mi(sual).com

Chapter V

Chumi zân chuan goodnight message takngial pawh min rawn thawn lo. A tûk Pathianni tûkthuan eikhamah min rawn text chauh a, ‘Inkhm dn m?’ tiin. Ka chháng a, a reh zui leh daih!

A tûk Thawhtanni-ah school a rawn kal lo a. A kal loh tur thu a sawi lâwk si lova, mak ka ti hle. Chhûn chawlh vêleh PCO hnai ber ka pan a, phone ka tum a, a la thei si lo. Chumi ni chuan thildang engmah ka ngaihtuah thei lo. Tlai bàn veleh ka cell-phone atangin biak ka’n tum leh a, a la thei chuang lo.

Chumi zân dár 6.00 vêl chuan min rawn text ta—‘K khuask hluah2 my. K nuam lo ltk. A nun mn mutpui, rn call sh’ tiin.

A tûk pawh chuan school a la rawn kal peih chuang lo a, Nilaini-ah chawhma a rawn kal zawk a, a nawmsam loh chhuanlamin chawhnu chawlh a dîl a, min hawsan leh a. Ka khua chu a har ngawih ngawih a ni.

Chutih hun lai chuan ka nu chu Kolkatta lama in check-up tura kalpui a lo hun leh tawh a. Páwl 12 kan exam têp tawh si a; mahse, kalpui loh theih a ni si lova, exam loa ka nu kalpui tur chuan ka inbuatsaih a.
Kan zin hma ni chuan April-i chuan a car-in min rawn lam a, niléngin kan lêng dùn a. Ka zin hlâna a tana rinawma ka awm tlat tur thu ka hrilh a; duhthawh taka kan infawh hnu chuan kan inmangtha ta a.

Chapter VI

Kolkatta Salt Lake-a Mizoram House-ah kan inkulh a, khua chu lum naménin a lum lo. Ka nu chu Mizoram House kianga AMRI Hospital-ah kan admit a. A doctor chuan a lo bera kár thum awm a ngaih tur thu a sawi lâwk a; ka huphurh hle a. April-i nen chuan phone-in kan inbe zeuh zeuh a, a chang chuan biak a har thei fú mai. Zan lamah ka nu chu riahpui an phal si lova, Internet café lamah ka tei lût leh nge nge thin. A buai deuh vang nge ni Orkut lamah April-i sûlhnu hmuh tur a awm ngai meuh lo.

Kár thum kan chàm hnu pawh chuan ka nu chu a la rawn chhuak thei lo a. Zan khat chu Café lama ka luh hmain House hnung lama wine shop-ah chuan chilled beer ka lam kawi a. Café-ah ka thu ràn a; mahse, Orkut lamah thil thar engmah ka hmu lo.

Thil pakhat ka ngaihtuah chhuak zawk a, April-i computer ka en ni a Orkut-a a ID ka hmuh kha a ni. Min biak nana a hman loh a ID dang hmang chuan Orkut-ah ka’n lût lâwr a—a ni thei lo! Ka nupui atana ka duhthusàm hian mi pâ, nupui fanau pawm lai nei a ngaizâwng ang maw? A theih loh! Mahse, a ni tlat si! April pár mawi tak ka thliah phal ngai loh chu mi pa’n min thliahsak ta!

Chu pa chuan nizân hmasa ngei pawh khan ka duat lai April-i chu a dân ngaite bawkin Swedish Vodka hmingthang Absolut Vodka hmangin a thlêm chhuak a, chu pa car chhûngah chuan an duh takte chu theihnghilh thakin an tual lènna Aizawl khawpui chu ‘Sin City’-ah an chantir a ni!

Ka mit sulh a, ka pik chun mai a, engmah ka ngaihtuah thui thei lo. House lam panin ka tlân chhuak a. Zanlai dár 12 a ri têp tawh a, House tualzáwlah chuan dormitory-a ka thlenpui mipa pathum hian an phone chu insi rialin an lo dah a. Bluetooth hmangin Mizo sex tape thar an lo inthawn mêk a lo ni.

An sawi hmangin Aizâwla sikul naupang pakhat leh Kolkatta vai supplier hausa sex tape an lo inthawn a. Ka’n bih ve chhin a—a mipa hmêl a lang lo va, a hmeichhe hmêl pawh minute khat hnu velah a rawn lang chauh a, a ngo-in a no kher mai. Chu tleirâwl hmêltha zet chu ka’n en chiang a—April-i!

Dormitory pana lift-a ka chuan lai chuan ka cell a rawn beep a, hmeichhe tenawm April-i sms ka dawng a. Delete nghal ka tum a; mahse, a tâwp nan tiin ka’n chhiar leh hrâm a—

“Nag mithianghlm gaizwng tr hn kei misual lh tenwm hi ka tlig xo ve ta lo!k at vagin mi tenwmah ka insiam ta. Orkut-ah egkm k rn post aw”

Rang mangkhêngin Café ka pan a, Orkut-ah chuan ka’n in sign in tha leh a. April-i chuan saptawngin thu a rawn post a, Mizo tawngin han ziak chhâwng dawn ila—

“Vawiin hi April ni 30 a ni tiraw? Mahse, he thu i hmuh meuh chuan May thla a ni tawh ngei ang. Kumin atan chuan April a ral ta, i thinlung chhungrila April pawh a ral mêk ang tih ka ring. April chu a thla nen, a mihring nen hmangaih tlak a ni ta lo!

Kei chu eirûk hmang fanu ka ni. Ka duh apiang ka pa’n min tihsak thei a; mahse, ka thiante inzuar hlâwkzia ka hriat ruala tihchhin ka châknate hi ka pa’n mi leisak thei ngai si lo.

Ka nu strict êm avanga kan Ina i rawn lên ka phal loh laite leh ka damloh chhuanlama school ka chawlh laite khan kei chu vai leh mizo sumdawng hausa leh officer thenkhatte’n min lei kual thin a. Ka thiltih hi thil sual a ni tih ka hriat hnu hian ka tlai tawh si. Hnam dang nena kan mualphona chu tûn laia mite mit titlai bertu a ni mêk ta! Insiamthat nana hun duh rei turzia hi… Nang ang mipa dik tak pasala nei tur phei chuan hun hian min dam zawhpui ka ring thei tawh lo.

Nang chu, mipa, mipa dik tak, thinlung zawng zawnga min hmangaihtu i ni a, ka zah che a, ka ngaisâng kumkhua tawh ang che. I hnên atanga ka dawn engkim avanga ka lawmthu sawina hi chu min lo pawmsak hrâm ang che aw. Kei chuan ka màwlna ka tuar mêk a nih hi!

May, mangtha phal lo che mah ila, muttui tal aw…”

Ka chhiar zo a. Ka hriat zawng chu ka la dam a ni tih zawng a ni. Ni e, ka nunna chu he khawvêla ka chan awm chhun a ni; ka mittui, mipa dik tak mittui nen hian!

Similar Posts:

• orkut blogs
• Mangtha April – Chapter I & II
• Pangpar
• Khaw danga pem leh mithi tawh mi 29-te NREGS Job card hmangin hlawh lak a ni
• Mangtha April – Chapter III & IV

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Saturday, July 31st, 2010 at 12:48 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.