Aizawl, July 22: Zan khat riaka Aizawla rawn kal Union Minister of State for Communication and Information Technology Sachin Pilot chuan vawiin khan |huampuia WLL MSC, BSNL EVDO Demo services leh Mizorama WiMax Service a tlangzarh a, Mizoramah Software Technology Park din a nih tur thu a sawi bawk. Sachin hi vawiin tlai dar 3.00 khan Kolkata panin Mizoram a chhuahsan.Minister hian Mizorama Software Technology Park of India (STPI) satu tur chu Department of Information Technology an nih thu a sawi a, Mizoram sawrkar chuan park siamna atan hian Aizawlah hian ram pawh an lo hual lawk tawh a ni.
Sachin Pilot hian India rama telecom leh information technology-a hmasawnna chak taka kal leh thil inthlakthleng awm meka chu Mizote’n an dawn ve zel hi an dikna chanvo a ni tiin a sawi a. India hmarchhak chu tlangram chhengchhe tak ni mahse BSNL service chu tihchangtlun a ni dawn tih a sawi bawk. “Niminah India hmarchhak BSNL hotute nen kan inkawm a, hmarchhak tlangram chhengchhe takah hian service tha tak neih a har tih sawi a ni. BSNL hotute hnenah hian mipuite beiseina a sang a, eng harsatna pawh awm se paltlanga service tha tak pe turin ka ti a ni,” MoS chuan a ti.
Minister hian financial year tharah BSNL hian Mizoram bika service tihchangtlunna atan cheng vaibelchhe 34 a ruahman tih a sawi bawk. Mizoramah call centre-te din a niha thalaite’n eizawnna kawng thar an neih belh zel theih nan STPI din turin hmalak a ni tur thu a sawi a, Mizote chu tawng hmang thiam an ni tih a sawi.
“Mizote hi tawng lamah hian harsatna an nei lo a, an thiam zung zung thei a ni,” a ti.Sachin-a hian mobile switching centre a hawng a, hei hi mobile phone service tichaktu leh inbiakpawh ti-awltu tur a ni. BSNL EVDO services a hawn hi high-speed broadband internet pawh theihna tur a ni a, thingtlang lam mite’n internet an hman ve theihna turin Minister hian WiMax services chu Mizorama hman turin a hawng bawk. WiMax service hi wireless high speed broadband a ni. WiMax bikah hian Minsiter chuan India rama khawpui lian (metro city)-a hmanraw hman anga tha chu Mizoramah hman a nih thu a sawi tel a ni.
Zawhna chhangin Mizoram thlun zawm tur Power Grid Corporation of India Limited, North Eastern Circle hmalakna optical fiber thlun kawngah Sachin chuan harsatna a awm a rin loh thu a sawi. Mizoram sawrkar chuan sawrkar laipuiah Kumarghat(Tripura)-Aizawl thlun zawm turin a dil tawh a ni. Optical fiber hian Aizawl a thlun zawm chuan inbiakpawhna chak zawk neih a ni dawn a, eizawnna kawng zau zawk a inhawng thei dawn a ni.
Minster chuan kum 2011 December thlaah Mizoram khua zawng zawng inbiakpawh theihna turin peih fel a nih tur thu a sawi a, tunah hian BSNL hian Mizoramah pawttu 91,000 an nei mek tih a sawi a, kum 2011 chhungin pawttu 45,000 neih belh an tum a ti bawk.
