mi(sual).com

Burma ramah khian Mizoram mihring ai maha a let engemawzata tam Zohnahthlak an awm thu chu kan hre vek a; Tahan leh a chheh vel-a Mizo Khua, Khawtlangnun, Tlawmngaihna leh Kalchar engkima ‘Zo’ tak, “eng nga” hmang khaw thenkhat te nena kan tawng inanglo ka hriat ve thenkhat te :–

#Iskut hi Hangbo an ti.
#Bawrsaiabe hi Rah-nal an ti.
#Tomato hi Bawkbawnthur an ti.
#Thingfanghma hi Hnuhnun an ti.
#Sazupui hi Sabek an ti

Aw le! Khi tia’ng khian– chenna hmun leh ram kum za tam a lo dan tàk siah chuan, kan tawng leh a thlúk eng eng emaw inanglo leh lo danglam deuh tàwk chu a awm ngei ang. Khawi rama cheng pawh ni ila, heng kan tawng thenkhat inanglo deuh te avang hian innuihsawh lo ila, inen hrang lo ila, mizo lo bik riauin va hmu hek lo ila tih hi Hnam hmangaihtu leh Hnam-a chiangte duh dan a ni ngei ang. Khawvelah hian misual tamtak an awm a, chu’ng mite avang chuan ram hrang hranga ZOfate inpumkhatna hi tih chhiatin awm lul suh se!

Proxyvon hi Bagha hoin mizote min run/nuai chimih an tumna hmanrua, kan thalaite tihchhiat vek an tum vanga rawn lut ni loin, misual thenkhat te sumdawnna a ni. Chitiang bawkin No 4 hi Burma hoin Mizoram min huat em avanga min tihchhiat an tumna ni niloin, sumdawng duham, an hlawkna tura pawisak nei reng reng lo, mi thenkhat te avanga rawn lut a ni. Chutiang zelin tualthah, rukruk, pawngsual te pawh mimal sualna mai a ni. Chumi avang chuan midang– a hnampui/ a khua leh tuipui emaw, pawisawi lo midangte kan hmer tel kher thin hi sim a hun ta!

Heng, kan Unau, kan chipui kan tih te zingah mi fel, mi tlawmngai leh mi rinawm tak tak an awm laiin, mi thenkhat hnawksak zia erawh kan hre vek a, he thu chhiartute zingah ngei pawh an kut tuar tawh te hial kan awm ngei ang. Kei ngei pawh hian ka lo tuar ve tawh ngei a. Chumi avanga pawi sawi lo khawchhak mi hrim hrim huatna leh hmuhsitna thinlung pu lo hram ila, khawchhak mi an nih avanga an laka thu rúm tak tak chhakchhuah fo mai kan duhna thinlungte hi lo nèm tawh se la; (dan lo anga rawn lut an nih leh nih loh lam chu thuhran ni se…) Thinlunga inhuatna leh inenhranna ang chi reng reng– Khawvel hmun hrang hranga Zohnahthlakte zingah tih bo-in lo awm tawh se la;

Ram hrang hranga Zofate zingah chhungril atanga inngainatna lo púng deuh deuh se la; Inhmangaih tawnna nen ZO khawvelah remthu leng rawh se… tiin, Inpumkhatna lawm hawiin he thufahrah tè hi ka rawn sópui ve luam a. Thu leh Hla mai nilo, a taka inpumkhat duhna thinlung mitin-in kan neih hunah leh harsat mangan kan tawn changa thlavang inhauhsak tawn dial dial ngam khawpa Zofate kan inpawh hunah– he ZO hnam/ ZO khawvel, Hnam naupang leh tlemtè nibawk hi… Àw… a va nuam lehzual dawn em!

Ram khat/ Rorelna pakhat hnuaiah chuan kan inchhungkawm thei tawh kher lo ang(?) Mahse, Chhungril-ah erawh kan la insuihkhawm thei reng e. Chutah chuan ramri kham a awm ve si lo. Hawh u, inpumkhatna lam hawiin i ti ti dawn ang u hmiang.

Similar Posts:

• ‘ZOLUANKAWR’ Pu P.L.Liandinga’n a tlangzarh
• YMA Burma ramah
• UK Zofate
• RAM LEH HNAM HUMHALH – IV
• YZTP-in Tanpuina Sem!

Recent Posts:

• ZoRO Press Release
• MIZO KRISTIAN MARTAR THENKHAT TE
• BEIDAWNG SUH
• Bawihpuia kha
• L.Kira an tih chu (The man behind Lalzova)!

This entry was posted on Monday, July 19th, 2010 at 6:25 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.