Mi{5ual}.com ah hian thlalak hmuh nuam tak tak, ram thla leh pangpar lam te kan hmu fo thin a. Tun ţum chu thlalak lungchhiatthlak lam ve thung ka lo share teh ang che u. Keima lak erawh a ni hauh lo a nia.
He thlalak lar tak hi i lo hmu fo tawh thin mai thei. March 1993 daih tawha lak kha a ni a. Sudanese hmeichhe naupang, ţam tuar lai thla a ni; Hetia chhun ni sen sa hnuaia chawsemna lam pana a bawkvak lai hi mulukawlh phakar hmel tak, thau tha zet mai hian a tluksawp/thih hun chang in a lo thlir dauh dauh mai a ni. A thlalak a kan hmuh ang hian severe Malnutrition (chaw tha hmu lo) a ni tih a hriat ngawih ngawih a. Engtia thui tak bawkvak ang maw! Chhiar zawm zel teh.
He thla la tupa hi Kevin Carter, South African mingo a ni. Kevin Carter hian chanchin ngaihnawm tak tak a ngah khawp mai. I chhiar zau duh chuan smiley hi click keuh la- 🙂
Sudan rama indona avanga ţam nasatzia chu khawvelin hria sela a tih avangin 1993 khan thla la turin a va zin a. Vawi tam tak a camera a hmeh hnu chuan thingbuk hnuaiah a hahchawl a. Chutia a chawlh hahdam mek lai chuan a awmna piah deuh hlekah hian ngik feih feih thawm hi a hria a, a va en phei nak chuan hmeichhe naupang khawngaihthlak tak, thei leh thei lova chawsemna hmun lam pan tura a bawkvak lai hi a va hmu ta a ni.
Chutia a en reng lai chuan mulukawlh vir hmel zet mai hi naupangte hnung lawkah chuan a rawn tum ta mai a. Kevin chuan a camera nen a tin renga. Mulukawlh hian a thla a tih pharh beiseiin minute 20 vel lai chu a nghak nghe nghe a ni awm e. Mahse a tih pharh tak loh ah chuan ti khian thla chu a la ta a ni.
A hnua a sawi leh danin he thla a lak zawh hian hmeichhe naupangte hi a bawkvak chhunzawm leh a. Kevin hian mulukawlh hi a hnawh bo sak ta a ni. Tichuan a chawlhna thingbuk lam pan chuan a let phei san leh ta a, zial a zu a, lungngaihna thuk takin a rawn zem a, a ţap ta zawih zawih a ni awm e.
He thlalak avang hian chawimawina sang tak, ‘Pulitzer Prize’ an tih chu a dawng nghe nghe a ni. Mahse he a thlalak, chawimawina hial a dawn phah na a hi a tan hlawhtlinna nge vanduaina thlentu? tih chu chhut tham tak a tling a ni.
Mi hriat a hlawh phah a, hna thar pawh a hmuh phah ngei mai. Mahse chawimawina a dawn atanga thla 14na lek ah depression nasa lutuk avanga mahni intihlum a chhar a ni. A chanchin tlem leh a ‘suicide note’ chhiar duh tan smiley hi click tur- 🙁 Kum 33 mi, Kevin Carter hian a nupui leh a fanu a kalsan a ni.
He thlalak hi copy sang tamtak siam nghal a ni a. New York Times in an chhuah hmasak ber ţum chuan mi tam takin ţam tuarte ţanpui nachang an hriat thar phah ta a. Thenkhat erawh chuan Kevin hi an dem hle. Kevin hian Mulukawlh lakah danglamna a nei chuang lo an ti a ni.
“Camera lens te adjust na hun nei si, naupang kha pawm lawk se, a thlen tumna hmunah chuan va dah lawk mai awm,” te an ti a ni. Mi thenkhat chuan he thlalak a an thilhmuh ţihbaiawm tak mai hi awih harsa an ti lutuk a, Kevin hian a duang chawp a nih hial an rin thu te an sawi bawk.
He hmeichhe naupang hian a tum hmun hi a thleng ta em? A damchhuak em? Tun hnuah eng nge a an chhoh zel? Hetianga mulukawlh chaw a ţang ta mai hi naupang khawngaihthlak dang engzat tak awm ang maw? tih zawhna te chu a rawn lut ruih ruih a. Kevin pawhin chhan ngaihna a hre bik lo. Engnge i ngaih ve dan le?
