Min han hmu chu danpangaiin a lû a kun leh ta! Mahse, a kùn tak na-a a mit-kó dinglama zung li bawk vel zeta sei sèr fiah zet mai, a hmel ti chhe pha hial khawpa hliam alo tawrh tawhna hnuhma chu ka hmu chiang leh kher mai.
He mi hi hmuh fó ka duh lo, a damchhunga reh ngai reng reng tawh lo tura a hmaiah sèr ka siam sak avangin. Min zah vang leh min hlauh vang pawh ni lo, a rilru nà avanga min hmu/ en duh lo ani si. Hetia ka hmaa a kùn ta tlat zel hi a thiam loh mah nise, ka lakah a rilru ala nà reng tih ka hai si lo. Chù a hmai sér avang chuan vawitam rilru hreawmin ka awm tawh a, thil tamtak ka zirchhuah phah tawh.
Hmanah chuan ban phar meuha ngaihdam min dilin, ka lakah a tlawm ngei a, tunah erawh a lakah kei ka tlawm ta niberin ka hria! Anihna takah chuan khàmi zan khan, ‘hnehtu’ ti a mi sawi leh hnehtu ni a inngai ka ni. Tunhnuahah hian hnehtu réng ka lo ni nèmaw! Hnehtu ni loin, sawisatu lèk ka lo ni tih ka inhria.
Kum 1986, Zankhat chu : —
Kan khaw nuthlawi hmeltha leh zei, fiam nuam bawk si– Mahlimi dawrah chuan, zandang ang bawkin nula rim aia nuthlawi dawra titi ho thlahlel pawl, tlangval thenkhat an ri leh ta ham ham a. Kei pawh Kuhva leh Sikret ilo lamin, dawr kawtah chuan ka tàp vel mek a. Fiamthute thawh vein, kan nui dàr dàr a.
“Khawi, kal sawn rawh” tih phaha ka kawr hnunga rawn tham a, vawilehkhata min rawn pawt dawrtu chu tunge anih réng ka hre lo. Inrin lawkna nei lo ta chu ka thal chiang kher mai. Tukhum lei chèk chawrh hian ka tlu nia mawle. Kei, khaw khat tlangval lian pawl lo ni ve ta chu ka zakin ka tlawmla kher mai. Zawimuangin ka tho a, ‘zawngchhepa Sawma, eng nge i pawi ka sawi?’ tih leh a tukhum sama tham ka rual a. (Amah hi kan khaw tlangval sual, hnawksak zet mai ani)
“Palian chu an zaidam” tih lam alang tawh lo. Mihring ve bawk lo ni ta chu pawisak leh thluakfim hmang hman tawh bik hek lo i, tha leh pumrua-ah min khan lo ropui mai si a. Dawr tukverh tlangah a lù sawhkeh vek ka tum hial a, vawikhat ka’n tauh tir a, thisen a per chuai! Dawr neitunu a ràk tuar! Midang anlo tre thawt! A chal tauh tir ka tum kha alo tan ve vang nimaw, a mit-kó dinglam chu a kak duai a, thisen a rawn dir zung zung a. “Min ngaidam rawh. Ka tlawm e… Ka tlawm e.” a ti ta chèlchùl a, ka thlah rual chuan vawi khat chu ka’n khi-lai leh hram a.
He ka thil tawn anga ka zirchhuah :–
Tharum leh pumruaah chak zawk ka nih avanga mi ka hneh emaw ka tih hian, hnehtu ka lo ni rèng rèng lo. Chutia’ng bawkin, ralthuam leh hmanraw neih that zawk vanga hnehna chang intitute hi, hnehtu diktak an ni ngai lo. Sum leh Pai nei zawk i nih avanga mi i va hneh emaw i tih khan, hnehtu i ni lo. Nihna sang zawk leh zir sang zawk kan nih avanga hnehtu emaw kan tih hian, hnehtu diktak kan loni hauh lo.
Mi, a thinlung kan va hneh chuan si loh chuan– hnehtu niin inhre mah ila, hnehtu diktak kan ni ngai lo ang. Hnehna dik chu Thinlung inhneh sak hi ani si a. He, ka mi-tawn ngei pawh hi tharuma bei lèt mai khan, awka-a zaidam taka a thinlung hneh lo tum hmasa ta zawk ila, hnehtu diktak, vawiin thlenga hnehna changtu ka lo ni mai tur.
