(Kha hei Chewing Gum ka rawn chhawp a, lo thial hlawm teh u. Tin, Ka tawngkam ka thlahdah deuh a, min lo hrethiam dawn nia)
‘Gentleman’s game’ ti a an koh ngat, Cricket leh a kaihhnawih hi i lo ngaituah ve ngai em ? Cricket hi India ramin a uar em avanga India hmuhchhuah emaw  ti ho khan khawvel ram changkang hmasa ‘Kumpinu’ kan tih England ho hmuhchhuah a ni tih lo hre phawt ula. Kum 1550 chho lai khan naupang hovin ‘creckett’ tih hming pu in an lo khel tawh ni awm tak a ni a, puitling ho chuan kum 1610 vel khan an khel ve tan nia a hriat a ni bawk. India ramah chuan  Mizo ten Tiau lui kan kan hma fe kum 1721 khan an khel tan a ve chauh a ni.
Khawvel hmun hrang hrangah Cricket hi England hovin an awp ramah an pu darh zel a. Cricket hi England hovin an ram awp hote hnena an thilpek (present) tha leh hlu ber a ni hial awm e. Mizo te ngaihsan reh theih loh, US ah te khuan  kum 1700 chho daih tawh khan an lo khel ve a, mahse tun thleng hian a lar hlei thei lova. US a cricket tih lar tum chu Vur ram a Ice cream zawrh thluk zetin a hralh a kal lo a ni.
Cricket – Game ropui chu : Cricket ropuina thuruk hi kan thiannu nu in ti hian a lo sawi a, “Cricket chu ball vawm (bowl) tin hi Football a penalty pet ang a ni a, a pawimawh em em vek a niâ€Â a ti. A ti dik khawp mai. Cricket ah chuan a vawmtu in batsman a vawm thi (out) thei a. Batsman in run a siam thei bawk a. Penalty-ah a pet tuin a pet goal thei a, goalie in a lo save thei tho bawk ang a nih chu.
Tu lam ve ve tan pawh a pawimawh  a, ball vawm tin hi thaw dep dep a en tham vek a ni. Cricket hi game hausa tak mai a ni bawk a. A chan dan (fielding) hi chi hrang hrang 50 chuang a awm a. Vawm dan ringawt pawh hi, a chak deuh a vawm chi (fast bowler) tan chi 9 vel leh a vawm vir ( spin bowler)chi tan pawh chi 11 vel lai a awm a. In tih thih (out) dan hi chi 11 lai a awm a ni.
Bekang sa leh Vawksa rep ?:  Heti zawng hian kan kaikual lawk teh ang, Sap ram chu sap ram a ni a, India chu India a ni. India ram kan awm chuan India-ah thil kan khaikhinna pawh awm tur a ni a, chu tehna hmang chuan thil pawh kan teh tur a ni. IPL kan sawi hian EPL rawn rawlh phet tum loh tur a nia, a tehkhin duh chuan I-league leh Santosh trophy tehkhin thin tur a nih ber chu.
India rama khel, Footballer lar ber pawlte kumkhat hlawh leh India Cricketer, regular player hlawh  hi six pay hlawh leh six pay lo hlawh inthlauhna nen tehkhin mah ila, a phak lo chai chai lutuka a fiah pha meuh lo ang. Khawvel pum huap ang chuan ‘Mob Game’, a sawi mawi nan a Football (Savun ham puar pet) te nena khaikhin chuan a lar lamah chuan lar lo zawk teh meuh mai. Mahse ‘Bharat hamara desh’ ah na na na hi chuan Football bazaar leh Cricket bazaar chu bekang sa leh vawk sarep dawr lun dan nen khaikhin ila a chiang mai awm e.
Mi thenkhat hian Indian Premier League (IPL) sawi hian in hmui in ner vei nawng nawng maw…IPL hlutna (brand value) hi kum 2010 hian $4.13Â billion (Rs 18,000 crore) niin an chhut a, khawvela League hlawh sang-2 na a ni. US a NBA chiah a phak lo a nih chu. Champion lawmman dawn hi a chu a ve lek chauh a ni a, player pakhat lei nan $1.5 million te an hmang ve a, thla hnih vel lek intihhlimna atan chuan a tlem chhe lutuk love.
