Rosangzuala khan thlahrang a hre mak thei khawp mai. Stephen Hall-a kan awm lai khan zanreiah thlahrang leh zahmawh hian titi a luah nasa thei khawp mai a. A ruhlangin sawi ta rawt rawt ila. Heng topic hnihah hian a hre maksak apiangin lawm an hlawh thin.
Thlahrang a awm tak tak hi ka ring chiah lova. Mahse, ring lo hulhual erawh ka ni lo. Thlahrang hi ka hlau miah lo ti ila, dawt ka sawi tihna a ni bawk ang. Khawvel awmphung hi a mak em a. Kan hriatthiam phak loh tawp thil hi a tam em a. Awm palh thei a ni tlat. Mi thlahrang hmuh chanchin te hi ngaihthlak nuam ka ti a, hlau chung chung hian ka hrechak tlat ang lawi a. Keimah tak hi chuan thlahrang awm ang deuh hi hmuh pawh ka la hmu hauh lova. Ka thil hmuh chak zawng list-ah hian a lang lo hrim hrim bawk.
Kan tet deuh lai (han ti ve khanglang ila..hmm, a pawi lo, ka lian tawh fu alawm maw le) khan Pi Luti Thlahrang tih te, Pu Khupa Thlahrang tih te kha kan chhiar thin a. Lehkha chhiar hi ka tihmi ang reng avangin a chhiartu-ah ka tang thin a, thiante khan an ngaithla thap thin. Khang lehkhabu pahnihte kha Zochhumpuii Pa ziak an ni tain ka hria a; Zochhumpuii Pa hi tunge a nih ka hre hauh lova, thlahrang a sawi thiamdan leh a suangtuah hlauhawm thiam em avang hian mi dawihzep tak, thlahrang hlau tak ni turah ka dah ngawt a. Thlahrang hlauh te chu thil zahthlak a ni lem hleinem.
Stephen Hall-a kan awm laia an sawi thin pakhat ka hlauh em em chu : Pitar pakhat hi a thi a. A damloh lai atang tawha a thla miin an hmuh fo avangin, a han thih pawh chuan inriak an nei thahnem vak lo a ni awm e. Zankhat chu khawhar in riak zinga tlangval pakhat chu a muhil thei der lo mai a. A mu meng kar reng mai a. Zanlai ar a khuan thiai thiai lai chuan kawngkhar chu a rawn ri rak a, a rawn inhawng riai riai a, pitar thi hnu ngei mai chu a rawn lut ta a. Chu tlangval chuan hlauh namen lohvin a hlau a.
Tirila mur sung sung chung hian a rukin a lo thlir a. Chu pitar chuan, meichhemna thuk chu a pan a, thuk hmaah chuan a thu a, thuk mit tawh hnu chu a han chawk darh a, meiling vam la awm chhun ang ang chu a dawrh khum sat sat a. Tlangval chuan a rilruin, “ Vawt pawh chu a va han tiawm bawk ve maw le,” tiin a lo ngaihtuah a. Chutah, chu pitar chu a rawn hawi phei a, tlangval chu a rawn melh ta kar mai a. A thuthmun atang chuan rawn thovin, tlangval ke zawnah chuan a rawn ding a; chutah, a rawn kunhniam a, a hmai bul chenah hian “Ti bawk e,” a rawn ti a ni awm e. Chu tlangval chuan a hlau lutuk a, a kha te a chih tlat a, a thidang zui a ni awm e. He thlahrang an sawi hi ka theihnghilh thei lo. Ka hlauh pawl tak a ni a. Khawhar Ina riah te hi ak hreh phah nia !
