Indian footballer lar te hian khawvel an dai kual ve hle a, hetiang taka an larchhuah hma hian eizawnna kawng dang pawh an lo dap kual ve hle mai a. Thenkhat phei chu hna hniam ve tak taka ngaih te pawh a ni nual hlawm. Indian footballer te chanchin tarlan hmain khawvel huapa larho hi han telh zuai ila. Hollywood star lar Tom Cruise pawh hi a lar hma chuan chanchinbu semtu a ni thin a. US diplomat Colin Powell pawh hi furniture dawr nghaktu a ni ve thin.
Manchester City manager hlui Stuart Pearce pawh kha electrician a ni thin a. Bury FC leh Sheffield manager hlui, England vela Bhaichung Bhutia kal theihna, Neil Warnock pawh khan tunhma chuan England ah chawhmeh a zuar thin. Tunah chuan ramchhung lam footballer thenkhat eizawnna kalsan tak te chu han tarlang ve thung ila.
IM Vijayan :
Indian football a hmaih theih miah loh, sawi hmasak pawla tang ngei ngei, Kerala lam chhuak Vijayan hi vawithum ngawt ‘Best Footballer of the Year’ award dawng tawh a nih bakah ‘Arjuna Award’ pawh a lo dawng tawh a.
A hlawhtlin hnu hi kan hria a ni mai a, tunhma chuan football stadium velah cold drinks te a zuar thin a. Hetiang hnu hian football khawvel chu a luhchilh ve chauh a ni.
Shasty Duley :
Bengal midfielder tha, 2003 ASEAN Cup a East Bengal champion theihna atana tangkai ber pawl, tuna Mohammedan Sporting club a khel mek hi tunhma chuan loneitu a ni thin.
Samir Naik :
India team in Portugal an tlawh tuma tel pha, Samir Subhash Naik hi tunhma chuan restaurant pakhatah waiter a ni thin a. A thawhnaah hian Dempo SC hotute an chawl thin a, Samir hian a lo bepawp ve tawp a, trail neiin an lalut ta nge nge a ni.
Subhashish Roychoudhury :
Mahindra United goalkeeper thin, Dempo SC zawm ta, Subhashish hi India ramah chuan goalkeeper tha bera sawi a ni pha hial tawh a. Tunhma chuan an chhungkaw chawm nan ar vulhna hmunah a thawk thin.
Anas Edathodika :
Mumbai FC defender Anas hian EMEA College, Kerala ah lehkha a zir lai chuan amah leh a chhungte chawm nan auto rickshaw a khalh thin.
Kailash Patil :
Maharashtra lam tleirawl Kailash hi 2007 Santosh Trophy ah a che tha hle a, tunah chuan Air India striker niin I-League velah a che tha thei hle mai a. A hmaa a eizawnna bawnghnute sem aiin football lam hi a thlang ta zawk a ni.
Basudeb Mondal :
Mohun Bagan leh Chirag United midfielder hlui hian tunhma chuan Mohun Bagan jersey ha chungin a pa thingpui dawr a nghahpui thin.
