A chunga tlan chu a nuam pur pur khawp mai – World Bank kawng chu. Aizawl atanga Lunglei darkar 5 lek chhunga tlan thlen theih chu nuam ve tak a ni !! 71 km ngawtin kawng a tawi phah tlat alawm !
Information & Public Relations Deputy Director David L Thangliana leh Mizoram State Roads (World Bank Funded) Project Director K. Lalsawmvela te hnungzuiin MJA President leh member 11 te chu kawng en turin April 20-21 khan kan thawkchhuak a. He kawng kan tlawh dawn atang hian boruak eng emaw neuh neuh kan tawk a, tlawmngai pawl lam atangin duhkhawp lohna a ri a, Lunglei pawhin nasa taka lo zir tawhin a kawng chu Chhim lamah a zuih deuh ni tein an lo sawi tawh bawk a.
Aizawl kan chhuah hma hauh atangin Haulawng bula Tlawng lei dawh chungchangah phone call kan dawng chamchi a, Thenzawl ah phei chuan khawtlang hruaitute’n min chang tihte hre lawk chungin Lunglei panin Aizawl kan chhuahsan a.
A kawng zim leh zau thuah chuan a changin Aizawl hnaih lamah a zim deuh leh a arh lai deuh a awm tein kan hria a, a changin Lunglei hnaih lamah Hmar lam aiin a zim zawk tein kan hmu a, a chang leh ‘helai chu a zau deuh’ te kan ti thul. Motor khata chuang theuh theuh kan hmuh zim leh zau dan a in ang lo nuai mai a, a thlirtu mit azir te pawh a ni mahna.
He kawng hi March 2002 atang khan tan niin Aizawl-Thenzawl-Buangpui (100 kms) chu Bhagheeratha Engineeering Ltd leh Ashoka Builders te kutah dah an ni a, June 15, 2005 khan tihtawpsak an ni a, tunah hian court-ah thubuai a kal mek a ni.
World Bank kawng hi Aizawl-Hmuifang inkar (52 kms), Hmuifang-Buangpui (52-100kms), Buangpui-Lunglei (100-168 km) then niin a tlangpuiin zawh lam an hnaih deuh vek tawh a, December thla chhung hian inpeihfel hman an inbeisei.
Sheelaida leh contractor ho: World Bank kawng siam that hna viltu Sheelaida Associates chuan contractor te an vil hneh loh thu Lunglei chanchinbumite an lo hrilh tawh. Sheelaida ho sawi hi kei chuan ka pawm lo. Vil hna an thawk ngam a nih chuan hneh takin an vil tur ‘a ni zi ri thawh’ mai a ni. Phatna tur a awm lo. Chutih rualin Contractor te hian sub-contractor te an han pe chhawng leh a, Pukpui kan thlen hma deuhin kawngthlangah lung an lo rem a, rem tur an tih dan ang chuan an rem lo chiang kher mai.
Contractor te’n an sub contractor te hi enga ti nge an vil hneh loh tih chu zawhna lian tak a ni ta. Motor atangin kan chhuk a, lungrem chu a awna rem tur a nih laiin a ngilin an rem a lo ni a, chu a chhapah lung chang tha hmang lovin lung no buang thuk mai an chawhpawlh a, lung inlen hleih zawng pawh intiat hek suh. Thlalak mai loh chu tih tur kan nei lo, kan inphawk chiang em a ni. Vawi khat tlan tlang puat pawha hetiang ang hi a awm a nih chuan hmun dangah engzah tak awm ang maw? tiin rilru a vak nghal a. ‘Keimahni kawng ngei pawh a leilung fate’n kan chanpual ve chinah heti hian kan sawisa duh ania’ tih chu ngaihtuahnaah a cham lo thei lo.
Contractor ho hi vil hna thawktu lam hian an vil hneh tur a ni a, contractor pawhin a sub-contractor te a vil hneh tur a ni bawk. Kristian ramah phei chuan vil ngai lova hnathawk tur ni zawk awm tak !!
‘Ka hre teh mai a nia’ : Sawi hlawh tak mai Tlawng lei kan thleng a, he lei hi ZDU lam te pawhin an lo enfiah tawh kha a ni a. Tunhnai deuh khan lei elasticated bearing (bearing han tih hian TMB bearing rilruah a lang a, tuna bearing an hman hi lei nghawr dawltu shock absorber ang a ni e) pakhat chu chhiain chu chuan bearing dang pawh a tihchhiat phah nia sawi a ni. Bearing chhiat vang hian lei hi tlem a che a, chu chuan dirt wall (bridge foundation a lei tla tur daidanna bang) chu a nek pawp a, motor erawh an tlan reng tho.
