SMS hi mangkhâwng a ni em? Ka message tone a lo ri ral ral a, ka han en chuan ka nau message lo ni rengin. “Ka masturbate thin a, a pawi thei em? Ti lovin ka awm thei si lo va..’ Hei hi eng nge a awmzia?” tih hi a lo ni a, ka rilru a chhun zawk a. Ka nau, pawl sawm pass chang chang chuan a hrethiam lo tih ka hria, ka lawm rilru viau zawk a. “Kha message rawn thawntu kha kawm tawh lo hmak la a ni mai, tenawm lutuk. A awmzia pawh ka hrilh lo mai ang che” tiin ka chhang a.
Ka ngaihtuah zui veng veng a. SMS hi chhiatpui nge kan thatpui? Kohhran thalai pawl bakah tlawmngai pawl hrang hrangte hian committee koh nan te kan hmang tangkai viau mai a, anni tan chuan a tha lam a ni. Mahse, tunlai tleirawl la naupang te te nun hruai khawlo theitu a ni thei tlat.
A chunga ka ziah lan tak ang khi, la naupang te te te’n an dawng thin a nih chuan a va pawithui dawn em! Hrethiam lo mah se,hriat châka tuihâl an ni a, hriatthiam hun an la nei ngei dawn. Tuna ka nau ka rawn sawi tâk pawh khan dictionary a keu ngeiin ka ring.
Chanchinbu tam takah hian ngaihzawng zawnna huang (matchmaker) a awm deuh vek tawh a. He’nga a tam zawk hobby-te hi han en teh u, sms type, sms reply tih a ni fur tawh. An thian duhzawng pawh sms thian a ni hlawm. Hei hian thil \ha lo tam tak hrin a nei. He’ng tleirawl tê tê te hi a ni, nakin lawka kan ram hmel tur leh kan ram hruaitu tur chu!
Nu leh pate kan pawimawh leh ta ber. Fate tihtur kan pe lo lutuk te, awmpuia kan innghat lutuk te hi a pawi a. Faten an awh avang maiin an duhzawng kan leisak a, kan ngaihthah leh si. Hei hi sual kawngkapui a ni fo.
SMS zûnah an uai ting a, pack man tur an nei lo, tam tak chuan an hmeichhiatna chu cheng tlemtein an hralh phah \hin. Phone avang ringawta inzuar hi Mizo tleirawl zingah engzat tak awm ang maw?
Hurna kan tih hian kan lo ngaih ang aiin kan tleirawlte-ah bu a lo khuar nasa fe tawh tih hi i awih ngam em? Ka awih phal lo naa, ka awih tlat. A dik zia pawh ka hmu a, ka hrechiang. Hei hi SMS vang a ni vek lo naa, tam tak chu a ni. Hmeichhia, SMS zûna a uaia a pack leina tur a neih si loh chuan mahni inhralh bak eng nge tihtur awm chuang? Tam tak chuan bialpate thunsak hi an duh lo ve tumhrang bawk si a.
A bul ber chu nu leh pa ka ti a ni, kei chuan. Misualte, SMS hian kan ram thalai/tleirawlte a tichhia in ti em?
Taka, ka nau pawh remchang hmasa berah sim card hran ka thawn nghal vang vang ang.
