Indian Instrument Manufacturing Company (IIMC), Kolkata in a sponsored Mizoram chuan vawiin hian quater final Group B a match hnuhnung zawk, tlai dar 6:00 a khelh tan turah ; 64th Santosh Trophy thlengtu leh champion ngun ber West Bengal chu Salt Lake stadium ah a hmachhawn dawn ta.
Point 1 nei tawh Bengal tan chak ngei a ngaih laiin, Mizoram tan chak ngei ngei a ngai thung ang. Mizoram leh Bengal inkhelh hma hian, point 3 hmu tawh leh Group B leader Tamil Nadu chuan Bengal in an draw hram, tun tournament a team tha pawl a sawi theih tur leh point 1 hmu tawh Delhi te, tlai dar 3:30 ah an inkhel bawk ang.
Group B inkhel tur hi tlin leh tlak theihna inkhel a nih avangin a pawimawh zual hle. Chak lo team nih duh miah lo tur inkhel a nih dawn avangin a hmuhnawm loh ring suh. Group B a match hnuhnung zawk khel tur Mizoram leh West Bengal te hi inbih chiang teh ang.
Mizo vs Bengali !
Santosh Trophy chauh nilo Indian football a eng level ah pawh Bengal hi record nei tha ber pawl an ni vek a. Santosh Trophy ah champion ngun ber an ni a, U – 21 ah vawi 6 an champion tawh a, runners up vawi 7 an ni tawh a, hetih lai hian Mizoram chu 2009 khan final a vawi khatna atan lutin, a vanduai zawkah kan tang hlauh a.
U – 19 ah vawi 17 lai an champion tawh laiin, Mizoram chu vawi khat final lutin West Bengal hi kan hneh lo zui a. U – 16 lamah chuan kan che tha ve viau. Bengal hi vawi 13 an lo champion tawh a, Mizoram chu vawi 4 champion tawhin, runners up vawi 4 kan ni tawh a, U – 16 bikah chuan West Bengal dawt a record nei tha kan ni ang. Kum 1987 atangin AIFF hnuaia inziak lut tan Mizoram hian, Santosh Trophy a khelh ve hmain Bengal ho chu vawi 13 emaw vel champion an lo ni der tawh mai.
Kumin atang hian AIFF chuan India senior team-a player-te leh Asian Games khel tura kohte chu Santosh Trophy hi khelh a phalsak tak loh avangin state tam takin an players tha te an chhawr thei lo hlawm a. He dan hman a nih avanga tuar nasa ber chu defending champion Goa team hi an ni thei ang a, a dawtah West Bengal ho hi an ni awm e.
Zam ngai lo Zo Tlangval
Mizoram hian Tamil Nadu a hneh loh tuma first choice XI zing a mi, inhliam vanga khel thei lo Lajong keeper Lalthuammawia leh double yellow card vanga hrem tawk Lalchhanchhuaha chu Bengal hmachhawn tur hian an lo kir thei tawh ang. Santosh Trophy khelh mekah; chawlh mumal hmang hman lo a, ni zawn deuh zat a game 5 lai khelh tawh Mizoram tan, Indian football a chanchin thar ngaihnawm tak ziah a nih theihna tur a ‘remchang’ an hmuh hi coach leh players te hian an hai bik hauh lo ang.
Keeper ah Thuama’ n a veng a nih chuan India ram a goalkeeper tha pawl a sawi ve thin tuna Lajong a khel mek Gumpe Rime pawh luahlan ve thei a ni. Defender zingah India rama left back tha ber pawl a sawi hat Robert Lalthlamuana Churchill Brother a khel lai kan nei a. Kolkata league aia tough zawk nia sawi Goan Professional league khel tura, a hma a club ropui tia chhal ngai lem loh Faria Striker a player pawimawh zawng zawng Mizo te leh he team enkawltu Mizoram team ah an awm a.
Churchill Brothers hmatawng Odafe te pawhin beiseina sang tak nena an thlir mek, Lalrinfela kan nei a, India U -23 team captain ni phak khawp Zaidinmawia Hmar te, Bengal club ropui East Bengal ah pawh season liam ta a Belgium coach Philip de Ridder pawhin first choice XI atanga a thlauh thlak phal mang lo Beikhokhei a hmatawngah kan nei a. Naupang te a nih laia U -17 Asian All Star team a lang pha leh India senior team ah pawh a naupang te ni chunga tel phak Jerry Zirsanga, JCT Academy pum chhuak Lalchhuanmawia te pawh kan nei e.
