Hun leh roin min khawlh avangin hun eng emaw chen mi{5ual} ka felsan a, ka fel hlen dawn emaw tih hnuah ka lo sual leh ta! Mi tih danin – hei hi ka vei ve em em thin… a ni hran lo!
Zo tawng hi thlûk nei a nih avang hian lam dik a harsat rualin a ziak lamah phei chuan a harsa lehzual a. Mi tam takin an thuziahah, a chhiartuten an chhiar dik an duh luat avanga thlûkna dah chiam mai an ching a (tumah ka khéng lo a nia!). Hei hi thil tha tak a nih rualin, thlûkna lai tur apianga thlûkna dah chu a hnawk hma em em a, mit a tikhamin chhiar a harsat phah letling thei a ni. Chuvang chuan kan thuziah reng rengah, thlûkna kan dah loh avanga chhiar sual theih, awmze dang daih kawk thei ang chi-ah chauh hian dah thei ila, a fel faiin a chhiar pawh a nuam zawkin a lang.
Ama’rawhchu (la ti leh hram teh ang), thlûkna kan dah hian, a chhiartuten an chhiar dik kan duh avanga kan dah a nih chuan, a thlûk dan tur leh thlûkna kan dah kha inmil thei sela. Entir nan, thlûk chho, thlûk chhuk, chhuk-chho, chho-chhuk, adt. hi a hmanna hmun thliar hram hram ila, chhiar dik a awl lehzualin a rinawm. Thlûk khamphei hi chu kan hmang vak lovin a lang, a aiah thlûk chho kan hmang tlangpui a, a pawina a awm lem lo a ni ang. Thlûk chhuk-chho pawh kan hmang tam lo hle. Tin, thu chu thlûk ngai pawh ni se, vowel a awm záwn a nih chuan dah a ngai lem lo.
‘Tiang deuh hian…
Thlûk chho hmanna:
1. Sár a zám elo?
2. Tlabungah kan pém dawn.
Thlûk chho-chhuk hmanna:
1. I thupêk hi a buarchuar tlat. (Hetah hian buarchuar tih hi kan thlûk ngei mai a, mahse vowel (ua) a awm zàwn avangin dah a ngai lo)
2. Thoma chuan a nâkah a zen a.
Thlûk chhuk hmanna:
1. Ka pàmtùl ta dêr mai.
2. I uite ràn dan mai mai chu! (Ràn tih leh dan tih hi a thlûk a inang chiah a, mahse chhiar sual awlsam a nih lem loh avangin dan-ah hi chuan thlûkna dah kher a ngai lo)
Thlûk chhuk-chho hmanna:
1. Băk kan háwl dawn.
2. PÄt an thlawk sup sup mai.
A hre ber ang ziazangin ka han tlak ta duah a nih hi. Kum riat chin chung lamin a comment theih e!
