September 6, 2010 a Mizo Society of America in Mizo Day kan hman liam takah khan kan ram hruai tu zahawm tak Chief Minister Pu Lalthanhawla te nupa in min rawn hman pui kha a lawm ber pawl ka ni in ka in ring. Kum danga MSA office bearer ka nih ve thin laiin kan ram hruaitute hi vawi eng emaw zat Mizo Day min hman pui turin sawm an ni tawh thin a. Remchan lohna a awm ziah thin. Tun tum chu CM Pu Lalthanhawla’n USA Mizo te min rawn ngai pawimawh hi ka lawm em em a lo kal ngei tura hma la tu te zawng zawng chawimawi an phu ka ti a. Tin, zo taka kan khual liante lo thlengtu Pu Lalzawmpuia Zadeng te chhungkua hi an fakawm ka ti hle bawk a ni.
Aw le, MSA member ka nihna ah kan ram hruaitu lu berin USA Mizo te min ngai pawimawh a Mizo Day min hmanpui tura a lo kal tur kha ka lawm em avangin a phu ang tawka ropuiin kan dawng sawng lovang tih ka hlau em em mai a. Chuvangin mipui te hmuh leh hriat lovah sum leh pai, tha leh zung leh hun bakah ka thiam thil te leh ka bungrua neih that te thawhin theihtawp ka lo chhuah ve a. Ram hruaitu lu ber lo kal ta chu Mizoram lama chanchinbu mi te ngaihven a hlawh em em bawk a.
Evening Post leh Doordarshan a chanchinthar lawr khawmtute’n CM program leh hun hman dan leh thlalak te puan zar tur an duh avangin an hmel hriat Laldinpuia Ralte kal tlangin ngen na an rawn siam a. MSA hruaitu te rem tihna in kan CM leh MSA a ropui thei ang bera chawimawi duhna rilru nen thlalak chi hrang hrang 8 leh video clip 2 leh program awm dan thu ziak tawite chu September 6, 2010 zan khan email in Evening Post leh Doorsharshan ah chauh hian ka thawn chho a.
An ni pawhin ‘In zarah USA Mizo day chu heta tang kan lo hmang ve thei dawn a ni . . .’ tiin lawmthu min rawn hrilh nghal nghe nghe a. Mahse, a tuk deuh lawkah tute emaw in thlalak ka thawn chhoh thenkhat te kha lo la chhawngin Congress leh Pu Lalthanhawla sawi chhiat nan an lo hmang ta vak mai tih ka hria a. Hetiang thil hi ka ngaihtuah phak bak a ni. Leh lamah chuan Pu Hawla hi politician a ni tih kan hre theuh a, Mizoram mai pawh ni lovin khawvel ram tinah political parties leh politicians te chu nitin in sawiselna tur zawng tawn reng an ni tih ka hre bawk a.
MSA pawhin a ngai pawimawh a, kei pawhin pawi ka tih em avangin Mizoram Congress a hmel hriat te kan han bia a. ‘E, hetiang te chu ni tinin a awm lawm, politics anih hi. A reh leh thuai mai ang,’ an lo ti a. Amaherawh chu kan khuallian kan zah a ni tih entir nan leh a thlavang hauh nan Congress Bhavan thu rawn angin MSA chuan September 9, 2010 ah press release a chhuah a, a copy pawh USA Mizo te chuan kan dawng theuh anih kha.
Heng thil thlen hnuah buannel.com ah September 14, 2010 a post ‘Chief Minister zahawm kan thleng’ tih article ah thlalak chungchang hi rawn thai lan a ni tih a tukah mi ka atangin ka lo hria a. Political parties leh politicians in chirhthehna boruak atanga lo chhuak ani tiin thu tak khuka khuk pui tlakah ka ngai lova. Mahse, September 16, 2010 ah ka hun awl tawite ah buannel.com ami ka mit ngeia he article ka han chhiar chu thu dik lo tamtak a lo inziak teuh mai tih ka hmu a.
A ziak tu leh kei hi politicians/party activists ni ve ve ila chuan heng thu hi ka en liam mai mai ngei ang. Amaherawh chu kan pahnihin politics lama in hnam hnawih lo ve ve kan ni chauh ni lovin a ziak tu hi ka hriat danin kohhran a in hmang ve tak a ni a. Chuitiang mi in thu dik lo behchhana rilru chhe thei ang ber min put tir chauh ni lovin kohhran lama ka in hman zia te thleng a sawi lan tak si ah chuan kohhrana ka rawngbawlna te a ti hmel hem thei dawna ka hriat avangin ka ngai pawimawh ta a ni.
Ka tawngtai a, ka rilru hre chiang tu Pathian ka neih avangin ka thla a muang a. Amaherawh chu article ziaktu leh chhiartu zawng zawng te’n thil awm dan diktak an hriat tul tihna ka neih avangin a ziak tu hi ka va ko a. Rilru in hawng takin kan in bia a, thil awm dan diktak ka hrilhfiah hnu chuan a tih dik lohna ah thu pha a chawi a kei pawh ka rilru a dam thlap mai. Mahse, khaw khata awm si in thu dik hre tura min rawn be mai lo hi pawi ka ti. Engpawhnise, September 16 hma a article lo chhiar tawh tamtakin a ngaihdam dilna te in hmu lo mai thei a. Chhiar tu te’n thil awm dan chiang taka in lo hriat ve tha a ka hriat avangin hei hi rawn ziak ka ni e.
Ka lawm e. –Runremliana Chhakchhuak
