mi(sual).com

1st. Tuesday: Lalrinawma (25) s/o V.Sapremi (L), Zemabawka a ute hnena khawsa mek chu an venga Myuaithai an traning-na inchhawng sang atangin a tlaa; a hnu deuh dar 8:45 velah Civil Hospital-ah a boral.
2nd. Wednesday: Technical Entrance Exam result diklo nasa lutuk avanga buaina tamtak thlentu, a changtu Minister hial pawhina ban a tum phah hialna chu midang endik tura ruatte’n uluk taka an endik hnuin an tichhuak ta. Dik tawh ngei tura ngaih a nih rualin tum hmasaa an endik, lo diklo nasa lutuk avangin kum hmasa lam result-te pawh a ti rinhlelhawm hle.
3rd. Thursday: Armed Veng South-a Pu Laldawna, kum 48 mi chu tukin ruahsur avanga an In bul kawrte lianin a la a, a ruang hi Chite lui dungah zawn mek a ni.

4th. Friday: Nimina an in bul kawrte lianin a lak Laldawna ruang chu mi tlawmngai 1300 chuangin an zawnga; tlai dar thum vel khan Tuirial atanga hla vaklo, Chite luiah hmuh a ni. A ruang hi Armed South khawtlang hruaitute’n an finfiah hnuin Tuirial YMA-te’n kuang an siam saka; tichuan an in panpui a ni.
5th. Saturday: 1988 kuma Lungdai daia taxi driver Lalrinmawia rawng taka thattu Thangzauva (58), s/o Pauvunga, Kolasib Venglai ruang chu Rangvamual thlanmual thlanga thlamah chhar a ni. Thangzauva luah hian na taka chhutna hnuhma a awma; a ban vei lam tansakin a kut ding lam zungtang pawh tanchhum vek a ni. Thangzauva hian Lalrinmawia an thah hnu hian pawi tamtak a khawih leh avangin hetianga a ruang sawisak a ni pawh hi tu phuba emaw a nih rin a ni.

6th. Sunday:Sidvin FMSCI Indian National Motorcycle Racing Championship vawiina neih zawh takah chuan Bethlehem Vengthlang tlangval Lalawma chu India ram level inelnaa a vawikhat telnaah a chetha nghal hle. Top 20 chin inelna vawiina neih zawh takah pakuana a ni phak a ni.
7th. Monday: Mizoram State Legal Services Authority buatsaihin Tourist Lodge Chaltlangah ‘Conference on Access to Justice and Socio-Economic Development in the North Eastern Region’ neih a nia; Supreme Courth Judge leh NER Committee Chairman Dr.Mukundakam Sharma chu khuallian a ni.
8th. Tuesday: Mizo thalaite’n tih ve theih tur pawha kan ngaih ngai loh ti thei tu Dr.Samuel Lalrintluanga (29), nikum May 21st.-a Mt.Everest lawn chhuak chu Sports Minister Pu Zodintluanga’n ama pisaah lawmpuina leh chawimawina Rs 100,000/- leh certificate a hlan.

9th. Wednesday; Legal Metrology staff-te chuan Aizawla pump-te oil neih that dan an endik a; felhlel deuh tlem awm chu siamtha nghalin a lungawithlak an ti hle.
10th. Thursday: Kolasiba nitin chanchinbu thar ‘DUHLAI’ tih chu IPRO Lallianpuii’n a tlangzarh. He chanchinbu editor tur hi C.Thanmawia a ni ang.
11th. Friday; Gospel singer, group lar tak, David-ate unau chuan an album hming putu David-a, 11th. June 2007a boralta hriatreng nana an album ‘Zalenna Dar’ tih chu vawiin a thihchamphaphak khan ama (David-a) thlanah tlangzarh a ni.
12th. Saturday: Electrict Veng Branch YMA, Aizawlte chuan YMA Platinum Jubilee lawm nan an veng thlanmualah thing an phuna; helai vela hnawmhnawkte an thianfai nghal.

13th. Sunday; Salvation Army, Salem Corps thalaite chuan Salvation Army Youth Day pualin Aizawl Civil Hospital-ah leh Aizawl Police Station-a tangte hnenah artui an sem.
14th. Monday; Mizoram sorkar chuan Aizawl-a pump pahnih, heng: Lalboi Filling Station, Hunthar Veng leh Lalsangliana Filling Station, Edentharte chu sorkar thupek an bawhchhiat avangin vawiin atanga ni 30 chhung petrol leh diesel hralh chhuak lo turin an ti.
15th. Tuesday; Lalpiangliana Tanhril chu huan thlai chungchangah a puzawn nen an inhnial buaia; kutte inthlakin Lalpiangliana puzawn MB Rai (70) chu a thi. Hetia a puzawn a thah takah hian Lalpiangliana chuan hlauthawngin an kawmthlang a balhla khur tur a an tih chu tlem laih belhin a phum a ni.

