Kum 2008 kum tawpah khan Mizoram-ah Member of Legislative Assembly thlanna neih a ni a, tunah hian Congress sawrkar (MLA 32 nei) chuan thla 19 vel ro a lo rel ve ta der a, hetih hunchhung hian eng hmalakna lian tham nge awm? tih te, eng harsatna lian tham nge awm? tihte thlirlet ila, New Land Use Policy (NLUP) flagship programme bera an hman erawh chiang bangin an la kalpui lo a, sports lama hmalaknaah erawh sawrkar hmasa an khum viau niin a lang thung.
Grape Wine Zawlaidi chu September ni 15 khan tlangzarh tum a ni a, mahse Horti leh Excise lam thuneitute inkar a la fuh chiah loh avangin a la buai a, hei hi a buai rei chuan nghawng thra lo a neih a hlauhawm. Minister mal te te thlir ang.
Chief Minister Lal Thanhawla: Ani hi sawrkarna an din tirh atrang khan a zin nasain khuallianah a trang hnem hle. CMO-a hna thawka thru tak zawka chu a nau parliamentary secretary Lal Thanzara a ni awm e. NLUP chungchangah mipui ‘moral’ siam hmasak ngai nia hriaiin CM hi Mizoram hmun hrang hrangah a zinkual nasa hle.
CM a nih hnu hian Delhi Five Star hotel-ah dinner hi trum hnih vel a siam tawh a, Singapore-ah zinin ‘I’m a victim of racism’ tih a sawi niin an sawi a, mahse India rama a rawn kir leh hnuah chutiang a sawi lo niin a sawi leh thung. USA lamah Mizo Day a hmanpui a, Limo car chhunga an nupaa an chuang chuan Apple Cider an in a, chu thlalak chu Mizoramah darhin mipuiin an buaipui hle.
CM hian Mizo mipuite rilru puthmang chu siamthrat ngai nia hriain nasa takin hma a la a, hetiang kawngah hian a thawhhlawk hle. Sawrkar hnathawkte pawh trum tam tak kokhawmin an hmaah eirukna chungchangte leh thrahnemngai tura fuihna thute a sawi thrin a, hetiang kawngah hi chuan thawhhlawk tak niin a ngaih theih. Mahse a chang chuan a thusawite ngaihthlak ngun deuh chuan a ‘pessimist’lek lek em aw a tih theih. CM-in theihtawpa zina hma a lak theihna chhan hi a nau Parliamentary Secretary Lal Thanzara thawhrimna rahte pawh niin a lang tel thei bawk.
CM hi Finance Minister a ni nghal a, kumin 2010 budget session neih trum khan sawrkar pawisa cheng vaibelchhe 68 lai a lapse a, hei hian hmasawnna kal tur a thra lo zawnga nghawng a nei thui hle.
CM hian Finance, Planning, PWD, Power, Vigilance, GAD, Seretariat Administration te a enkawl. Power bikah hian Mizoram hmun hrang hrangah tuikhuah tumna lian tham tak kalpui tum a ni, hmalakna thra viau mahse mi tam takin agriculture tihna ram a chim nasa lutuk tur an hlauthawng ru hle.
R. Lalzirliana: Ani hi Home Minister a ni a, Home bakah hian a lian thamah chuan Rural Development department pawh a chang tel. Home Department chungchangah ‘police kut phuar phelh a ni’ tiin a aupui nasa hle. Kum 2009 September thla khan Vairengtea police station sakna tur chu HM bial Saituala sak tum a nih avangin buaina a chhuak a, Vairengte mipui leh Police an innawrin kut an inthlak chiam.
Home kaihhnawihah hian Bungthuam naupang Zarzokima chu kum 2009 November ni 13 khan Tuikukin an kaphlum a, hemi avang hian buaina a chhuak nasa hle a, HM lamin chak taka hma lain tunah hian Tuikuk raltlante lakkir leh chhawmdawlna pek pawh kalpui mek a ni. Home lam hmalakna a thra thawkhat hle nia hriat a ni.
Khingte bakah hian Home bikah hian mipui leh police innek zauh zauh a awm, kumin June thla khan Tanhril VC Lalpiangliana chu police lam kuta a awm hnu lawkah a hliam vangin a thi a, Tanhril mipui leh police an inep a. Hemi hnu hian Falkawn 5th IR leh Falkawn khuate chu an intibuai bawk. Hei lo pawh hi khawtlang leh police lam inep a awm zauh zauh. Home hmalaknaah hian Hachhek bialtu Parliamentary Secretary Lalrinmawia Ralte hi sawihmaih lo ila, ani hi ngaihtuahna fim tak hmang leh belhchian dawl a ni a, Pu Zira pawh hian a hlawkpui niin hriat a ni. RD lamah hi chuan minister hian ‘NREGS leh a dang danga eirukna a awm chuan hrem an ni ang’ tiin tuna Favang session neih mekah a sawi a, an hmalaknatein sawisel a kai lem lo niin a lang a, fak hluahna tur pawh a awm rih lo niin a lang.
Zodintluanga: Ani hi Youth & Sports Services, UD&PA, I&TC, I&PR changtu a ni a. Congress sawrkara minister-te zinga chhuanawm ber zingah a tel ang. Catch Them Young policy thar kalpuiin naupangte chu infiamna chi hrang hrangah hmun leh thuam pek an ni a, an hlawkpui chho mek zel a ni. Hei bakah hian Rajiv Gandhi Stadium chu Mualpuiah sak tran niin a hmun an laizawl mek a, September ni 22, 2010 khan Aizawl Sipai Lammual chu artificial grass phah turin hna tran a ni bawk, he hna hi thla thum chhunga zawh fel hman tum a ni.
