawng vawng laiin, Bike rauvin min man ve thung a. Kohhran dan bawhchhe lem lo mah ila, sual puan nawn leh tak nap chungin, mahni inthiamlohna thinlung nen, zam ru ngawih ngawih chungin tlar hnunglamah tuma hriatthiampui ve phak loh ‘buaina’ nen kan inbuan a nih kha !
Rulchawm sawilan loh chuan a fel lovang. He Bike rauvin min phuardan hi Rulchawm atanga intan a ni tlat. January nili(2010) khan Bhubaneswar pana thlawkthla leh tur ka ni a. Rulchawm atanga direct chi ni hek lo. Ni hnih khan ka cousin-te car-in Aizawlah kan chhuk a. Chaltlang Sericulture Office chhak lawkah khan a vawikhatna atan ka innghat ve a. Zanriah eilai atang tawhin a tuka an Bike hmansak chakna rilru khan min mawlh tan a. Kulikawn Cathedral-a va inkhawm ngei ka duhthu ka sawilang nghe nghe a.
Tukthuan ei lai khan Bike hman a rem leh rem loh ka zawh hma hauhvin, paberin phal tak maiin, “ Kulikawna inkhawm i tum te chuan, Bike pawh hmantur a awm khu,” a ti a. Ka phur lutuk khan vawksa rep tuina te kha pawh mumal lovin ka dawlh liam satliah ta mai mai niin ka hria.
Inkhawm tura ka la insiam mawlh mawlh lai chuan mikhual room pawn atangin, “Valte, bike chabi chu hei dawhkana hi kan dah e aw..In chabi spare pawh kan thiltel nghal a nia. Helmet chu chhuar chungah a awm hi”. Bible khawi lai emawni-ah khan, “Amah ringtute tan chuan thilropui tak a tihsak thin” tih kha a inziak em kha ?
Suit dum ka ha a. He thil hi Bangalore awm lai atang daih tawha ka ‘inkhawm form’ ang reng deuhva ka neih a ni a. Ka necktie dum ka suih lai te chuan Chaltlang lam kawnga tlanchhoh nge tha anga, Bawngkawn lama kual tihte ka ngaihtuah nasa mai a. Ka zin bag atangin ka rosary duat lai chu ka phawrh a, ka kekawr ipteah ka ak a. Chetsual palh hlauh pawhin rosary ak ran chunga chetsual chu a zia deuh ang chu ka ti rilru a. A mak khawp mai, lirthei ka khalh ve dawn hian, rosary ka ah loh chuan ka ngaih a tha ngai miah lo. Ka puithu em em vang pawh a ni chuang lo..a, ka puithu deuh chu a niang, leh si a.
Kawngkhar ka kalh hnu chuan, helmet khai chungin in hnuaiah ka chhuk a. Bike khuhna chu ka han hawng a.Hunk a ni. A lian phian mai. Zep thu cheng suh; Ka zam ru takzet a ni. Hlauhthawnna te hian ngaihtuahna te hi a tichak duh pur pur khawp mai a. Chutia, bike khuhna hawnga ka han sawngbawl vel laite chuan ka rilruah Shillong, Happy Valley-a Khasi Bus ka tawh thut avanga ka bike khalh phu nasa lutuk ka tluk rikngawt lai te, Keifang Rora (rawra) herna khawl bul kawng kuala ka kual tur ka tlu ringawt maite kha a rawn lang zut zut a. Taxi lak zawk mai tur emawni chu aw ka ti rilru nauh nauh a. Mahse, a tlawmthlak ka ti ve ang reng bawk si. Bakah, Aizawl khawpui chhunga Bike han khalh ve pur pur mai chakna a rei tawh reng reng. A petrol tank-ah chuan a gear awmdan a inziak ka ring a, engmah a inziak hauh lo mai. Rilru a buai duh map map khawp mai.
Rulchawm lama kan thenawm nau, kekawrte hak nachang pawh hre lova tlan kual mai mai thin hote pawh khan Masi ruai theh tlai te pawh khan nula an phurh vawk vawk kha maw. Eng kan ti em bik lovang chu maw tiin, rit ti tak chungin ka nawrchhuak a. Ka thlenna Gate leh kawng pengthuam inkar chu kawng tetakte, chhuk zet mai hi a ni a. A nung chunga tlanthlak chi ni hian ka hre lova. A chhan chu hetiang bike hi ka la khalh ngai lova, a gear awmdan lah ka hre bawk si lo. Tihsual a hlauhawm.
Bike chungah chuan ka han thu ta a. A hma brake chu ka hmetbet tlat a. Chu mai pawh chu la duh tawk lovin, a hnung brake pawh ka rapbet tlat a. Thlan a tla phat phat mai. A ruka min lo thlir reng an awm leh awm loh enkual ka duh a. Mahse, han hawikual ngam chi ziazang ka ni lo. A hma brake ka hmehbeh tlat chu ka han thlah a, chutah, ka ke dinglam pawh ka ti kang riai riai a. Tlu miah lovin Sericulture Office kawt ka tlan thleng thla a. Han kual buai velna hun a awm thlawt lo. Bawngkawn lam panin ri miah lovin ka tlanthla ta pur pur a. A nuam fu mai.