16th. Wednesday: Mizoram hmun hrang hrangah Green Mizoram Day hman a ni a; a hmanna pui ber AR Lammualah chuan thingphun beihpui thlak a ni. He hun hi State Level Comtt. Chairman Pu Lal Thanhawla Chief Minister-in a hmanpui.
17th. Thursday: Niminpiah (15th. June) a a puzawn a thah hnua a ruka phum zui tu Pu Lalpiangliana chu a thiltih sualah mi’n an la hrechhuak dawn tho thova a inhriat avangin Police kutah a inpe.
18th. Friday: Mizoram Hmeichhe Insuihkhawm Pawl (MHIP) chuan Archive Hall-ah tiranga do beihpui hawnna hun an hmang. He hun hi Indian Tobacco on Health (Mizoram Chapter) President Pi Lal Riliani’n a hmanpui.
19th. Saturday: Central YMA hnuaia ruihhlo do pawl, Central Anti Drug Squad (CADS) chuan CADS member nia insawi a mi ruihhlo mansaktu, Lalnuntluanga (33) s/o Dengchhuana, Chhinga Veng leh Lalrinchhana (30) s/o PL Liana, Vaivakawnte an man.

20th. Sunday: Champhai Exice duty-te chuan tukin zing khan Zokhawthar panna kawngah rakzu liter 355 leh BEDC zu liter 7 an man a; zu phurhna maruti van, zu neitu nia insawi Pathana leh motor driver-te an man nghal.
21st. Monday: Transport Department chuan Chaltlanga Jt. Director (Operation) Office-ah MST bus ticket booking counter a hawng thar. Counter hi chawhma dar sawm atanga tlai dar thum thleng, office hun chhungin hawn thin a ni ang.
22nd. Tuesday: Kristian Thalai Pawl (KTP) Central Comtt. chuan Central YMA hnuaia ruihhlo do pawl Central Anti Drug Squad (CADS) hmalakna chu thlawpin an hmalak zel nana hman atan Rs 10,000/- an hlan.

23rd. Wednesday; Tun thla ni 15-a a puzawn a thah avanga Central Jail-a tang mek Tanhril V/C member, Pu Lalpiangliana (46) s/o Hrangdawla chu hliam na tak tuarin Civil Hospital Aizawlah tukin zing dar 3:45 khan a boral. A thih danah rinhlelhawm a a lan avangin hemi zana police duty mi palite chu suspend nghal anni.
24th. Thursday: Federation of Mizoram Trade Union (FOMTU) chuan Federal Council Meeting an nei a; 29th. February 2008-a Secretariat Complex panna kawng, Khatlaa lungrem chim avanga thi chhungte hnenah tun thlenga zangnadawmna pek an la ni lo chu pawi an tih thu sawiin kumin July thla ral hma ngeia pe turin sorkar an ngen.
25th. Friday; Khawvel pum huapa ruihhlo hmanga sumdawnna dona ni, International Day Againts Drug Abuse & Illicit Trafficking chu Vanapa Hall-ah hman a nia; Social Wellfare minister Pu Pc.Lalthanliana’n a hmanpui.

26th. Saturday: Kum 30 chuang kalta atanga LSC fel tak neia ram mumal tak nei Pu V.Rinawma, Tuikual, ram, Tuikual leh Dawrpui Veng inkar, AR Biak In bula mau zawrhna sethlam chu vawi tam sipai ho nena an intihbuai tawh hnuah tukin zing khan Assam Riffles hovin a neitu hrilh hmasa lovin an thiah sak.
27th. Sunday; Biakthantluanga s/o Upa R.Lalduailova, Ramthar Veng chu zanin dar riat khan a boral.
28th. Monday: Kar hmasa Nilaini a (23rd. June) Lalpiangliana, Tanhril thihna chungchanga inhnamhnawiha puh avanga suspend mek police palite lakah Mizoram Police-in ni li hnuah pawh ‘sou motu’ hmanga FIR an thehluh loh avangin Human Rights and Law Network (HRLN) chuan Aizawl Police Station-ah FIR an thehlut.

29th. Tuesday: Tukin zing dar 2:30 vel khan New Vervek police lock-up-ah Renghmingthanga (26) h/o Lalmalsawmi, New Vervek chu a inawkhlum.
30th. Wednesday: 25th. July, 2009-a rulnganin a chuk hlum, nula Lalduhsaki (22) d/o Thangveli, Mamit Bazar Veng chu Lalduhsaki nu Pi Thangveli hnenah Environment & Forest Department chuan zangnadawmna Rs 1,000,00/- an pe.

Similar Posts:

• Lalpiangliana thih thu a police suspend te la lut leh
• Vaivakawn PS a thil thleng chungchang kha..
• July 2010, Mizoram Diary (Ka nu hriatrengnan)
• June 2008 Mizoram Diary
• Mizo hmeichhe ruang chhar!

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Monday, July 5th, 2010 at 1:45 pm and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.