Pakhat leh pawh, pitar thi bawk a ni a. He pitar pawh hi a thih hma deuh atangin a hrang a. A thih hma chawhma lamin khawlaiah hmu an awm nual a. A thih hnu hian inriak pawh an nei mumal vak lo a ni awm e. Lunglei ami niin an sawi a. Thudik a nih leh nih loh chu ka hre hauh lo. A riahpuitute zinga tlangval pakhat, a karleh lawka nupui nei tur chu, zankhat thimhlimah inthiar turin huan mawng lam deuhva Ek Inah chuan a zuk kal a. A inthiar zawh hmain, a hnunglam atangin a mawngah hian rawn hawlhtu awm hian a hria a, a han leh hawi chu, pitar thi tawh ngei mai kha a lo thu reng mai a ni an ti. A hlau lutuk chu mawng pawh sil lovin a tlanchhe chhova, a thianten an Inah an va thlah a. A nu leh pa inkarah a riak ta char char a, a khua te a sik a, a dam lo zui ta bawk niawmin an sawi a. Ek Ina ngaihtha taka thut laia mawng inhawlhsak pawh hi a nuihzatthlak vak lo tlat.
Thlahrang hi a awm tak tak lo mai thei a. Mahse, sawi tawh angin, awm thei a ni ve tlat bawk a. A pawng a paw taka rin loh viau hleihtheih leh awih loh viau hleihtheih hi a ni lovin ka hria. Thil mak tak tak, kan hriatthiam phak hauh loh hi a tam em mai. Kan nau pakhat sawi ang deuhivn, ” Thlahrang tih vel hi chu a awm a rinawm loh a, mahse, a lo awm palh hlauh khan…a buaithlak dawn tlat”.
PS: Thlahrang in hriat han sawi ve teh u lem.
April 20th, 2010 at 12:26 pm
Kei chu ka hrang lo 1st…. nakinah ka hrang ve ang
Report this comment
April 20th, 2010 at 12:30 pm
Shillong kan om ve lai pawm ban ti sei thei lar rapsss…
Report this comment
April 20th, 2010 at 12:37 pm
Kan naupan laiin thlahrang hi kan insawi thaih thin a, kan dawih phah a. Ka pa’n “E, thlahrangte chu a awm lo aniang, indona hmunah, mitthi tamna ah te pawh ka la hmu ngai lo, a hniak takngial pawh ka la hmu lo,” fiamthu deuh hian a ti a. Ka hlauh loh phah sawt! Hlauh tur dang a tam tehlul nen thlahrang leh zel hlauh in zirtir hi chu a retheih thlak emai!
Report this comment
April 20th, 2010 at 12:55 pm
Thlahrang hi ngaihnawm ka ti lutuk. Hmuh erawh ka la hmu ve chuang lo. Ka chhung hnai deuh zingah pawh hmu an la awm lovin ka hria. Chuti chung chuan mi sawi hi ka hre deuh reng. Awm tak tak chu a ang ka ti.
I ziah pawh hi ngaihnawm ka ti hlawm ngang mai. Comment zel turin a dang an hriat zel pawh ka beisei, a ngaihnawm ee.
Report this comment
April 20th, 2010 at 1:03 pm
Thlahrang..????? ka thil oihlo zinga 2nd ni ang.
Report this comment
April 20th, 2010 at 1:11 pm
Thlahrang lemah ka chang a, mi ka tih thaih nasa thin!
Khawharin riah chu hrehawm tih deuh chu ka nei ve tawh! Awrpuar kum 50daw’n puar tawh kha nalh duh vangin an zai tir a, a vein kha a khuh chat ta si a….
Riak zingah khan ka upa ber a, in senghawi leh bungrua senghawi velah khan tumah an kal tha ngam der lo! Thla chu kan hmu chuang lem lo a!
Report this comment
April 20th, 2010 at 1:16 pm
Fam dairial pawh chang ta la,i thla tal rawn hran tir rawh..tiin tunlai hian hla an sa vawng vawng nia.Tuai pakhat kha a thi a,heti deuh hian zuk hrang ve a..Hei ka rawn hrang a nia,a haiii lo ti ru lemmmm..!!
