Hruaitu nih hi thil hahthlak tak a nih hmel a. Ram khat han hruai ngat phei chu a hahthlak dan tur zia hi ka ngaihtuah mai mai thin. Chuti chung chuan ram hruaituah(CM) ka ngaituahnain ka han indah chhina, hna ka ngah nghal khawp mai.
A hmasa berah chuan hruaitu tha nih ringin mipuiin min han thlang tlinga. Sorkarna kan han siam a,ram khata hotu ber(CM) ka ni ta ruau mai! Rinawmna thu ka han tiama,CM office ka luaha. Hna ka thawk tan dawn ta.
Ram khat hotu ber ka han nih chinah chuan mipuiten ka thu leh hla an ngaithla thap mai si a,ka tawngkam hman ka fimkhura,ka tihtheiloh tur chu sawi mai mai ka duh lova. Term leha ka tlin leh duh vanga ka tawngtam chuan term lehah ka tlak phah dawn avangin ka tih theih tur chin chiah ka sawi ang.
Mipuite tihlawm dan ka thiam lova,ram erawh ka theihtawpin ka enkawl dawn a ni. Eirukna phoro ka tum thu ka sawi lo a,mahse ka sawiloh avanga eiru an awm a nih chuan ka ngawi bo mai mai lo ang. Ka ram thatna tur an pumpuia an lo thuna,an lo thau phah avangin an thau chu ka sawk anga,ka ram chu ka ti mawm ang. An ngam chuan an eiru anga,an thil tih man erawh an tuar a ngai thung ang.
Ka ram a intodelh theihna tur lam thil hna hmasaah ka nei anga,ka lei sak leh theilohtur mipuite ka chin tir mai mai lo bawk anga. Thalai hna hmuloh avanga iak iak thin te chu ka fuihpawrh lo anga. Hna kan neilo an rawn tih vaih chuan ‘kan rama vai ho hian eng nge an rawn tih?’ tiin ka lo zawt let ngei ang. Vai mahin hna an hmuh chuan mahni ram ngeia hna hmuhloh bikna tur a awm lo.
Sawrkar hnathawk ho ka en thlithlai anga,an hna an thawh thatloh chuan chhawr zui tlakah ka ngai miah lovang. Ka ram thatna tura hlawh neiha ka rawih anni dawn a,ka ramin hma a sawn phah dawn si loh chuan hlawh ka pek reng kha ka bat a ni bik hleinem. Hun vawngdik turin ka chah zui anga,an mahni entawn turin hun erawh ka vawngdik hmasa thung ang.
Ram khat hotu ka nih chinah chuan a hma ang khan ka awmthei dawn tawh lova,hunawl pawh ka nei thei tawh dawn loh avangin thlam leh sangha dil ka neihin awmzia a awmdawn lo tih ka hriaa,chuvangchuan thlam leh sangha dil erawh ka hmaa mite ang lo takin ka nei ve dawn ta lo.
Thalai,nakin lawka min rawm thlak tu turten ka ram chu an la rawn rochun ve dawn a. Chung thalaite chu nunkawng dik an neih theihna turin hma ka la anga,an intihhlimna tur ang chi ramdang tihdan ka enkual anga,siamsak tumin ka ministry chuan theihtawp kan chhuah ang. Thalaite khawvel a ni tawh si a.
Ka sorkar chhungin nuar an awm ve ngei anga. An nawrh chhan ka zirchiang anga,chinfel ka tum ang. Mahse,an thawh aia tam hmuh tum an nih vaih erawh chuan a tawp kan thleng dun zak thung ang.
Mipuite ka ngaihtuah anga,ka VIP an nih thu erawh ka hrilh lo ang. Ka sorkar chhungin eizawnna mumal an neih theihna turin kan theihtawp kan chhuah ho anga,an tumna a pawimawh thu ka hrilh ngun anga. Tum chuan a theih tih kan thupui a ni ang.
Hetianga ka tih avang hian term lehah ka tlin loh phah a nih pawhin pawi ka ti lo. A tihlawm theih zawng zawng tihlawma,ka ramin a chhiatphah ai chuan term lehah ka tling lo mai zawk ang!