Kolkata khawlum leh Salt Lake stadium boruak man thiam tur George Telegraph player Zodinliana, season thar atanga I – League khel thei tur a rawn kai thar ONGC player F. Lalmuanpuia a awm bawk. Mizo players te fak an hlawhna ber thin ‘fighting spirit’ tha tak nen Bengali ho hmachhawn turin Mizoram players te an inbuatsaih ngei ang a. Attacking game beisei chhin ila, nawr tum luatah, Bengal ho counter attack erawh Mizoram tan invenna tur pawimawh tak a ni ngei ang le.
Bengali ho maw !
Bengal ho hi ni 29 chhung vel Santosh Trophy khel turin hian an inbuatsaih a, India ram State FA zingah a hausa ber leh sum ngah ber an ni ngei ang a. Players an enkawl danah pawh duhthusam a ni. Hotel changkangah khungkhawmin, Tower Group’s chuan Bengal team hi sponsored in, an champion a nih ngat chuan Bengal team leh coaching staff te chu foreign ah chawlh hmang turin, Tower Group’s te hian an hruai dawn. Mizoram hian Bengal te angin sponsored tu lian tham an nei lo a. Hotel thaah pawh thleng phak loin, Mizoram House atangin Santosh Trophy hi an hmachhawn thung a.
‘Mecca of Indian Football’ tia sawi a nih miau avangin Bengal ho hian player an la rawn chawp chhuak ‘hrawl’ hlawm viau. Season hmasa a Sahara Calcutta Premier League champion Mohun Bagan – 4, Chirag United – 9, East Bengal – 2, Mohammedan SC -3, ONGC leh Mumbai FC in 1 ve ve an thawh khawmna West Bengal hi an chhe lo. Delhi nen an inkhel tuma beisei phak lo te hi sawi danglamin 4- 4- 2 emaw hmangin an rawn nawr leh ngei tura ngaih a ni. Ball thiam tlanchak, goal thun thei Delhi lama thuntu Jayanta Sen hi an chawr tangkai leh beisei a ni.
Bengal tlar hnung, keeper thleng hian, senior leh age level a India aiawh a lo khel tawh an awm nual a, tawnhriat pawh an ngah tawh viau. Midfielder zingah Snehasish Chakrabarty (Mohun Bagan) hi an key player tur a beisei a ni a. Tun tum Bengal hmatawng hi duhthu an sam tawk lo, Sankar Oraw hi Chirag United ah a khel tam lo a, Robin Singh hi Tata Football Academy atanga chhuak hlim, tun season atanga East Bengal a khel tur chauh a la ni. ONGC player Taffrik Ahmed hi ven zui deuh a ngai mai thei. West Bengal hi position dangah pangngai hmel takin lang mahse an hmatawng zingah goal thun thei tak an awm loh vangin, Mizoram tan beisei tisangtu pakhat a ni mahna le.
Players thlan chungchangah, state tana khelh aia chawlh hmang duh zawk players an awm nual avangin, Bengal coach Shabir Ali hi a lawm lo hle a ” State tana khel duh lo players chu pakhatmah ka thlang lo” tiin Bengal squad puanni khan a sawi chhuak a. Shabir Ali chu lungawi chiah lo mahse a mawiah ” Ka players thlanah ka lungawi tawk a, kan champion ngei ka beisei” a ti.
Bengal chuan chanchin sawi tur an ngah. Mizoram chuan chanchintha sawi tur kan neih ve chu kuminah quater final kan thleng ve tih te mai hi a ni. Bengal record neih that leh ropui zia sawi dawn ila sawi tur a tam ang. Mahse chung chu hunin a liam pui a. Tun hunah hian Mizo tlangval ten Bengal khel turin an taksa leh rilru, huaisenna zawng zawng sawm khawmin, tlawm duh ngai lo Mizo tlangval ten ‘tunah” Bengal an hmachhawn dawn.
West Bengal squad a player thawhhnem ber Chirag United players te khelh dan leh style zawng zawng hre thei tur, inhliam vanga Mizoram team a tel ve ta lo, Chirag United a khel lai S.Malsawmtluanga hian Mizoram team te hi tips engnge maw a pek ngei beisei ila. Inhliam vanga khel tam thei lo Ramluaha hian Mohun Bagan a a khelhpui thin te that lohna lai a hmuh kan bik lo ang a, Mizoram team enkawltu te hnenah ‘thurawn’ a pek beisei ngam chi a ni a ngem ? Beikhokhei, Robert, Fela, Didina leh Lajong players zawng te hian an hmachhawn fo tawh players hi an hre ve tawk turah ngai ila, Mizoram hian Bengal hi a hneh lo ang tih tunge sawi lawk thei ang le – inkhelh a zawh hma chuan !
