Thlamuang takin nupuite kiangah an awma, hlim takin he khawvel hi nupui fanaute nen an hmang ho thin. Duhthawh takin he khawvel par hi an tlan a, an hmaah enge lo thleng dawn tih ngaihtuahna nei lovin he khawvel hi a eng zawngin an thlir thin. Ral rama nunphung hlauhawmzia hre lovin ‘darfeng val’ tih an hlawh thin. Ral ramah kal ta se engtin tak awm ang maw?
Zingtian bawhar zai tin thiam a lo zai,
Zan mu tho ru, hmelma ral a hrang e!
Ram hmangaih valrualten raltiang an kai ta e.
Chhailai lungdi tawn lehni tur tiamin,
Biahthu an hlan, aw intawng leh ang maw?
Mahse chhuihthangvalan, ti hian biahthu a hlan ta.
Khatia ram ralmuanga awm thin kha rambuaina hmunah kal turin kohna lehkha a dawnga. Chhang lo thei a ni lo! A lehkha dawn chu a han en a, lehlamah a chenpui a nupui fanaute a han en a. Tuboh leh dolung inkar nunah chuan thlan zawk tur ngaihtuah turin thluak fim hman a ngai tawh a ni. Chutah chuan a nupui fanauten rual an awh hlauin ral rama kal turin rilru a siam ta!
Thla hleinga zan a nia, van boruak lah chu a thiang em em a, thenkhat tan chuan lunglen avanga luaithlinul a awl ngei ang. Chu zan chu chhungkaw pakhat tan chuan zan lungngaihthlak a ni. A tukah chhungkaw pa ber chuan ral ramah a liamsan tawh dawn. Zanin hi an chhungkua hlim taka an awmkhawm hun hnuhnung ber a ni angem? Chuta chiang ber chu engmah a chiang lo tih chiah a ni.
Zing a lo ni a, chhungkaw pa ber chuan in chu a chhuahsan ta. Ral rama kal turin lirthei chungah chuan a chuanga, a ngaihtuahna erawh a fa leh a nupui bulah a dah tlata. Intawn lehni tur an tiam hun nghak reng chungin ral ram chu a thleng ta.
When you go home..
When you go home..
Tell them of us and say..
Ral ramah chuan awmhmun an han siamfela, hmelma chetdan zirin, hmelma ti tlawm turin hna an thawk dawn a ni. An awmhmun hlauhawm zia hrethiam turin an thiante an khawvel nun an thlah tan ta phak phak mai le..
‘Hringnun hlimten i hman ve nan,
Fam khawpui ka lawi ta e’
Hrailengten zuapa tangah pawmin
Biahthu an hlan lam ang let leh turin..
Mahse hmangaih mamte, duhthu i sam sual ta maw!
Hmelma luahchhuah an tum bawka silai pawh a puak nasa ngei mai. Chung silai puak karah pawh chuan a fa leh nupui bulah a ngaihtuahna a awmreng a, theihnghilh theih a ni lo.
Silai a ri dawt dawt a, pa pakhat chu a rawn deng fuh ta! A tlu tawpa, tanpui turin a thiante an rawn tlana, chhan theih a ni tawh lo! Thuchah sawi ngaihthlak a hun ta. ” kan vangkhawpui lamtluang zawha lam ang in let leh hun chuan mite hnenah he thu hi sawi ang che u- hlimtaka he khawvel parmawi hi inchen theihnan keichuan ka nun ka hlan ta” tiin. A sawi zo hman tihin a fa leh a nupuite chu then tawhlohna khawpuia hlimtaka an nun an hman theihnan an chenna tur buatsaihin a kal ta!
Ral rama an kal dawn lai hunah let teh ang u. A fa leh a nupuiin lungchhe takin an thlaha, hlim taka inhmuh leh ni nghak turin rinawmtaka awm turin a nupui nen thu an tiama. A fa chu a pawm a, a fa chuan lo haw leh vat turin a chah bawk a nih kha. Nie, a haw leh ngei e. Mahse, a inchhung, khawvela nuam a tihna berah rei pawh awm lovin khawhar taka awm tawh turin thlan hmunah an kalpuia. An zalh ta! He khawvel hi a nupui leh a fate khan engtin tak rawn hmachhawn ang maw?