Report this comment
April 20th, 2010 at 1:21 pm
Ka chhiar ngam lo tih ka rawn in report ve mai mai
Report this comment
April 20th, 2010 at 1:23 pm
Hlauhawm dun hle mai a..pitar thi tawh hnuin ‘Ti bawk e’ han tih deuh sap chu a inhmeh lo angreng..
Report this comment
April 20th, 2010 at 1:24 pm
mi(sual) dawt com ah chuan Thlahrang aiin Virus a hlauhawm zawk
Report this comment
April 20th, 2010 at 1:43 pm
Kan naupan lai in pawnto haw hun vel hian insawithaih kan hrat thin khawp mai, a dawih fal deuh hi chu kan thlah leh nge nge thin…
Thlahrang hi a hmutu nih ai chuan an sawi ngaithla tu ah tang i la a tha daih zawk, hlauh vang em em pawh nilo in, hmuh hi a zahthlak ve hrim2 a….
Report this comment
April 20th, 2010 at 1:44 pm
rdchhangte dam maw? Tunlai chu ka rawn lengphei hleithei lo a.
Report this comment
April 20th, 2010 at 1:49 pm
Bantisei thei = Kusumbini ? Manipur lam thlahrang niin ka hria !?
Report this comment
April 20th, 2010 at 1:53 pm
Tumkhat chu kan khawhar in riahna ah zanlai tak maiah hian Archhiar a ar ho an hram nawk nawk mai a..a upa ber kani bawka kava thlithlai ange katia..kawngkhawr kava hawng chu Archhiar bulah hian Pitar pakhat hi puana inkhuh dat hian alo tap kiang kiang mai a..ka tim uaih uaih a kei pawh chu..hlau deuh chung chung chuan kava hnaih hret hret a..kan riahpui pitar chu lo lek in….Pu Rama’n a tia lawm..
Report this comment
April 20th, 2010 at 2:01 pm
Ramhuai hi chu ka awih ….Thlahrang hi chu ka awihvak lo…ka awihloh thil ka hlau ngawt bawk lo…
Report this comment
April 20th, 2010 at 2:26 pm
thlahrang dang han sawi zel teh u, a ngaihnawm tlat
Report this comment
April 20th, 2010 at 2:32 pm
Vawikhat pawh khawhar In kan riahnaah, khua a chhe ang reng a, chhumte a zing deuh chuk nen zan dar 11:40 vel a ni awm e; In riakho kan mu fel chiah tihin Ceiling Fan a rawn vir ta vut vut mai, kan han enchiang chu THLAHRANG hi a lo ni a!! :sad:
Report this comment
April 20th, 2010 at 2:43 pm
Eng emaw ni thla mihring ni chiah lo chu an awm ngeiin ka rin tum thum lai chu ka tawng tawh an hran em em pawh ka hre lem lo.
87 kum khan Ghty reserve police damdawiin building pakhat ah assamise pakhat nen kan awm dun a hlau a mu lo zankhua min kaitho sek a tukah ward pangnai ah khum ol a awm a min in sawn san insawn turin min ti ka duh lo.Keimah chuah in zan khat ka riak pu Hminga A P SI in ah tlaichaw ka ei ka leng ngha dar9 ah ka hawng khum ah ka mu a .
Eng eng emaw thawm ka hria sazu mi mai turah ka ngai.Zingah chowkidar in min rawn kai tho zan ah engtin nge i luh kawngkhar tal in ka kalh si a zan ah i awm si lova a ti a .Kei in min kalh khum anih chu ka mut hnuah ka ti a Mak a ti rap .Ward a mi ten ngangmah chiah in maw i riah i van hlaulo ve min ti min zawt hluai mai.Ward ah min sawn nghal hmiah
Report this comment
April 20th, 2010 at 4:01 pm
Ti ve bawk e :lol: A va hlauhawm duh awm ve.