IPL match a advertisement tih nan hian second 10 chhung in cheng nuai 8 atang nuai 10 lai a nih chu…a nuihzatthlak lo reuh khawp mai. EPL leh Champions League nen rawn tehkhin tawh suh aw, a tehna kan sawi tawh kha-India a nih kha, i duh leh I-League nen i rawn tehkhin dawn nia. Chutichunga i ngainepa sum tamna game in ngaisang duh hrim hrim a nih chuan NLF, Major League (Baseball) te khu ngaisang law law ula, EPL aiin pawisa a tam daih zawk a lawm le.
Savun ham puar  pet tui pui ve ho hi : Ka ka kan ang zau lawk teh ang, khawi nge Mizo zinga savun ham puar pet atchilh ho hi in sawt lawk teh ang chaw ei tui nan. Football tui pui inti em em Mizo vengva deuh zingah pawh Cricket sawi a nuihza thin khawp a mawl an la awm fo. EPL leh EUFA Champions league khel thinte hming hre hle si hian India ram Football Club tha ve a, Mizo footballer te khelna an hre mumal eng zat tak awm ang maw ? East Bengal leh Mohun Bagan te inkhel Zee channel vel a lo en ai chuan, Stadium nalh taka khawvel player tha ho, an man pawh Mizoram Plan Budget ai a tam zawkte tlankawi en vel chu ropui riau hian an hria a.
Kan Mizorama khelmual ve lah chu khawthat ni a khu, khawchhiat a diak a ni bawk si. A nihna takah chuan  hetiang hi chu TV a ei siam lai, tui hmel leh Vitamin tam hmel tawk en zawh chiah a, bengkang ro, a chakna bo vek khawp um uih leh Sangha rep fip tawk, chaknaa pai chu sawi loh pum tan pawh a tha lo tur zawk ei nen a danglamna awm love.
Champions League (Football) inkhel sitting room thutthlenga mu duai chunga, kuhva hring ei paha en a, zan khawtairek thleng thlenga men pui leh zing tlai tawka thawh hi enge a chankanna  vak bikna le. Heng Sap football khel ngaihsan a, India rama cricket leh football khel lo en peih loh tluka changkanna kebai, mahni ram tih dan aia ram dang tih dan ngaihsan zawkna hri chhia Westernization a awm chuang dawn em ni ?
Cricket leh India in ropui lam pan zel dawn : India hian ODI leh T20 ah hian khawvelah a thiam ber nihna chelh in World Cup leh Championship trophy kan lo hawn tawh a. Khawvela Test cricket-a thiam ber nihna pawh kan hauh mek a ni tih hriatreng tur a ni. Khawvel a cricket record nei tha tak takte zingah India mi an kak nuk a. Board lam pawhin ram dang ho zingah an ropui zia an lan tir mek zel a nih hi. Tin, India cricket board hi khawvela cricket board hausa ber a ni tih hi i lo hre ve bawk dawn nia.
A dik tak chuan, kan chawm bawk a, kan hawp bawk a, kan pal baw mek zawng a nih hi maw. A game te hi ‘Vai vawm’ ti reng reng suh  ang che u aw.. keini aia changkang zawk Australia, te, New Zealand te hlei hlei hian nia vawmna in vawm thiam ni. Chuvangin India rama i awm a, India pawisa i hman ve duh chhung hi chuan Cricket hi ngainep ngawt suh la. A ngaisangtute hi hmusit hek suh.
Cricket hi mi chhe te te ho ringawt in an ngaisang lova, mi hausa leh mi ropui ten an ngaihsan avang hian ngainep ngawt chi a nilo. Chuti ni suh se, India sumdawng hausa leh film star tam tak te hian an sum  tam tak an seng duh ngut ang em maw ni ? India leh Pakistan in remna  an sawi a piang in ‘Cricket Diplomacy’ tih sawi hi an bang tawh dawn lo.
Chutih lai a khawvel Football tournament upa ber pathumna Durand Cup tlakbak tawh zia hi fiamthu thawhna chi a nilo. India ramin hma a sawn zel a, ei leh bar leh thil tih theihna lam (economic and political power) ah khawvela ram thiltithei ber berte zinga tel ve dawn ta reng mai. Chuvangin India leh Cricket hi chuan ropui lam kan pan zel dawn a ni.
