Tui hnà leh hnimhring inkiltawihna, hmun ro hulh hulh tudaia boruak hnâwng dai raih mai siam tura hermon daifîm lo tla te pawh chuan a thlan an tidai zo mawlh lo va.
Rûm sawi hleih theih lohva rûm käwk käwk chungin chu zân khawhar takah chuan, ‘Ka Pa duhzâwng tih hi ka chaw tui ber a ni,’ titu fapa thuawih Nazareth tlangvâl hmêltha chu vênpuitu nei lovin, a thlanfîm pawh thisena chang hial khawpin a lungngai a.
Gethsemani huan pâwn lam atanga thlifîm rawn tleh lût heuh heuh pawh chu a thlan thisen meuh tidai tur zawngin a tâwk zo mawlh si lo. Thlipui hau reha mitthi a kaihthawh lai hmutute ngei, a zirtîrte chuan zân vên khat chhûng takngial pawh an vênpui zo lo va. Vâna vântirhkoh thianghlim rualte chelh zawh loha ngei chuan vênpuitu nei lovin huan reh hnuaiah chuan amah chauhvin a pa a bia a.
A thlan, lungngaih luat vânga thisena chang far ri kauh kauh te, ‘I thihnaah thi ve dâwn mah ila, ka phat tawp lo vang che,’ titu zirtîrte muhîl hnâr ri bâk thâwm dang rëng a awm lo! Leilung dân ni lova thil mak a tih hmutu te, damlo a tihdam laia zui dùl dúltute chu kût sa lâwmin vêng hulum laiah an hlim êm êm pawh a ni mahnâ.. Chu’ng a hmangaihte vâng chuan a khawhar a tûl si.
Chungnungbera fapa pawh ni se,mihring famkima lo chang a ni a, hnêmtu a ngai ve tho asin! A tân chutiang tur rëng an awm si lo. A hmaa diriamna, chêksawlhna leh ‘thihna no’ chu a Pathiannain a hmu tlang vek a, a mihrinnaa tawrh tur a ni si a. Engti ang takin harsa ang maw..? Kan sual bawlhhlawh zawng zawng, kan dân zawm theih loh zawng zawng nen a phur tel bawk si a. Aw.. Chu lungngaihna chu a va rit duh dâwn tak êm! Thihna khawp hial lungngaihna tih loh rual a ni lo.
Huan pâwn lama thing ding thelh sung, thla êng chhun pâwt reih te chu an mawina lam ai mahin chu lungngaihna tâwmpuitu an ni zo tawh a. A siamtu lungngaia rûm mêk vâng chuan chu zân pawh chu zân lungngaihthlâk a chang zo ta si.
Phatsantu a lo lang a. Thiltiha felna hmanga vân kai tumtute leh sipai rothap tak takten an rawn zui a. Sual bawlhhlawh rëng rëng kai lo chu suamhmang nunräwng ber man tur ang maiin khandaih te, talhtum te kengin an lo thawk chhuak a. Thupetu chu thupêk awih takin a awm a, rorêltu chu rorêlsak tura hruaiin a awm ta a..
Rorêlna in chhûngah chuan lamtang rëng a nei lo. Dâwta sual tinrénga an hêk lai te chuan a kâ a âng lo va. Thiam loh changte vâng hian thiam thu sawi thei a ni si lo. Zahngaihnaa khat chu zahngaihna rëng rëng nei lovin an sawisa a. Hmuhsit theih tâwpin an hmusit a, an bêng a, chil an chhâk a.
Rorêlna lal tiang neitu chu luang tiang an hûmtîr a; Lallukhum chu hlînglukhumin a thlâk a. Chhiar sên loh vântirhkoh thianghlim rualin an fak nin loh kha, diriamna à nkâin ‘Judate Lal’ tiin elsen takin chibai an bûk a. An chêksawlhna tawngkam ringawt pawh thihpui tham khawpa tawngkam tûr nei a nih vei nen.
Hliam tidamtu-a chu hliam loh lai a awm ang tih hlau niâwm takin an vaw thuai thuai a. Khawngaihna mak, mawi leh duhawm neitu chu khawngaihna nei lovin mak theih tâwpa chêksawlh a ni. Hmangaih tâwp lova chu hmangaihna thinlung rëng nei lovin an diriam rawn ta si a. Mi fel famkim chu misual ber hremna kross-ah khenbeh tura a chungthu rêl a nih tâk chu!
A sîr tuaka elsentu hmêl kârah chuan kross rit tak puin luruh hmun an tih lam chu a pan ta a. Tuifinriat siamtu kha a tui a hà l a, khawmualpui siamtu khân Kalvari tlâng bâk chanvo a neih tâk loh chu! Ni meuh pawhin a èng a chhuah ngam lo va, khawmual pawh a rûm a, a khûr ta chiam a – sual zawng zawng tlantu Lal Isua Krista’n thlarau a thlah meuh chuan.
Tiau chhûm lan chhûm êm pawh daih lo hringnun derdêp tak hi, amah mai chuan thihna lui râl a kai zo lo. Chakna zawng zawng hloh zo tawh, theihna a neih ve chhun pawh hman tlâk miah loh a ni. Phur rit tak nena nun hmang chunga seol pante tâna a tawrh zozai te, a tuihâl leh a na tawrh tinréng te saw, ngun takin thlîr ang che.
Ka thian, Krista’n kawng khawhar tihbaiawm tak a zawh saw, ngun takin thlîr nawn fo vang che. Kan Lalpa tuarna kawng, Via Dolorosa..
(He thu hi ka thianpa, Chawnglianmawia Chawngthu ziah a ni a, kum 2010 Gov’t Aizawl College Annual Magazine-ah a chhuak tawh. Sermon vawi za chuang ka ngaihthlâk tawh aiin he thu vawikhat ka chhiar chhuah hian min hneh zâwk a, vawi tam ka chhiar chhuak ta! Ka sawisèlna ber chu paragraph hmasa ber leh paragraph tâwp ber inkâr zîm lutuk hi a ni..).
March 11th, 2011 at 9:24 pm
A ropui hle mai..