Heipawh thlahrang :evil: :twisted:
Report this comment
April 20th, 2010 at 4:59 pm
Kum tir lam a pakhat boral chu a cell phone an ken tel tir ani awm e. :?: :idea:
+919436140188 hi Mizoram a zan dar 12 vel-ah biak han tum chhin teh u, a ngam chuan :twisted:
Report this comment
April 20th, 2010 at 5:32 pm
Hau…. :evil:
Report this comment
April 20th, 2010 at 6:30 pm
@Diktea_Pa, Heti zawng hian maw tan kan lak dawn a???
Report this comment
April 20th, 2010 at 6:31 pm
Stephen Hall chu lung a va tileng ve le, 1971 khan ka thian pathumte nen kan riak ve bam tawh a. Thlahrang chanchin tho kan sawi.
Union Christian College-a High Hall-a ka khawsak laiin Room No. 13 a hrang thinin an sawi a. Tuman an luah ngam ngai lo va. A chhak tlanga WWII hun laia Japanese pilot nula thlahrang nen an sawi kawp fo thin.
Tichuan le, Shillong-ah Dracula Fang (ha ui-ngho lem) hi ka lei a. Zanlaiah Room No. 13-ah chuan Dracula Fang chu ka invuah sauh sauh va, kombol dum zum mai hian ka inkhuh hlun mai a. Thawm ka nei ta thin a. Tukverh darthlalangte ka tiri kurh kurh thin a. Min rawn entute kha ka lo trhen khum a. Mi dawihzep an lo tam thei khawp asin. Atukah chuan an sawi thlahrang nasa khawp a, an titi ngaihnawm deuh deuh ka ngaithla leh vel mai mai thin. Huai takin rawn prove ngam awm sela chuan, an sawi thlarang zui vak hlei lo’ng e!
Union Christian College sawi kai tak rau rauvah chuan, Umiam Dike an tih, UCC penna kawng a ni a. Motor kawng zawh chuan Km 8 lai a ngai si a. Tlangdung Umbir khaw panna lam atang chuan shortcut a tam a. Mahse, thlanmual kal pelh ngei ngei a ngai thung a. Kei hian phawk ka chhuah fo. Thiante zana thlanmuala an kal hi ka lo barakhaih thin bawk a. Rinna chak dawihzep tak tak hi ka tawng hnem khawp mai!
Manipur lama mi Custer KC Zaua an tih phei chuan Skit hi a buatsaih peih bawk a. A drama hian an chang zui zel mai a ni awm e. UCC Campus luh dawn tepah WOODEN BRIDGE awm chu A HRANG E tiin, skit ngaihnawm deuh a ziak a. Vawiin thlengin Wooden Bridge zawna zana kal reng rengte HRANG turah an ngai tlat tawh asin le … dawihzep poh leh thlahrang chanchin hian hmulthi a tiding duh ting mai a lo ni awm e.
Report this comment
April 20th, 2010 at 6:39 pm
Khai aw..chawnghilh UCC chhuak maw i lo nih reng a??
Keini Shillong awm ve lai chu hmanni lawk a ni a. Nangni ho awm lai chuan mizo pawh in la tlem deuh ang a(?) 1971 vel chuan Anthonys-ah mizo tute nge zir a ?
Report this comment
April 20th, 2010 at 7:17 pm
Gujarat-a Ahmedabad-ah tumkhat chu Bungalow changkang ru deuh mai, hlui tawh angreng tak, uluk tak leh fai hnum zet maia an la enkawl nisi, British hunlaia Sapho style deuh taka sakah hian keimah chauhvin ka riak tawh a. Mut Pindan zau fe fe 5 bakah Lounge leh Dining Room-a nei a. A pindan a zau hlawm sia, ceiling lah chu a sang vu hlawm mai a — midang tumah thleng ve awm ta lo chu, a awmna a fal deuh bawk avangin zanah phei chuan a reh thei rura. A bulah bung lian zet mai hi a la ding zui bawk a! A piah thlang deuhvah chuan Caretaker Quarters-a awm naa, kan inhlat deuh si avangin thawm a inhriatphak vak lova.
