Sawrkar laipuia Tribal Affairs Ministry-in Mizo zirlai, degree course zir duh mi 150 leh Master degree course zir duh mi 40-te zirna senso a tumsak dawn. Hemi chungchanga sawrkar thuchhuah tarlan danin, Mizoram Youth Commission Chairman, Pu Hmingdailova Khiangte, MLA ngenna angin he thu tlukna hi sawrkar laipui chuan a siam a, he ruahmanna hnuaia zir tura thlante chu Admission fee, Exam fee, Hostel fee, Study tour senso leh Thesis chhutna senso zawng zawng tumsak vek an ni ang.
Degree Course zir tur, he ruahmanna chhawr tangkai thei turte chu Mizoram khua leh tui dik tak, Scheduled Caste emaw Scheduled Tribe emaw, kum 24 aia upa lo, an chhungkaw kum khat sum lak luh, Rs. 1,45,000/- aia tam lo, Pawl 12 zir zo tawh an ni tur a ni a, anni bakah hian Graduate tawhte chuan Master Degree course, a thlawna zirna hi an dil thei bawk ang. He duhsakna dawng duhte chu tun thla ni 18 chhun dar 12 khian, Chanmary YMA Hall-ah kal khawm tur a ni tih sorkar thuchhuah chuan a sawi bawk.
