Zoramah hian pangpar a tam hle a. ‘kan tlangram parvulna’ ti hialin an lo phuah a nih kha. Thenkhat parmawi em em,nula hmeltha tehkhinnan pawh a leh lutuk ang..hetiang chu mihringin a mawizia kan tluk phak lo tihtur awm khawp a ni hial a. Thenkhat erawh lungtileng em em a ni leh bawk si. Thal laiin han hawikual ila vaube a lo par tuar hi chuan lung a leng tlat thin. Kan mizo pangpar chi hrang hrang hlaa an thailan zinga tel ve lo,kan buaipui tak em em chu ‘anthurium’ hi a ni awm e.
He anthurium hi kan mizo tualto pangpar a niin ka hre lo a,nise chuan ‘kan tlangram parvulna’ tihah khan a tel ve ngei ang. Ka ngaihdan chuan mi hauhsa tuemaw zinin a rawn hawn anga, chu chu kan intihhmuh ta a ang khawp mai. A nalh titu tan chuan nalh pawh a nalh ang. Thenkhatin sum siamnan an hmanga a lawmawm a,kan thil thawnchhuah tam pawl pawh a ni maithei.
Pawi ka tih tak ber erawh chu kan rama pangpar nalh tak tak lo awm tawh sa hnualsuata hetianga hnamdang pangpar kan tuipui ta chiam hi a ni. Kan milian nu hovin an tuipui em em a,hei vang hian lar pawh a lar niin ka hria. Mahse,kei ka hmuhdan chuan kan mizo pangpar tualto ho hi mawi ka ti zawk a,that pawh an tha zawk ka ti bawk.
Hmana MNF sorkar khan ‘ANTHURIUM FESTIVAL’ kha an siam a,pui pawh a pui mep mep khawp mai. Khatia hlim taka hun an hman lai khan kan thlah tute thlarau,min chenchilh reng tuten engtin ngai ang maw? Ka ti thin. Kan thlahte tan tiin kan nun thap tak meuh meuhin ram kan lo venghima,anni chuan hnamdang thil hmangin kût an siam ta maw..tiin an rilru a nat ka ring. Ni e,kan ramah pangpar tam tak,nalh tak tak a tam a,chutih laia hnamdang pangpar kan buaipui ta viau hi mak ka ti tlat thin.
Kan ram pangpar hi belchiang teh ang u. Chul zozam te hi..tuma tuh lohvin a lo to a,ngaihsak leh chawm lohvin a lo thanglian a,par a rawn chhuah mai te hi ropui inti ve thin em? Chhawkhlei par te pawh hi van ruahtui dawngin a lo nunga,leithaa chawm lohvin a lo lian a,hetiang khawp hian hmeltha tehkhin theih khawpin a lo mawi thei a sin.
Ti zawng hian ngaihtuah teh ang u. Anthurium chu miin leitha nen,tui nen tha takin a chawm a,parmawi tak a rawn chhuah thin. Kan ram pangpar leitha leh tui chawm a,uluk taka enkawl ni ve miah lovin hetiang khawpa parmawi a chhuah thei a nih chuan uluk takin enkawl ila a hralh tlak ve viau lo maw? Lo hralh chhuak ta ila kan ram tualto a ni tih an hria anga,khualzin hiptu tha tak a ni thei dawn bawk a ni. Ka sawiduh tak zawk chu lakluh phawta thawnchhuah ai chuan a awmsa thawnchhuah hi a tha ka ti mai zawk a ni.