Seminar buatsaih tuten accomodation chungchangah chumi bungalow bakah hotel hrang hrang thlalak rawn thawn tel thlap chungin a hma daihin kan thlen duhna min rawn zawt vek a. Chu bungalow thlalak mawi deuh mai chuan min hip bawk nen, kei chuan chuta thlen ka duh thu ka zuk hriattir a. Mahse, vaiho chuan hotel-a thlen an tum vek chu lo niin, chu in hluiah chuan keimah chauhvin zan 4 ka riak ta a ni.
Mak deuh mai chu ka mut dawn apiangin hlauhna hian min tibuai ziah! Mahse, ka tawngtai a — ka muhil mai thin a.
Kan Seminar zawh hnu, Airport pana kan tlan laiin driver chuan chu in chanchin chu min hrilh ta nual a, ‘Inhrang’ tia an lo sawi ruk thin lo niin! Ka hlau leh hnuhnawh khawp mai— ka zep love!
Report this comment
April 20th, 2010 at 7:18 pm
Thlahrang an tih proof ka tumna lamah Thingsul Tlangnuam ah khian min vuakhlum an tum tawh a… ka thinrim hi a ala reh em em lo khawp mai, an hlau em em a, ka awihlo fiah ka tum a, “vaw hlum ru,” an tia min la um ang dul dul a.
Report this comment
April 20th, 2010 at 7:35 pm
Chhimlam khawpakhat IB-ah kan riak a, zanlaiah ka zun a chhuak a, zunin kawngka ka hai khan ka zinpui kan Pu Room kawngka kan sawi nghek mai a! Tunge?? a ti chul mai maw le. Ka zunzawh chuan ka mu leh mai a!!
A tuk zing kan han tho chu a hlau kha a lo mu reng reng lo mai a! Kawngtluanin motorah a mu thung a!
IB reng reng hi hrang deuh vek a sawi an ni tlangpui!
Report this comment
April 20th, 2010 at 7:44 pm
Thlahrang ni lo Thla-ai hi a hretu sawi kan sawi chhawng ve mai mai ange.
Mizoram hmarlam khawpakhatah hian thimhlim unau hmel hai velah hian an khaw Pasaltha huaisen in kha thla-ai hian a rawn vir sek mai a. A kui hlurh hlurh mai si a, a chang leh dai lamah reseve ngaw chhungah a thawm a, a chang leh kawm char anthur kungahte khan a fu ang lawi a.
Ka ni lengtul deuh hian tapchhakah min kuah khawm a! Amah lah kha a hlau berah atang a, a khur a khur mai a. Chutah kapa’n aw a rawn thian a, a thawm kan han hria chu kan zuang chhuak sap sap mai a. Ka pa kan han hrilh chu a va han pawi em Pu XXXXa thla ngei a nih chu! Tun lawk khan a chatthla a sin. Ka lo awm lo chu aw…. a ti a, a insawh a insawh mai a tiin.
A hlauta’n chuan hlauhawm, hlau lo tan lah chuti hlauh!
Report this comment
April 20th, 2010 at 7:45 pm
“a hrang” an tih hmun hi a interesting ka ti. Thalhrang ai chuan “uite” pawh ka hlau feeee
Report this comment
April 20th, 2010 at 7:55 pm
@tetea7: Lengpui khuaah khuan Pitar pakhat hi a thi a, a lumen zan khan Petromax khanchhuka khai kha muangchangin chhuatah a innghatthla ringawt a sin. Chutiang chuan tum 2/3
chu mantle tla miah loin chhuatah a in hung leh ringawt thin.
“Valhanga” kha’n a hrechiang!
Report this comment
April 20th, 2010 at 8:16 pm
@BMW : Mizo thlahrang a lawm kan sawi, Germanah an rawn kal pha lovang!
