Hè Ar hi “Rualkhuma ani. Thla 4 leh Kar 2 zeta Upa ani a, (Thla 2 ah Kg 2.5-3.0 an ni tlangpui) tunah hian Kg 6.2 a rit ani. A sentèt atangin a rualpuite zingah a thangdùang bìk em em a, a chaw làk a tha a, a chakvàk bawk a, “Rualkhuma” ka ti mai thin. Ka fakna em em chu : chak lo zawk leh tè zawkte a ti-ná ve ngai lo a, a pumraw len leh chakna avangin a mihringpuite… Ooh! a arpùite zingah a inla chàm ve ngai lo.
Tunah hian thih hun nghakin a kún mêk a; hetia a thla ka làk zawh rual hian a nunna chu làksakin a awm dawn ta! A sa ei tumte’n chil lem khulh khulhin an chàng mék ani. Nimin maia chaw leh tui tûi ti taka tlan puar èl-euh a, nizan lama tui taka mu chu vawiinah chuan beramnò ang maia talh leh firfiak pawl miman ang maia a nghawng tan sak ani dawn ta! Nunna hi alo va derthawng em! Ar hi ka talh tam ta malh malh hlè a, vawiin thleng hian ngaiah ka la nei thei miah lo nia.
‘Eng èm kan ti lo ang… Pathian zarah ka la dam zel ang…’ tiin, kan thla a muang hlè ringawt a! A ni, thlarau khawvela chantha beisei tur nei réng réng lo mah zaidam leh nunnèm, tú pawi mah sawi loa a damlai ni-te a hmang liam thei anih chuan, keini, kan damlaia kan thil tih a zira rorèlna la hmachhawn tur nang leh kei hian, nun uluk ava ngai em! Tih tur leh tih loh tur kan va ngah tehlul em!
( E, Ar kengtu khi keimah ka ni lo a nia. :smile: )
Hringnun–
He khawvela kan hmangaih bèr berte nen hian, eng ni-ah emaw chuan thlanmual lam panin kan la inliamsan ngei dawn! Kal hmasa nih kan hlau a, a hnuhnung nih lah a chakawm hauh si lo. Taima takin kan zir a, chhel takin kan thawk a, thahnemngai takin kan inkhawl a, engmahlo mai alo ni si. Ti hian ka dàwn thin. Buh tuh lo chunglèngte’n ei an hmu a, hló thlo lo ransate’n an nghei bik hek lo. Thlantui sèng lo nungcha tinrengte’n puar khawp an pháng lo a, enkawl loh pâr tinte’n pàr an chhuahna khawvelah hian– keini erawh kawla nichhuak chhiara feh a ngai a, thlantui fara thawh a ngai a, thahnemngaia beih fàt fàt a ngai si. Hmmm… Tia’ng reng reng ‘Hring’ nih aichuan kei zawng, Luité damdiaia chan mai ka nùam e. Chutin, a sá apiang rawn inchiahdai-in, a hàl apiangin min dàwt khawlh khawlh dawn zu nia!
Similar Posts:
- Ka ‘kham’ vang ni lovin ka ‘kham’ thin..!!!
- Hmeichhe fin in tuikhur ral a kai em?
- Retheihna – I
- Sawhchiar
- Lungawilohna khawvel nge lungawina khawvel ?
August 29th, 2010 at 8:01 am
He thu post atanga ka rilru a lo lang te –
1) Rualkhum tur hian mi-bik chu an awm. lehkha zirna lamah pawh hian mi-bik an awm mi-naran, mi-vantlang te thiamthei deuh te kan awm bawk. chutiangin eizawnna lamah pawh hian ani, Pathian thu hriat theihah te pawh, politks ah te pawh ani zel.
2)Hring-fa te hi kan chunga rorelru hian kan hun tawp atih a thlen chuan hreh teh mah ila kan kal a ngai tho tho dawn. Chu hun thlen hnu chuan Rorelna paltlang tur kan ni. Hei vang leh khawvela kan damlai kan nunpui te avang hian nun uluk hi a pawimawh. mahse kan inchhirna tur hi kan ti fo si. Siamtu hmuh-ah chuan sual bik leh tha bik kan awm lo kan felna lai ber pawh pawnchhe hnangkhai ang ani si. Tlawmna nen Pa ang-chhungah kan in pumpek a ngai.
3)Khawngaihna leh lainatna kan neih hi Pathian atanga chhuak ani. khawvel tak pawh hian khawngaihna leh lainatna nei ngah mi hi chu han belchiang ila kan ngaisang thin. Ringlo mite pawh hian khawngaihna leh lainatna hi an nei.
4)Taima tak leh chhel taka hnathawk tur hian Pathian anchhia kan dawng. A rah kan seng a phal. Hetah hian ramvak mi ah pawh sa kaptu an awm, a phur hawnpuitu an awm, a sa pel pui an awm, hlado chhamna a khua an chuan ruala a kalpui an awm, in lama sa chantu an awm, chhumtu an awm, a sa ei an awm a hleh dawngtu an awm, mahse a kaptu chu Sa kaptu ani tho tho. Chutiangin artalhtu pawh Pathian ruat ani.
5) Hring nun han bihchian hi chuan mite tana hahdamna nih hi kan duh thin mi hnawksak nih aiin
A seita lua kan duhtawk ange kei misual tlailamumpawngpar hian
Report this comment
August 29th, 2010 at 12:30 pm
A rilin a va tha thin em aw…!
Report this comment
August 29th, 2010 at 4:01 pm
Awmzia a van nei tha ve a… rawn post zel teh khai…
chanchhinbu lamah te chhuah theih se minawlpui hian chhiar thei ila keini misual te chauh lo hian, a van tha dawn tak em…
Report this comment
August 30th, 2010 at 1:49 pm
va bei tha ve !! Mahse rim taka hna thawk tur hi ni lo i la, hringnun hi a va ninawm dawn em. Hna kan thawh hian kan hlim thina,Nausen piangte hian min ti hlima, an tap te hian khawvel a tikim a, mithi te hian,Pathian hnaih a ngaihzia min hriatnawn tir a, engkim mai hi Pathian remruat a ni a, a thuk zia leh san zia hi kan hre phak lo.
Report this comment