Dt 5.6.2010 chu tuk dang an bawkin a lo her chhuak leh a. Fur ruahtui haw tur chhum inchhek khawm tam tak karah chhaktiang kawla ni chhuak tur de re re chuan chumi nia thil lo thleng tur chu a hre ve hauh lo na a; keini chhimkuna cheng, thenkhat tan chuan kawlvalenchham kara leng, van khuh phak piah lama khawsa, Lunglei mi(sual) rualte tan chuan ni dangdai tak a lo her chhuak dawn tih kan hria a, kan hlimin kan phur suah suah khawp mai.
Tu hriatpui hauh lohvin chumi nia kan programme tur te suangtuah lawkin ka nui leh vur vur thin. Zing kar atangin member te kan in sms a, kan in be tawn reng bawk a, misual.com avang hian mobile bill a san phah sawt anih pawhin a mak hauh lovang le.
Khua in zah a ngai a, zing lama khaw dur pawhin kian lam a pan hlauh mai. Kawlhawka’n ar a rawn thawn ani tih ka min rawn hrilh chuh…. hnuk a ulh thei mai dawn alawm maw le. Keini ang a duang, thu lak tlak loh tak tak leh thu nepnawi te te hmanga ka comment ve thinna te avanga min lo ralkhat hmelhriattu, Kawlhawka a va zahawm in ava tilawmawm tehlul em. Kawlhawka chungah Lunglei misual te kan lawm takmeuh a, kan lawm zia hi thu in kan sawi bang thei ngai lovang. Kawlhawk, ngalfimin leh tar khup bihin dam mawlh ang che.
Chaw ei kham ah Mama_B in min lo call a, 11:00 am vela inpeih ngei ngei turin thu min pe. Dar 11:00 am a ni a, Mama_B chuan min rawn phone a, sarep a lei teuh tawh thu min hrilh a, bazaar satalh dawr kawtah lo awm turin thu min pe zui bawk a. Tin, ngaiteh heti hi a ni a, a rang a rangin ka thutna atangin ka zuang thova, ka insiam mawlh mawlh a, bazaar lam panin ka tlan chho. Vanduaithlak takin kan duh ber UI SA lei tur a lo awm tawh reng reng lo mai.
Rang takin kan tlangval mawngzang Saitawka, a bike nen uisa lei tur zawngin a tlan chhuak nghal, a va hmu zo ta chuang si lo. Kan va hrilhhai teh reng em. Vawksa rep kan lei belh teuh a, a hranpa ngatin vawksa kawchhung kan lei bawk a, arsa pawh kan lei belh tho (mikhual dawl tur, eg. mzvision, kawlri, shailendra, etc. kan neih ngei kan rin vangin kan lei duham hle a ni).
Saitawka ka tihder a, “Tunah Serkawn panin kan chho dawn mek a, uisa lei tur i hmu zo ngang lo anih si chuan lo han chho hmasa ta che, kan inpeih thawkhat tawh a, tichuan keini pawh kan lo thleng chho ve nghal a ni mai,†ka ti a. Keini lah kan la bazaar tan dawn chauh a ni reng si a. Hrilhhai takin a lo han hawi lawl lawl ani awm e. A pawi lo, nula rual zinga tal chu ‘a til thenna lam’ pang tak a ni tih tuman kan hai hleinem.
Mama_B hian chawhmeh lei tur ava lo hre bik ve maw le. A tul a ni tih pawh ka hriat loh thil kan lei teuh asin le. Keimah chuan bazaar ta ila, Sa ka lei teuh ang a, a bak chu antam a ni tawp mai. Mama_B te ang misual member kan nei hi keini ho tan vanneihna a lo ni lehzel a. Tih leh hunah pawh kan ei tui dawn tih ka hre sa vek. Thil chi hrang hrang kan lei teuh a, rit hnawk tham a ni. Tichuan Mama car in Serkawn lam kan pan ta a.
Reilo te ah kan pu ber Muantea pawh chhun pachangah kawlhawka ar rawn thawn khai chungin a rawn thim lut hmuk hmuk mai a, a lo luh lai hian a nui a, a ha a var nalh asin aw. Nui lo se chuan a rawn lut a ni tih pawh kan hre kher lovang. Saitawka khan ar a talh dawn emaw ka tia, thla te a lakpui vel a, keiman ka talh leh tho a ngai si a. A tawk fair lo khawp mai. Saitawka, X-man leh kei Vanlal-caribou te’n kan puah ta a.
Sawi hmaih chi a ni lo, kan misual lalnu Jinx leh mifel nula te thingpui siam tui zia kha, khatiang anga thingpui tui kha chu dawrah in ta ila, no khat cheng sawmhnih man vel anih ka ring hial asin. Hmeltha si, zei si, nui mawi si, tawngkam thlum thei si, nelawm si, lehkhathiam ni tho bawk si, thingpui siam thiam si, eirawng bawl thiam tho bawk si…… ka sawi seng lo, si sang sawm an ni ber e. Lo kal ve the u, belhchian an dawl a nia. En thuak a tha thuak, en cheuh cheuh va tha cheuh cheuh, ngaihzawn atana tha, nupui atana duhthusam an ni.