“Hei vang hian lei (bridge) foundation a chhiat phah lova, foundation a lei tla tur vengtu a nek pawp mai a ni. Tunah hian siamthat hna kan bei mek a, May thla chhung chuan zawh hman kan inbeisei” tiin Er. Sawmvela chuan a sawifiah a. Hetih lai tak hian kan kal tur hre lawkin khaw pakhat atangin an khawtlang hruaitute chuan min rawn nangching a. Kan engineer hotupain hrilhfiah ngial a tum pawhin ‘Hetiang hi chu ka hre teh mai a nia..’ tiin pakhat chuan bul a han tan phawt a, lungrem a eizawng a nih thu a sawi bawk.
Tlawng leiin heti taka ngaihven a hlawh hi a lawmawm a, hna tha lo a awm a nih chuan bengchhen deuh te pawh a tul mahna. Ngaihtuah zui atan hei hi ka’n chhawp ve mai mai. Engati nge heti taka boruak siam tumna hi a awm? Tu emaw hna hmuh beisei hmu ta si lo tal hiar thawm a ni em? Politik-a inchirh thehna a ni thei em?
Elasticated bearing chhiat chhan hi hnathawktu lam chuan manufacturing defect ah an puh a, a awm zauh zauh an ti. “Tlawng leia hman tura a ruala kan lak Chite a kan hman mekah pawh harsatna kan nei lo” tiin Er. Sawmvela chuan a sawifiah ve thung a. He bearing chhiat chhan hi chhui zui ngai tak a ni a, a contract-tu Road Builder Malaysia (RBM) lam hian kan mamawh tak bearing min pe em? tih zawhna a awm a. Lei hi tonne 450 rit a ni a chumi zo lovin a chhe ta a ni thei.
A contract-tu hian min bumin tonne 300/250 chauh shock la thei min lei tir em ni ang? A leitu lam chuan tonne 450 emaw 350 zo tur a ni ngei em tih finfiahna hmanrua an neih loh thu an sawi bawk a ni. Bearing hi warranty awm ngei turah ngai ila, a la nung a nih chuan a danga min thlaksak pawh kan leina te mawhphurhna a ni. Bearing chungchang hi chu sawrkar lam pawhin chhuichhuakin mipui te a chhan dik tak min hrilh sela a duhawm khawp mai.
Chawhchawrawi: Kawng a zau a, lirthei pawh an tlan chak, kawng thlang a sang sia tlak dal hmun tam takah dah a ni a, thir tlawn rinawm tak tak kilh khawm a ni . Hmun thenkhatah a kilhna kim lo a awm zauh a, hei hian a structure a tihchak loh phah ngei dawn a, motor tlan liam tur a dang ngut emaw?
A enga pawh chu nise harsatna tam tak karah kawngpui tha tak kan nei thei tur hi a lawmawm a, a hunah an peih hman ang em? tiin kan thlir thup a nih hi.
WORLD BANK FACTS
- Aizawl-Hmuifang inkar (52 kms),- Valeecha Eng. Ltd. 94% zo tawh
- Hmuifang-Buangpui (52-100kms), Tantia Construction Ltd. Zo tawh
- Buangpui- Lunglei (100-168 km), & Aizawl by pass (13.5) Road Builder Malaysia leh Tantia Construction Ltd. 90% zo tawh. Tunah RBM an tel tawh lo.
- Aizawl- Lunglei inkar km 71 in a tawi phah.
- Thenzawl chuan Thenzawl Road Progressive Committee an din a. Accident hlauhawm na lai nia an hriat Project director hnenah thlenin tihthlawhtlin tum a ni.
- Kawng hi layer 4 a siam a ni a, black top tur chu 30 mm a chhah a ni.
- Kawng siamna tur material duhthusam awm loh vangte, diesel tlakchham vangtein hna a muang.
- Traffic tihtawp theih a ni lova hna a muang.
- Ruahsurin hnathawh a tibuai, khawchin hriat a ni lo.
- Mimal ram buai vangin hun khawhral a ni.
