‘thangthar tleitir zûna uai chu lu a hai,
luang thli chhem nghin iangin duh duh lam a hawi,
lunglem nei lo hian valtin hi zai hlan e
vangkhaw runin sumtualah a rawn lawi
tùn a sakhming hai lo-tuai thar lengi
Kan tunlai thangthar nun hi han belchiang teh ang u. Naupang kan lo changkan sawt zia hi. Hmanlai kha chuan hmeichhe naupang inchhung khawsak lamah an lo upat deuh hnuah chuan an tangkai em em a. Tui te an chawi a, an nute an pui a, fa u ber atan hmeichhia kha an duh deuh thin reng a ni. Lerh hi an hre har a ang ka ti thin kan tunlai thangthar nena tehkhin chuan.
A chunga hlathu khi i han belchiang teh ang. Tunlaiah chuan naupang chhiaa kan ngaih tam tak hi pawn lamah an lo naupang lo thin khawp mai. He thil hi nu leh paten kan hriat reng a thain ka hria. Miin han sawi se chu nu,chu pa fanu chu an ti a, fate en naupan lutuk na lamah kan mualpho phah ang tih a hlauhawm thin khawp mai. Thenkhat chu middle school an kal atangin ngaihzawng an nei tan a, kan fate hi middle school atang hian an thianghlimna hi an lo hlauh tawh mial lo maw?
Inkhawm rela kim te a lo chhuak si hian
vangkhawpui leh lenna tlang mualpui zawng hrut
tu nen lungrualin biahzai chu rêl ang maw?
tawk tein tlai loten siang lawi zai lo rel
chun leh zua bum mai le-tuai thar lengi
Nu leh pate hian kan fate hi kan hrechiang em le? Chhuanlam chi hrang hrang siamin zanah an chhuak a,tha taka awm turin kan ngai mai a,hahdam takin kan awm thin. Kan fate khan pawnlamah khan eng nge an va tih le? An chhuah chhan kha an va ti em? Nge an va vak kual mai mai? Ngun deuh hleka ngaituah a ngai a ni. Rilru hahdam taka kan chhuahtir kan fate kha an awmdan zel en theihin lo awm ziah ta sela pawi kan ti angem? Chutiang ni si ngatinge engmah ngaihtuah lova kan chhuahtir. Tunlaiah chuan naupang chhia hi pawnlamah naupang chhia an la ni chiah em? Nu leh pate inngaihtuah nawn leh ang u aw..
mahni tana chhia leh tha hre si lo hian
kim tea thaleng iangin nau ang lo nui
khuarei chan leh kumsul ang lo vei leh in
lunglai chhirin chunnu tang belzai lo rel
chunnun chhan a rel lo-tuai thar lengi
Kan fate hi kum lo vei leh se la engtin nge an awmzel ang? Kan ngaituah ngai em aw? Tunah tha awm takin an awm a,hun lo kal leh deuh sela siamthat theih tawh si loh,lungngaihna leh beidawnna vawrtawp kan tawk mai angem? Chutih hunah chuan inchhir eng ang mahse siamthat theih a ni tawh dawn si lo. I in enchiang phawt teh ang u.
Mahten lengin tu’n a sakhming sel lo se
partin lawrin thaleng dang chu zuam lo se
runhmun lenpui thai atan ka nuam ve e
mahse lungchhir, lenmawi zai a rel si lo
lung reng a ti awi lo-tuai thar lengi
Kan fate hi tha takin enkawlin hriatchian tum thin ila. An nun vengin theih ang tawk tawkin kawm tam ila,nakinah pasal tha tak tak an la hmu ngei ang. Mahse,an nungchang kan hriatchian loh a leiah mi khawloa siamtu kan ni leh tlat thin si. Mahni fate tuman mi khawloa siam kan duh lo theuh ang..mahse kan fimkhur loh avangin kan siam mek zawng a nih hi!
Dawn ti tam thlawn mai le..tuai thar lengi
Kan fate pawnlama an chetdan hi mi hian an lo hrechiang em em a. A rukin min nuih tih hre lovin inti eng nge maw takin kan la leng chhuakin,thenrual kan lo kawm em le..? I Ngaituah teh ang u.