Report this comment
April 20th, 2010 at 8:18 pm
misual zingah Chanmari west kan awm em aw?
Report this comment
April 20th, 2010 at 8:26 pm
Awm loh paw’n Chanmari ho paw’n an hre tho ang. Pu Chung(RIP) V.C hlun thin khan tumkhat chu Zanlawn ramah a sa chan chanchin min hrilh a!
“Khua a tlai lam tawh a, ka sa chan a rawn chhuak tep tawh ang chu tih lai tak hian ka channa bul lawkah hian Palianpui dum thel thul hi a rawn ding zuar mai a! Tunge i nih in sawi rawh i insawi loh chuan ka kap dawn che a nia ka ti a” a ti a
A ding ngawi run mai a, ka silai cheng ka kau a, ka kap dawn che a nia kan ti leh chu a per nulh a a bo ta daih mai a. A dinna bul a hnah chu ka va chhawk chhin a, 10′ vel a niang a ti.
Report this comment
April 20th, 2010 at 8:54 pm
Kan naupan lai paw’n EVIL DEAD lar rap mai mawle…phu zawk zawk in kan en thin.
Pu Aia pawh kha a hrang ve reng..Aihranga ani miau sia…chutiangvel chu ala ni hrih e ka ngaih dan..ka hriat te a sei thei hlawm sia ninawm palh e..lan khek teh ang.
Report this comment
April 20th, 2010 at 9:03 pm
Horror movies ho pawh hi..a hmuhnawm chu ka tia, mahse, ka en tha peih em em lo.
Thlahrang hi, a mak ka tih ve mai mai nachhan chu, hnamtin hian an lo nei vek mai a. Thil awm lo hi chu a awm lo a ni tawp mai a, sawi sawi thu a awm lova. Zawhte zai thei te pawh a awm lova, tuman an sawi an sawi lo.
When there is nothing; there is nothing.
lolz
Report this comment
April 20th, 2010 at 9:04 pm
Evil Dead hahahahah, a lo chhuah tirh khan pu Hauva (Hau hausaa ) te inah kan en a, an hlau hlawm mai mai mahse, kha a hun lai chuan phut zawk zawkna a tam ve anih kha mawle.
Ui ka hlau zawk hrim hrim thlahrang ai chuan.
Report this comment
April 20th, 2010 at 9:13 pm
Ui hi a sa tuina hi katan chuan a hlutna ani mai..Khatla South kawng zimte ah khan tu ui berin nge min seh takngial dawnin ka hria a,ke a kal kan tlan tak tak mai chu(h) kawi hnih thlengvel hnuah tuten emaw anlo dang a..hui ham,ka hah..ka zak,ka thinrim bawk..Sawirawkherh ken thinlai nise puak pawpin ka perh ang.
Report this comment
April 21st, 2010 at 12:59 am
@Diktea_Pa: i comment ka duh lutuk, copy right awm em?
Lunglei lama ka pu kha la dam ve se aw!! THLAHRANG te chu hlauhloh teh lul nen. Tar chaklolam mah ni se motor remchang hmu miau hek lo le,Tlai ni tlak rual vel in serkawn atangin pukpui khuaah kein a haw phei a, Unauhmelhai vel ah chuan a thleng thui ve tawh fu, Hlauh nei hek lo; mite hmun tih, ahma thla lawk a haulawng MST bus accident a mitam tak an thihna hmun, la pe thla vek vuk zawnah te chuan zunram ala thiar ta deuh deuh a!
Vanneih a siamin serkawn lam atangin motor light ni awm tak rawn de chho pap pap a, Atak a rawn lang chiah chu(h),maruti car hi alo ni a, hahdam taka in thlen theih inbeiseiin kawng sir atang chuan ka pu chuan a ban alo phar tak ang lawm lawm a, chutah le, car chu rawn rum chho ham ham a, ka pu zawn a rawn thlen chhoh chuan le …. fuaaaaaaaa!!!!!!!!
ka pu hrilhhai leh beidawng tihngaihna hrelo chuan, a ban la vai lauh lauh pah hian “Ka ni loooooooooooo” tiin ala au zui tak lawm lawm a. kha driver polite lo lutuk kha chu awwwwwwwwwwwww… putar chaklo, khaw kar kawng leh nghal a ke a kal te chu han phurh ve mai awm……..
