Mizo kan ni
Sap an tum engang mah la, Mizo i ni tho tho… Korean hair style leh inchei dan Copy engang mah la, Mizo i ni tho tho… tih thu te hi kan sawi tam ta! Thalaite pawhin kan hre hleihlui tawh. Vawiin thlengin he’ng, sap leh korean style copy reng rengin kan la thle dual dual reng a nih si hi! Ti zawng hian i’n ti dawn teh ang– Mizo kan nihna hi pawn lam lan danah kan chawisang thei ta nganglo a nih pawhin, inchhung khawsak leh thuam thilah kan thlauhthla tial tial a nih pawhin, Sap takin aia upa te zahthiam i la, Korean takin tlawm i ngai em em tawh zawk ang u hmiang.
Mizo nihna chu kan chhungah lo ni sela, chu chu chiang tlang bawk i la, chubaka hlu chu a awm chuang dawn em ni? Tunlai khawvelah pawn lam lan dan, inchei dan leh thuam inbel te nenlama “ZO takin le” lo la intih fo mai hi kan tlin lo a chhâ chu a ni lawmni. Hawh u, Zothuamin inbel khat vek mah ila, kan chhungah zo nihna b bo tlat si chuan kan boral tho dawn si a, chhungrilah i ZO mawlh mawlh ang u!
Kan hmel a tha
Hmanah chuan thu maiin kan lo hmeltha pawh a ni thei e. Tunah erawh kan hmel a tha tak tak ta! Thangthar zingah Zofa-a awihawm lo khawpa hmeltha/ nalh/ hleitling an va tam ta em! (Misual ho rèng kan lo hmeltha tlang e 🙂 ) Mahse, kan hmelthatna leh vún nalhnate hian hnam ropuiah min hlangkai dawn si lo.
Kan hmeltha ta lutuk hi kan thatna leh nalhnate hian kawng dik lo lamah min pawt peng daih ang tih hial a hlauhawm ta! ‘Thamawli’ leh ‘Thamawla’ kan pung hluai ringawt ang a, hmeltha tual tual, hnungtawlh tual tual, boral mai tur kan ni lek ang tih a va hlauhawm em! Hmeltha-in nalh tual tual mah i la, ZO tual tual a tel si loh chuan, kum 20 chhunga hnam boral mai hlauhawm list-ah kan tel phak hial mai lo’ng maw? Hawh u, tha tual tualin, zo tual tual ang u!
Kan tum a sang
Vaipa-in Cheng 10000 a neih chuan a khawl keuh a, Burmapa chuan sumdawna peipun dan a ngaihtuah a, Mizopa erawhin a hmanna tur ringawt a ngaihtuah thin… tih hun a liam ta! Tunah zawng Mizopa tumsang tak tak, sumdawnna lian tak tak, thiamna lama michhuanawm tak tak, kawng engkima mitùrù tak tak kan tam ta! Tum neilote’n tum neih a hun ta! Èk tum ringawt neih hun a ni tawh lo.
Tum sâng ngailote’n tum san tak tak a hun ta! Marawh chu, tum chang tih sana tum kan tih ruh chuan si loh chuan kan tum chu Vut laka vawih ang leka thamral mai tur. Tum sang pui pui, tlaw pui pui; khel sang fe fe, tlaktlai lo fe fe; suangtuahna ril tak tak, nun pawlawh tak tak kan pung hluai ringawt ang. Hawh u, khan ti sang thei lo mah i la, tum i ti sang ang u!
