mi(sual).com

Chu zan thim dul raihah chuan Chicago khawpui chu zan dang zawng aiin a vawt emaw tih tur hi a ni a. Mipui zi nuaih nuaih karah chuan mipa naupang pakhat chuan khur der der chung chuan thahnem ngai takin lehkhabu a lo zuar a. A thuamhnaw en reng reng chuan mi hausa tak fa a ni lo tih chu a chiang em em a. Nei chu nise chu aia thawmhnaw lum chu a inbel ve ngei ang le. Mahse, a pachhe em mai pawh a ni.

Chu lai hmuna awm tupawh mai chu a zawrh vek a, hmeltha leh hmelchhia, ngo leh hang, mipa leh hmeichhia lam pawh a thliar ve lem lo. A tawh hmasak apiang chu a zawrh zel mai a ni. Chutia, mipui an haw darh hnu chuan kawtthler pawh chu a reh huai a, a chhungrilah chuan mal ngawih ngawiha inhriatna chu a nei vei roh a. Hawna tur ka In tih tur nei ve ta lo chu khawngaih thei an awm ang em? tiin a hawi kual a hawi kual a. Chutia a hawi kual lai tak chuan police pakhat nelawm hmel zet mai hi a hmu ta a, chu pa chu a va pan hnai a, a hnenah chuan, “Ka pu, kei ang naupang rethei tak tan hi chuan zanin angah hi chuan lum ti taka mutna tur zawn hmuh chu a har tur zia I hrethiam ang tiraw? En teh, khi laia bawm chhungah ringawt khi chuan zankhua maia mut chuan, vawtin min hmet hlum mai ang. Chuvang chuan, hmun lum nuam zawk kawhhmuh tur min hria em? tiin a zawt ta tawp a.

Chu Police – palian tak leh nelawm hmel tak chuan, naupang te chu khawngaih hmel tak hian a lo en kar mai a. “Khu laia kawtthlerah khuan i chhuk thla ang a, In var lianpui a lo awm ang a, kawngkhar chu i kik ang a. Kawngkhar an rawn hawn hunah chuan, “Johana 3:16” tih ringawt i sawi ang a, In chhungah chuan an luh tir mai ang che,” tiin a hrilh a.

Tichuan, phur tak chuan a kal ta a, a sawi ang chuan a ti a, hmeiche pakhat hian a lo hawng a, a rawn hawn veleh chuan, “Johana 3:16” tih ringawt chu a sawi a. Chu nu chuan, “Ka fapa, lo lut rawh,” a ti a. Meilum an chhemna hmun (fireplace) hmaah chuan a thut tir a, a kalsan leh ta mai a. Chutia, amah chauha meilum a ai lai chuan, a rilru te te chuan “Johana 3:16….. enge a awmzia? Mahse, mipa naupang vawt ti tak a tilum tho alawm…..

Rei vaklo hnuah chuan chu nu chu a rawn let leh a. Mipa naupang hnenah chuan, “I ril a tam em?” tiin a zawt a. Ani chuan, “Aw, ni eng emaw zat chu chaw ka ei tawh lo a. Mahse, ka ei tam lo ang,” a ti a. Chu nu chuan chokaah a hruai a, ei tur tuihnai tak tak mai dawhkana inchhawp teuh hmaah chuan a thuttir ta a. Tui titak chuan a ei ta bawrh bawrh a. Lan mawi leh lan nalh lam a khel lo bawk a, mi dang phei chuan hmu se, ‘ransa chaw ei te pawh a ang mah mah awm e,’ an ti hial ta ve ang! Chutia, a ei bawrh bawrh lai chuan, Johana 3:16…. Tih chu a rilruah chuan a rawn lut leh ta tlat mai a. He thu hi ka hrethiam lo takzet a ni. Mahse, mipa naupang riltam a tipuar tlat si a ni.

A ei zawh hnu chuan, In chung lamah chuan a hruai chho leh ta a. Bual Inah hruaiin, bual thleng (bathtup) lianpuiah chuan phur tak leh nuam ti tak chuan a inbual a. A inbual lai chuan, ti hian a ngaihtuah leh a, “Johana 3:16… A awmzia ka hre lo tak zet a ni. Mahse, mipa naupang bal tak a tifai bawk si…..”

A inbual zawh hnu chuan hru roin thawmhnaw lum nuam tak a hak tir a, a dam chhung zawnga a la hmuh ngai reng reng loh khum lian leh dup nuam takah chuan a mut tir a. Rizai chu duat taka sin tirin, a chala fawh pah chuan “Mangtha aw” tiin light chu a tithim a. Chutia thlamuang taka a mut siai siai lai chuan tihian a ngaihtuah leh a, “Johana 3:16… ka la hrethiam chuang lo..” Mahse, mipa naupang chau tak tan hahdam taka mutna tur khum nuam leh dup tak a pe lawi si.

A tukah chuan a rawn kai tho a, In hnuaiah an chhuk dun a. A hma zana  meilum a ainaah chuan a thut tir a, Bible hlui tawh tak mai hi a la chhuak a. Chu mipa naupang hnenah chuan, “Johana 3:16 hi a awmzia i hria em?” tiin a zawt a. “Ka pi, ka hre lo, ka la hre ngai lo hrim hrim. Nizana police-in sawi tura min tih kha ka vawi khat hriatna a ni,” tiin a chhang a. Chu nu chuan Johana 3:16 chu keuin, sawifiah ngai nia a hriat te leh Isua chanchin te chu a hrilh tel bawk a. Chu meilum chhemna bulah chuan, chu mipa naupang rethei tak chuan a thinlung leh nunna te chu Pathian hnenah a hlan ta a ni. Ngawi renga thuin Johana 3:16 chu a ngaihtuah ta vang vang a.

Johana 3:16:  ”Pathian-in khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan,”

Similar Posts:

• Misual a mutui thei lo
• Misual a mutui thei lo
• Ka thian tha ber
• Chatuana Pawi Hlen Tur
• Relin min tlansan !!!

Recent Posts:

• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release
• Ka lawm e, Mi(sual)-nu!

This entry was posted on Sunday, July 11th, 2010 at 6:42 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.