mi(sual).com

Ka farnu duh tak,

Kawppui neih chungchanga i harsatnate chinfel sak tur che in theihna ka nei hauh lo tih ka hria, ngaihdan mawlte ka neih erawh min lo ngaihtlak sak ve ta che.

Khawvel dan angin nupui pasal neih chungchangah i ngaithuahnate nasa taka hmangin mahni pawh i inbuk fo thin a. Rilru hah a vanga hui ha deuh pap pap chang pawh i nei thin ngei ang. Khawvel thufing pakhat ‘a hlui hlui hi a hlu (Old is Gold)’ an tih hi  kawppui zawnaah chuan a dik hauh lo tih hi i hriat hnu mah nise hrilh nawn leh che ka duh a ni.

Pangpar  chu mawi hle mahse chuai hun a nei a, a par a chuai hnuin  engtikah mah a par leh tawh ngai lo. A tan a hun bi tuk a ral hnu chuan  par dangin an par an rawn chhuang thin. Chutiang bawkin mihring te pawh. Thlasik ni a liam vut angin, lei mihring zingah hmeichhe vul lai pawh in chuai lama pan thuai thin.

Hmeichhe vanduaina tawk palhte  chan ang chan hlauh vangin kawppui nei lova len i thlang a nih chuan khuareiah inchhir in ban a chen ang tih a hlauhawm hleh love. Hmeichhe vanduaina tam tak hi chhut chian hian a thente hi zawng vanneihna dawng tur hian an in sang mar lo ve bawk a sin.

Pasalte tih lawm tumlo, pasal fanaute tana inchhung boruak nuam siam tum hauh lo te, pasal fanau aia khawtlang leh kohhran vei tlat te tan hi zawng vanduaina tawng buak palh te pawh a awl a ni ang e. Ka farnu duh tak, hmeichhe vanduai nilo turin i pasal fanau tan inpumpekna nei turin rilru siam la. Chu mi baka vanduaina erawh zawng keini  lei mihring te dan rual a ni love.

Pasal neih avanga i hna kal san a tul a, hna nei lo niin vanduaina tawk thei dinhmuna i din avangin pasal neih loh mai duhna lian tak i nei a nih pawhin ka dem lo che. Khawvela hmeichhe dai sual tawhte leh kan ram ngei a hmeichhe vanduai ta te dinhmun en hian i thuthlukna hi ka aawm reng a ni. Mahse, khawvelah hian naktuka thil lo thleng tur chu sawiloh, ka hma lam darkar khata thil thleng tur pawh kan hriat loh hi dai ngam lovin kan indawm kun reng dawn em ni le?

Hmeichhe vanduai ber chan ang chan ve hlauh vanga hmeichhe vanneih ber nihna chance i hlauh hi enge a tulna le?  Mi vanduai leh dai sual palhte dinhmun i hmuh avang hian pasalte avanga zahawmna leh hming mawina tam tak dawn theihte hi chang ve turin enga ti nge i in san mar ve chhin lo ang le ? Nau neih hrehawmna avangin  miin fa nei lovin awm ta reng se la, a nun chu a va khawhar thlak dawn ve le. Tin, fa neih hlimawmna, thlamuan thlak zia leh faten  thinlung an tih lawm zia hriat huah loh tur chu, siamchawp vanduaina, tawn atana hlauhawm tak a ni. Chutiangin nupui pasalah pawh.

Sum leh pai hian rei tak hlimna min pe thei tak tak lo. Mahni lo intodelh in engkim hniang hnar mahla, leilung dan in i lungleng hun te a lo her ang a, dam mawh hritlan nikhua a  bawihsawmtu, natna, harsatna, hlim leh lawm min tawmpuitu tel lo chuan hringnun hi a hahthlak double thin a sin. Khua reiah zawng mahni ram leh chhung te mai bakah hnung thak hiat tur cheng pawh i ngaih hun a tleng thei a nia.

Mipa zawng zawng hian rinawmna an hloh ta veka i ngai a nih chuan mi dawthei berte zinga mi i ni ang. Ka farnu duh tak, mipa zawng zawng an rinawm ka ti ngam hauh lo na a, mahse, an rinawmlo vek bik hauh lo tih erawh thih tha in ka tan ngam. I pasal lakah rinawm la, rinthlak la, ring ngam in awmla, chutiang chung pawha i laka rinawm lo duh tur  khawpa mi depde erawh chu thlan loh tum hram ang che. I pasal in a mamawh i hnena a hmuh zawh loh hmeichhe danga a beisei a nih erawh chuan engti kawng mahin khawvel in an thiam lo vang che a, kei pawhin ka thiam bik hek lovang che.

Pasal ngam leh thunun chungchangah hian mi tam takin an ti sual chawk thin. Fing ve tawk ni a in hria, mipa thunun leh cho thei ni a inngaite hian an an fing tawk loh zia an tarlang a ni lek fang. I zir sang emaw i dinhmun a tha a nih pawh in hmeichhe ropuina chu in ngaihthlawmna leh thuhnuairawlhna a ni tih tih theihnghilh suh. I awmnemna leh der depna hmangin khawvela mipa ropui ber pawh i thunun in, vawi za tam tak i tuai vir thei a nih tih hre reng la, chu thiltihtheihna chu vawng reng ang che. Hmeichhe lalna chhungkua, ropui leh awhawm tak ka la hmu lova, a pakhatna siam erawh  tum deuh lem suh ang che.

Hei hi erawh ka chah duh che. Mahni hnap pui zinga pasal hmu lo khawpa i lo meng sanga nih chuan i hnam pui ten an ngaihsan che in beisei duh ting suh. Tin, mahni hnam pui zinga mi nilo kawppui tur i thlang a nih hlauh chuan lungleng khat leh rilru hah avanga hui ha deuh pap pap na atan i tuang ti chhah lawk hle la, rin hran nei mi a ni lek phei chuan ti chhah leh zual ang che. Hnam dang  pasal  nei thenkhat hian inchhir khat zawng an nei chawk a nia.

Pasal thlan chungchangah erawh zawng, kei hmangaihna lama tui dul lo leh i unaupa tawmkai lo tak, mahni tan pawh a len deng hlei thei lo hian mi dangte len den dan lo zirtir zawng thil awl ai a ni hauh lo mai. Tin, tum dan fel tak nei a, rilru nghet tak siam a, a sawhkhawk tur pawh dawn chunga mahnia tlat i thlang a nih zawngin i thuthlukna chu zahtlak a nih theih nan thianghlim takin kengkawh ngam bawk ang che. Duhthlanna fing leh fel i nei theih nan chung Pathian rawn  zel la, tun lai khawvel sual tawh takah pawh hian amaha rinna nghattute hi a la tithlawn ngai lova, a rinawnna a la  pangai reng ni.

Khing ka han sawite khian i rilru a siam danglam pha hauh lovang, mahse i ngaituahna ti thar leh tu atana hmanraw mawlte a nih chuan hlawhtlingah ka chhiar lo phal chuang lo.

I unaupa duh tak,

Keimah.

This entry was posted on Monday, July 26th, 2010 at 7:35 pm and is filed under More than words. Both comments and pings are currently closed.