Bawngkawn traffic post thlenthlak hma deuhvin ka tiding a. A hmeh nunna chu ka han hmet a, chutah a gear chu ka han tlawh a, a gear eng emaw berah chuan a lut ve chiang mai. Ramhlun North Petrol pump ka tlan pelh vel laite chuan eng gear hmang berin nge ka tlan ka hre lo hrim hrim a. Kawngkama lo thuho te pawh ka melh phei ve a. Lungphu erawh a la normal zat lo. Mi inkhawm reh lai a nih avangin motor tawk mang lovin ka tlan pur pur a. Kulikawn pawh ka thleng phei thuai a. Tumlawk sa angin Angie-te kawtah ka ding a. Ka ding chiang ngang mai. Darkar chanve laiin inkhawm tlai tawh mah ila, Cathedral chhova khalh chhoh tuma, atsona hun a awm tawh lo.
Angie te in bula bike ka hun dawn khan a sawt dut dut a. A thi ringawt a. Mahse, neutral-a dahlet ve dan chu ka thiam tlat. Ka rap ka rap a, a lut ve mai. Duh ang thlapa ka hun hnuah Biak In panin ka chhova. Rintea zaithiam te in bula ka chhoh lai te chuan thiante an ngaihawm rum rum mai. Anni awm ni sela, Biak In chhungah kan thu ran tawh ang a, heti em em hian rilru pawh a hah lo tur tiin, hmeichhe thudawn takin thu ka dawn kual vel a.
Khami ni-a Cathedral-a ka inkhawm tluk zeta rilru hah khan khawi Biak In mah ka la lawi ngai lo. Ka thlenna te In leh Sericulture Building inkara khalh chhoh dan tur ringawt kha ka ngaihtuah a. Ka hah a ni. Hei leh chen hi ka lo vakkual ve tawh a, Bike khalh ka la thiam lo em em mai kha a tlawmthlak hi ka ti a. Ka tlawm ngawih ngawih a ni ber mai. Tlawmna nun neih pawimawhzia te hi kan Puithiamte hian an sawi thin tak a, tlawmna nunpuitu, tlawm ngawih ngawih mai nih kha chu a va han hahthlak lawi si em! Inkhawm bana kan mizo super model Irene-i hmel hmuh te pawh kha a hahthlak letling thei nia.
Nilengin, haw lovin Chanmari-ah ka leng a. Tlaiah Shillong kan awm laia YWCA-a awm thin, nula hovin chaw an eikhawm a. Ka telve leh nghal a. Zanah, an haw darh sang sang a. Kan thiannu pakhat khan Venghlui-ah, an Ina lengah min sawm tlat a. College kan kalho laia an In kan hmuh kha an sak belh leh tawh a, hmuhpui ve ngei turin min duh a ni. Ka hreh khawp mai a. Hreh nachhan tam tak ka nei. Haw tlai chuan, kawngchhova talbuai palhin inkaihthawh vel a ngai dawn. Tin, kal ngei ngei ngaihna ka nei bawk a.
A tawp a tawpah chuan ka kal duhna hmunah min kalpui te te-a Venghluia kal kan relthlu a. At kan so ta takzet hi a ni ber mai. Zing atanga Bike hawlchhuak khan ka la hawpui ta hauh lova, inthlahrun a na riau tawh mai bawk si. Chanmari atanga kan inkhalhchhuak tur chu, kan thiannu leh a thianpa Scooty-ah an inphur a, keiin kan thiannu pakhat ka phur ve bawk a. Khatih lai tak kha chuan Scooty kha ka khalh chak zek zek zawk mai. A lian zawk ta na chu, “ Tlan hmasa r’u,” an ti a. Kan tlan hmasa ve ta ngei na a, Zarkawt pheiah min rawn lehpel a, Bazaar Bungkawn-ah phei chuan hmuh pawh kan hmu phak tawh lo. MLA Guest House-ah khan thiante khan min kalpui a, chutah, Venghlui panin kan tlanchhuak leh a. Venghlui kawng chhuk lutuk tak maiah khan tlanthlak chi rual ni-a ka hriat loh avangin, kawng dang a awm leh awm loh ka zawt a, Republic Veng atangin kan kual a. Khalam pawh kha ka duhaiin a la chhuk mah mah.
Venghluia kan len lai khan ka awm a nuam lo tluanchhuak zak. A tawp a tawpah haw ka huphurh thu kha ka sawichhuak a. Tlawmngaiin, an tlangvalin min khalhchhohsak a. A hnungah lungmuang takin ka thu a. Ka thiannu kha pakhatin scooty-in a phur chho bawk a. Khatih lai tak kha chuan ka nuih a za ve. Vawt tih vang ni pah fawma ka tiril khur reh hleithei lo pawh kha a reh tlat.
Khami zana Sericulture peng atanga a nawr ngata ka nawr chhoh thute leh, kawng zim chep leh chho ulh lutuk tak maia ka thleninpa, kei aia tawi daih zawkin hnehsawh zet maia a khalh chhoh laia ka ngaihsanzia te kha a kip a kawiin sawi vek dawn ta ila, ninawm lamah pawh a kal lek lek theiin ka ring. Vawiin thleng hian Hunk gear indawt dan ka la hre ta chuang hauh lo. Thil pahnih hriatchhuah erawh ka nei. Bike khalh hi, a thiam vak lo tan chuan a hahthlak em em mai a ni tih leh, an tunlai bike ho vel ai hi chuan Bajaj Scooter ngei mai hi khalh a nuam fe zawk a ni tih hi.
(PS : A thupuiah “Hunk ngat maw le” ka tih nachhan hi..a khalh a hahthlak ka tih em vang a ni a. Ka ngaihsan em em vang a ni hran law. Tin, a thupui atana han vuah mai tur ka hriat loh vang a ni bawk)