Report this comment
April 21st, 2010 at 7:26 am
Dik chiah. Thlahrang putar pawh nise. Putar hrim2 anih chun phur ve mai se. NH(Nui hiaus)
Report this comment
April 21st, 2010 at 9:28 am
Hmana ka thlahrang hriat chhun hi ka han sawi nawn leh ang e: Tlangval pakhat nula rim kha a lo tui fal deuh a, haw tlai tawh naka laiin thlanmual kal tlang a ngai zui. Thla ral lam eng deuh ruai chu chhumin a hliah leh zoh zoh thin na a, kalkawng chu a hmuh theih riai ruai tho va.Hlau leh khur tak meuhin thlanmual chu a kal tan ta a. Chutih lai chuan tuemaw lung chher ri kauh kauh hi a hre ta a, a thaw huai. Chu pa lung chher awmna zawn chu a pan phei a, hlau tawh lo reng reng. “Ka pu, engtia a zana zana lung chu i kher tak kauh kauh mai le?” a va ti a. Chu putar chuan, “A eng dang ni lo ve. Ka thlan lunga ka hming spelling hi an ti dik lo va, ka han siam tha a lawm maw le”, tih pah chuan a lam a rawn hawi ta heu mai ….!!!
Report this comment
April 21st, 2010 at 10:48 am
@kawlhawk nizan chu i hrang ta em?
Report this comment
April 21st, 2010 at 7:01 pm
Hman deuhah khan serchhipah ZUNHINDAWT a lar thei lutuk, a kuttin a eng thei an ti lehnghal, mahse ka hmu ve lem hlei lo a. Amah pawh tun thlengin a la dam. Kan naupan lai a ni bawk a, zan reia mi ina tv en kan haw te hi zun inah kan zun ngamloh phah thin.
Report this comment
April 21st, 2010 at 7:03 pm
Zunhindawt hi ramhuai rau rau ah chuan a thil tih hi a thing bik ngawt chuan ka hria :lol:
Report this comment
April 21st, 2010 at 7:26 pm
kan vengah pawh damlai thla nei Pitar a awm thina, mahse a thih hnu kha chuan a damlaithla pawh chu a reh ve mai. an sawi nasa thei khawpmai, amah pawh a inzep chuanglo..
vawikhat chu an thenawmte ar alo khawiha, an thenawmnu U XXXX i kan timai thina, chuan kan inbula i rawn awm atangin kan ar te khawih i chinga.. ilo khawih leh chuan ka man che nga ka sawisa hrep tawh ang che.. tiin a vau a, chu pitar chuan, “min man hman awmlo emai a, i chawnah ka man animai” te ati vel. tak tak ania, zawhte anga inlar in mi ar khawih te a ching ani awme..
kan kawmthlang lam putar pakhat hian damlai thla a nei tawh bawka, sawi pawh a sawi tha vak duhlo amah pheichuan, an ina a mut lai tehian a len na thin ten a khawlai leng vel an hmuh thu hi an sawi thina.. mahse amah khan damlai thla nei nih kha a duhlo em bawk vang animaitheia, a hnu chuan a reh ve leh mai, ati.
Report this comment
April 21st, 2010 at 8:20 pm
@ruata, i thlahrang chanchin sawi khi ka awih ber mai! Ka nui nasa lutuk, pum na urh khawpin.
Report this comment
April 29th, 2010 at 1:39 pm
Diktea_Pa comment, kuang chhunga mobile phone daha phum tel khi, a va han ‘den triah triah ve le. A lo missed call vel ang e.
Report this comment