Kum 2008 khan US Embassy/Consulate ah US tourist visa dilin ka interview ve a, USA nge nge visa dil interview tur pawh an tam hle mai. 7:30 a.m ah Office hawn tan a ni a, hawn hma darkar 1 vel atangin kan intlar tan a. Huphurh leh chak tawh bawk siin naupang atanga putar/pitar thlengin, mawl hmel taktak leh fin hmel tak tak te nen, a then sakhaw puithiam kawr inbelin, thenkhat coat suit leh necktie thlap nena file/document pawimawh zawng zawng zakzeh chungin kan intlar a.
Pawisa kan neihzat inhriat tawn sak lo mah ila, thenkhatte kha chu an rethei lo chiang a ni tih a hriat mai! Khang mi chi hrang hrang, hmeltha leh tha lo, hausa leh rethei, thiamna nei leh neilo te pawhin beiseina leh duhthusam kan neih erawh chu kan Visa dil theuhte min pawm sak se tih a ni. Mahse, thutlukna siamtu kan ni lo, diltu mai kan ni! Helaia ka sawi duh chu USA Visa hi hmuh a lo va har em! tih hi a ni.
Heti khawpa US Visa hmuh a har chhan hi sawi tur a tam awm e. Mawhpuh tur zawn phei chuan a hmuh theuh theih ang. Ka sawi tum erawh chu Mizo leh Mizote kan inpuh deuh thin nia sawi awm leh zauh hi kan hriatchianloh deuh vang em ni aw tih hi a ni. Mizoten USA kan kal tan tirh hi kum tam a la ni lo ang.
A awm hmasate hian a tam berah kum 50 vel bak an la awm a rinawm loh. Chhan hrang hrangin an kal a; a then Kohhran thil avang te, Inkhawmpui hmang te, zirna avang te, cultural thil avang te, zin ve hrim hrim avang te leh a chhan dang dang avangin USA hi Mizote hian an lo kal fo tawh a. Tun hnai 2005 hnu lamah hian Visa hmuh hi a har lehzual ta hle a, hei vang hian Mizo zingah USA kaltum an tam ang huin kal an tam thei lo a ni. A bikin ram thangmek (developing counties) atang leh ram hnufualte tan bik hian a har zual ngei a ni.
Ram changkang zawk a nihna leh pawisa hlutna avangte hian mitinte pemluh emaw chambang emaw duhna hi khuahkhirh nasat a ni reng a ni. Heti chung hian khawvel ram hrang hrang atanga kalte (dan anga pem) leh lutru (border cross) leh chambang(visa overstayed) tawk hi kum tinin an awm reng tho a ni. Mithiam tak (skill educated eg. engineers, doctor, scientist etc) tan chuan USA-a pemluh hi thil har em em a ni hran lo a, hei hi USA finna leh hmasawnna bul pakhat ani kan ti thei bawk ang.
Pemkhawm ram a nih angin USA-ah hian Khawvela mi chitinte hi an kim vek hial awm e. India atang hian an lo pemlut nasa tawh a, US ah hian thil tithei leh milar tak takte pawh an awm tawh a ni. Tuna Louisiana state Governor Bobby Jindal pawh hi Indian Punjabi thlah a ni.(Hindu sakhua atanga seilian, mahse a hnua Christian-a inlet a ni) India hi US-a pemlut tamber ram 4-na a ni a(Mexico, China, Philippines te dawtah), kum 2010 ah hian mi 1,610,000 vel India atanga pemlut awm tawh tura ngaih a ni. (i.e 4% of total immigrant)
Dan anga pemlut karah hian dan lo anga awm/pemlut hi an awm theuh bawk a. Kum 2008-a Central for Immigration studies in a chhutdanin Maktaduai 11 vel (11millions) hi USA ah hian danlo anga awm zat niin an sawi a. Kum 2005-a Pew Hispanic Center-in a report danin heng zingah hian 57 % vel hi Mexico atanga kalte an ni a, 24% hi Central America, 9% Asia, 6% Europe leh 4% chu ram dang zawng atangin an ni.
Central America ram (El Salvador, Guatemala leh Honduras) tihloh ah chuan India leh Philippines atangte hian dan lo anga awm an tam leh ber a, 2% vel ve ve an ni. India leh Philippines atang hi chuan USA a hlat avangin heng danlo anga awmte hi Visa overstayed an ni ber awm e. Kum li liamta (2006) khan India ram atangin mi 270,000 (nuai 2 sing 7) vel danlo-a awm tawh anga chhut a ni a. Heng zingah hian Mizo hi za (100) pawh kan la tling dawn em ni le? Heti chunga US Visa kan hmuhloh avanga a vannei deuh kalta leh chambangte kan mawh leh tawp hi chu kan hriatchhianloh deuh vang nge ni aw?
Khawvel ram ropui leh lar ber (Land of opportunity an tih thin) chu tutan pawh kal a chakawm a, keini mi/ram rethei tan phei chuan inhlawh theih a, chambang chakawm tak tur a ni reng a. Tunah leh nakina USA la kaltum tam ber zingah pawh hian chamhlen tum leh pem tum a tam zawk an ni hial ang. Tunah hian ram nuam leh hausa-a ngaih Canada atang pawhin Canadian (Citizen) mi 65000-75000 vel USA-a danlo-a awm anga chhut a ni.
Mizote chauhin kan chak lo, USA hi khawvela mi tamber kal duhna ram a ni. Hemi avang hian US thuneituten an ram venhimna an ngaihpawimawh em avangin duh duha kal theih a ni lo reng a. World Trade Centre an tihchhiat hnu phei kha chuan Visa hrim hrim (US visa hrang hrang) hi hmuh a har chho vek tawh a ni. Hei hi Mizote tan chauh a ni bik lo, Khawvel ram dang zawng zawng (ti mai ila) tan US Visa hi a hma aiin a har zual vek a ni.
US-a pem emaw danlo anga awm leh awmloh lam ka sawi tum a ni lo va, US Visa har lutuk hi keimahni(Mizo) vang a ni lo e; Kan vanduai a, US visa kan hmulo a nih pawhin Pathian remruat a ni hrih lo ve, tiin, Mizo leh Mizote i inmawhpuh(lek lek) tawh lo ang u.
Data & figure chiang zawka en duh tan….
http://en.wikipedia.org/wiki/Immigration_to_the_United_States
http://en.wikipedia.org/wiki/Illegal_immigration_to_the_United_States
