Arngeng tluka thalai; nula leh tlangval te rilru ti hah leh ti thlabar ngun hi khawvelah a awmlo ni in mithiam ten an sawi a. Thalai tam zawkin arngeng hi nei mahse ngaia neih a har hle. Saptawng chuan chi hnih in a then phawk theih a, Arngeng nep deuh rawn var leh pep thin ang hi chu pimple an ti maia, a nasa deuh hi acne an tia, acne ah pawh chi hrang hrang a tam hle a, chung zinah chuan an nasa ber ang chi hi Cystic Acne an ti hei a lema mi ang hi.
Picture Source: Here
A damdawi ka rawn sawi tur hi damdawi dang zawng zawnga i beidawn hnu ah chauh hman tur ani. Topical ointment, doctor chawh ngai lova lei mai theih hmeh chhuah ho anga i la in enkawl dam thei anih chuan he damdawi hi hmang suh ang che.
Eng damdawi nge ni ta le?
A damdawi hming chu Isotretinoin ani a, vitamin A chikhat a tanga siam chawp (synthetic) ani. Swiss damdawi company pakhat Roche in an siam chhuah ania, a tirah Accutane an ti a a hnu deuh ah Roaccutane ti in an ko leh a, mahse an patent (neitu nihna) a expire tawh avangin tunah chuan company dang pawn an siam chhuak tawh a, India company Ranbaxy pawn an siama Sotret ti in an ko.
Engtia hman tur nge?
Isotretinoin (Roaccutane/Sotret/Accutane etc) hi damdawi hlauhawm tak, side effects ngah tak anih vangin ram changkangah chuan doctor in an chawh leh enkawlna hnuaiah lo chuan hman phal ani lo. Australia ah chuan skin specialist chauh in an chawh thei (daktawr naran in an chawh ve thei lo), a side effects chungchang chu kan la sawi zawm anga. A dose chu a tlangpuiin (arngeng nasat dan a zirin) 0.5mg/kg to 1mg/kg/per day ani tur ani. Hemi awmzia chu KG 50 bawr vel a rit i nih chuan ni tin 20 mg mum khat i ei ziah tur ani tihna anih chu. A mum hi 10mg, 20mg, 30 mg leh a dang ten a awm.
Chuan he damdawi hi a tlem ber ah thla 4 atanga a nasa uchuak deuh ah thla 8 chhung ei tur ani. A tlangpuiin thla 4 chhung an ei thin. Thlahnih i ei khan dam duak mahla i arngeng a rawn let leh loh nan a course chhung hi ei zawng ngei ngei tur.
Enge a result, a side effects te?
He damdawi i ei hian thla khat chhung vel chu eng mah danglam vak na pawh i hmu kher lo ang, mahse thla khat vel hnu a tang chuan i vun a ro em em anga, i hmui a rep anga, i hnar chhung te, i mit te, i mawngkua te pawh a ro em em ang, hei hi a chhang chu a damdawi hian i vunin oil a siam na kha a hrek chak ani. (Arngeng awmna chhan kha i vuna oil awm infection vang ani tih i hria anga). Chu vang chuan ni danga i hman ngam ngai loh moisturiser vel kha regular taka i hman angai ang. He damdawi hman lai a vun ro lutuk ti hrehawm thei chhawk zangkhai tur in a hman tur bik skin lotion te, mit thlawr, hnar thlawr te a awm vek a (Australia ah chuan heng hi a pack in a free in introductory pack min pe). Thla thum hnu ah chuan i arngeng pawh a reh fai vek tawh anga, ser te pawh a mam duak tawh ang. Thla li hnu ah phei chuan nangmah hmu ngailo phei chuan plastic surgery i nei emaw an ti hial mai thei ani.
He damdawi hmang 40% hian arngeng an nei leh tawh ngai lova, 40% dang hian arngeng nasa lo chi an nei leh zeuh zeuh a, 20% vel hian a hnu ah treatment neih that leh an mamawh thin.