Eirawngbawl lam hi Mama_B chem kalna lam tak anih avangin kei chuan ka khawihpui ngam ngang lo. Diktea_Pa, Ku Muanga, Kawnga leh Tlau te pawh an rawn thleng chho. Tunah zet chuan kan kim ta. Kan inchibai sap sap a, kan infiam zui bawrh bawrh a, a innel zual an lo inbawl zui nen. Boruak a zang haih a, kan hlim tlang a, kan nui a, kan ri chel chul mai.
He mi ni hian khua a duai hle a, chhum a zing nasa in khua pawh thlir ila a hmuh thui theih meuh loh. Chhumleivakin kan MI na hmun a bawh chuk chuk reng a. A hnu ah phei chuan ruah a sur chiam nghe nghe. Electric current a tawp deuh reng a, chu mai bakah min runluih niawm fahranin internet connection a tawp hmak hmak bawk si. Khua a var lo asin aw. GPRS atangin engtin tin emaw ka online thei hram hram a, a chang leh Jinx laptop atangin TATA Photon hmangin kan in online chhawk zeuh zeuh bawk.
Heng kan harsatna te hian kan hlimna a tibuai pha eih lo. Guiter nen zai kan tan a, zai a tui duh hluah hluah khawp mai. MI nia kan hla sak tur thenkhat chu a hmain kan lo post tawh kha. Chhuatpui rem mam lai ah, Run mawi, Zoram ngaih hla, Lelte nunnem, etc, a… a tam mai, kan zai, kan nawn tlut tlut mai. Hetia kan zai tui vanglai tak hian kan video cameraman Ditea_Pa te a ruka an lo inthiarfihlim daih erawh kha chu ka ui mang e aw.
Kan zai tui lutuk a, chaw ei zai rel thei reng ka awm lo erawh hi chu sawi hmaih chi a ni lo. Vawi eng zat nge chawhmeh kha kan chhuanlum hman pawh ka hre lo va. Kawlhawka’n min lo phone a, ani khan kan hlim leh hlim loh chu phone atang ringawt pawh khan a hre thei ang chu. Chutah beisei phak hauh lohvin khawvel lehlam atangin Pu HV-a’n a rawn phone hlauh mai. HV-a leh Kawlhawk-a ten min ngaihven zia kan hria a, kan va lawm tak em. Admin te khan engah nge an lo phone ve loh?
Kan banner tur hi Ku Muanga, Saitawk leh Diktea_Pa ten vawi tam tak an design chhin a, tichuan MI nia kan hman tak banner kha kan duh tlan ber leh misual.com originality phawk chhuak thei ber tura ngaih anih avangin lungsi takin kan pawm tlang. An hahpui ve em em ani tih kan hria a, kan hlut khawp mai.
Chaw ei hma in self introduction hlimawm tak kan nei leh phawt a, chumi hnu ah kan hmuipuipu, Muantea’ hunserh a hmang a. Chutah le… a hun a lo thleng ta, misual.com avanga chawhlui ruai ropui tak mai chu theh darh a ni ta. Kawlhawk arsa bawp chan loh ka hlauh luat vanga chaw dawh hmasa ber dawttu ka nih thu hi zak hauh lovin ka han puang tel kher ang e. Arsa ka suak ngheng a, chutah vawksa ka suak leh ngheng a, satui ka la leh a, iskut chhum ka lak leh meuh chuan ka thleng chu, midang sem then ve tur niawm khawpa nasa in a vum tawh a. Chutah saisa bawl suah tur a la awm cheu. Salad dahna tur pawh a buaithlak lek lek mai. Hmmmmm….. ava tui mai mai e aw. Ei chin tawk pawh ka hre lo. Mama_B leh a thuihhruai te dam reng rawh se. Ei siam thiam number one in ni chiang e.
Chaw ei kham ah erawh kan puar tlang a ni ang dul zutin kan thu hle hle mai. Titi pawh a la kal hlei thei lo. Chutah le, ei lam a tawp tawh emaw tih laiin pudding an rawn sem leh ta. A tui em em mai leh nghal a. Ei leh in lam hi chu kan hnianghnar chiang alawm. Chaw eikham hnu darkar chanve vel a liam leh meuh chuan titi a kal leh tan ta a. Chutah Mama_B a rawn che chhuak ve ta. Guiter a kuah a, hla a la leh ta. Kan nula ho hi an lo zai thiam hle a ni tih kan hmuchhuak thar e. Sap hla pawh an lo sa thiam tho anih hi, an lo duai lo kher mai. Thenkhat te hi chu Chinese tawng pawhin an zai thiam tho ka ring.
A bak chu comment lama sawi zawm atan khek ang. Ka sawi vek chuan a ho zo vek dawn. Saitawkan guiter a kuah hnua kan zai hot tak zia te pawh hi ka zep tlat dawn. Kan tin a hun meuh chuan zan a lo tlai tawh hle a. Ui in kham lo hle mah ila, tinzai rel loh theih ni hek lo le, ui tak chung leh kar hla tak taka leng kan misual member pui te hre reng chungin kan Lunglei MI chu Mama_B in tawngtaina nena kharin kan tin ta. Engtikah nge MI hi kan la neih leh dawn tuma’n kan hre lo. A lehpek ah chuan hmundanga kan misual member te kan mikhual tawh ngei kan beisei.