IMPORTANT WARNING
Damdawi chak tak anih vangin side effects nasa tak anei
1. Hmeichhia in an ei dawn chuan i rai leh rai loh test hmasak phawt angai, he damdawi hi rai laiin an hmang tur ani lo bur, i hman lai leh i hman hnu thla 6 chhung tal i rai lo tur ani bawk. I rai chuan i fa a piangsual ngei ngei ang (30% chance), chuvang chuan i rai palh hlauh anih chuan nau tih tlak (abortion) pawh a ngai mai thei- fa piangsual, i dam chhunga ti buaitu leh rilru ti hah tu tur i duh anih loh chuan.
2. Depression- Lungngaihna- He damdawi hmang zingah mi thenkhat ten depression a thlen ni in an sawia, hei vang hian thenkhat mahni in ti hlum an awm nual ani awm e. Chuvagn chuan a risk a sang a, he damdawi i hmang anih chuan i laichin te hriattir a, nangmah ngiahven tur a i hriattir lawk a tul ang.
3. Side effects hrang hrang, thin lam te, mit te, leh a dang te a khawih chhe thei (damdawi tam tak hian thin an khawih chhe tlangpui) a, chuvang chuan he damdawi i ei chhungin a khat tawk in i cholesterol leh eng eng emaw ni blood test neih angai (i thin velah side effects a neih leh neih loh hriat nan).
Khing khi a zualpui chu ani mai.
Disclaimer:
Daktawr emaw qualified medical practitioner ka ni lova, he thil hi keima experience atanga rawn post ka ni. Chuvang chuan he damdawi i hmang duh anih chuan i skin specialist te rawnna hnuaia hmang ngei turin ka hriattir a che. Eng vang mah in keimah emaw, he website publish tu te hi i mawhpuh thei lo ang.
Ka tukkhum (lu) ah leh ka dar ah arngeng ka nei thin a, langlo mahse university ka kal lai khan gym leh swimming pool vel hman nikhua ten a nuamlo duh hle. Chuvang chuan skin specialist ka rawn a, he damdawi hi min chawh a, 20mg in nitin thla 4 chhung ka ei a, kar 3 danah blood test ke nei ziah a (ka thin leh thisen a side effcts awm leh awm loh en nan), chu bakah doctor hian ka mood te min zawt thin a, ka vannei nge khitiang side effects zawng zawng zinga ka neih chhun chu side effects tha vun leh mit leh hnar etc. ro khi ani mai.
Ka vun a ro ngawih ngawih mai a, thla 1 na ah chuan arngeng ka neih belh tawh lo a, a awmsa pawh an dam deuh veka, thla 4 hnu ah chuan arngeng bakah a ser te pawh a reh deuh vek ani. Tun hnu ah arngnen chu ka tukhum leh dar vel ah ka la nei zeuh zeuh a, mahse pahnih khat vel bak anih loh avangin a course ka lak nawn angai lova, ka dam hlen ta ka ti thei ang.
Chuvang chuan arngeng ina a tih buai, dam hlen duh te tan ka rawn tar lang ani e.
NB: damdawi man hi a to hle a, mum 1 hi Rs 20-30 vel anih ka ring India ramah (course khat atan Rs 3000-5000 vel i mamawh ka ring). He lamah chuan sawrkar in a subsidy hlauh.
Similar Posts:
- arngeng…pimples…acne
- Hepatitis C (HCV) tana hmelma thar!
- Kan zia awm deuh ang em?
- Phuahchawp damdawi & Zut dam thiam
- Luphut damdawi
:-D
June 14th, 2010 at 7:42 pm
A that dawn kha maw le.Kei hi tleirawl tirh a tang a tar lam pan thleng hian arngen hi ka nei reng mai a.a khattawk in ka hnar leh ka hnapthleng vel ah hian a rawn var leh pep thin a chuvang chuan hmai hnawih te hi ka hnawih ve ngam ngai reng2 lo.Hun neih rem chan hun ah doctor rawn a skin sp hnen ah inrefer tir a ngaih ven chi anih dawn hi.A man chu nikhat hlawh sen a ngai dawn anih hmel ve.
Report this comment
November 17th, 2011 at 3:08 pm
An sawi thenkhat ho hi han apply chhin teh le.
Report this comment