Sports huangah hian Rifle kahna international standard siam te, phai lama infiammite tirh tur English zirtirna pek hmasak te leh Mizoram hmun hrang hrangah infiamna hmun buatsaih kalpui mek a ni. I&TC lamah hi chuan Aizawl daiah Software Technology parks siam a ni dawn a, thui tak hmalak a ni tawh. UD&PA leh I&PR lamah pawh hma a la chak hle.
H Liansailova: Ani hi Agriculture, Horti, Soil & Water, Minor Irrigation, Fisheries etc. changtu a ni, sawrkar hna sang lo thawk hrep tawh leh pa dik tia sawi thrin a ni a, thawm nei hluai lo mahse mite rin a ni. NLUP bikah hian a department chan hnuaia mite hi an pawimawh hle a, hengte vang hian inzirtirna (workshop etc) an kalpui nasa hle.
Ani hi KS Thanga, parliamentary Secretary-in thawhpuiin KS-a hi a zin taima hle a, a hmunah an department chante hi a tlawh hnem tawh hle. Serlui B-ah an hmalaknain Sangha nuai 20 chuang an chhuah tawha nakin lawkah sangha mantute tana hlawkna tur a ni a, MI bikah hian tuikawng an sial hnem hle, an hna ala thra thawkhat a, sawrkar hmasa lam aiin hmasawnna thar hmuh tur a awm zeuh zeuh bawk.
Lalsawta: School Education, Higher & Technical, Taxation, Law & Judicial changtu a ni. Kum 2010 Technical Entrance Exam result dik lo nasa tak vangin banna a thehlut a, mahse CM-in a pawm lo, chumi hnu lawk chuan a chanvo pakhat Taxation erawh JH Rothuama chanah a hlanchhawng thung. Sawrkar laipui hmalakna zulzuiin Rights to Education Act chu Mizoramah kalpui a ni a, zirlai naupangte dikna chanvo humhalhna siamin pawl 10 hnuailam tan board exam tihtawp a ni.
Hei bakah hian Education Reforms Commission din a ni a, anni hian report an thehlut a, Mizoram zirna siamthrat dan tur an rawt. Law & Judicial lamah hian thil lian tham han hmuh tur a tam lutuk lo, Mizoram sawrkarin MLA R Lalrinawma hovin Law Commission a din a, hei hian report-te an siam bawk. TEE exam trum hnih zet a hun laiin a dik lo tawh a, hei hian minister record a nghawng niin a lang. Ani hi Parliamentary Secretary fel tak Chawngtinthanga’n a trawiawm a ni.
Lalrinliana Sailo: Health & Family Welfare, Trade & Commerce, Labour & Employment changtu a ni. Health bikah hian a thawhhlawk hle a, Congress-in an policy-a an tarlan leh Lal Thanhawla lo sawi lan tawh mipui medical-reimbursement chu tunah hian kalpui leh mek a ni. Hei bakah hian BPL tan sawrkar laipui scheme RSBY behchhanin medical reimbursement hi an kalpui bawk.
Falkawn Referal Hospital hluihlawn mek tawh chu thawm thrat dan tur ngaihtuahin hma an la a, Cancer Hospital chei changtlun tumin an thawk mek bawk. Trade & Commerce lamah hian minister hi a trang hle a, ASEAN ramte nena insumdawntawnnate kalpui a nih theih nan Myanmar lamahte leh khawchhak lamahte zinin a fehchhuak a, tunah hian South East Asia ram pasarih ambassador-te chuan Mizoram an rawn tlawh bawk. Labour & Employment chu a pawimawh avangin tunah hian tihlen tum mek a ni. Minimum Wages Board chuan kuthnathawkte chhawrna hlawh bi thar siam an tum mek bawk. Ani hi S Laldingliana, Parliamentary Secretary zei takin a pui.
PC Zoramsangliana: Art & Culture, Printing & Stationery, Transport enkawltu a ni. Art & Culture bikah hian kum 2010 Chapcharkut neih laiin Cheraw-ah World Record siam a ni. Hei bakah hian Mimkut hman an tharthawh bawk. Art & Culture hian sawrkar laipui atrangin Library dinna tur sum thrahnem tawk tak hnukchhuakin chumi sum hmang chuan library tam tak siam tum mek a ni. Transport bikah hian lirthei chhinchhiahna felfai taka neih a ni a, computerized vek tawh niin license pawh kum 2010 chhungin smart card hmang tih vek tum a ni. MST bus chu mimal hire theih a ni tawh bawk.
JH Rothuama: Cooperation, Land Revenue & Settlement, Excise, Taxation changtu a ni. Ani hi a thawm a zawi viau naa a tirah a chan loh Taxation leh Excise hi pekbelh a ni a, minister rintlak tak chu ni ngei tura ngaih a ni.
H Rohluna: Forest, Food Civil Supplies & Consumers Affairs, Supplies lamah hian theihtawp chhuahin hma la mahse buhfai leh gas a van miau avangin H Rohluna hi sawiselna leh beihna a tam deuh. Tun china a thawh thrat viau chu buhfai hralhruk man chungchangah a ni a, buhfai hralhruk leh special permit tihtawp a ni. Hei hi threnkhat erawh chuan chawkluh a tlem vanga khuahkhirhah an ngai thung. Kumin hian furlaia rin tur (monsoon stock) buhfai chhek khawl loah minister hi puh a ni. Forest department bikah hi chuan hmalakna la thra rih viauin a lang a, han che chak viau tia sawi theih a ni lem lo a, mualphona liantham sawi tur erawh a awm lo thung.
S Hiato: Ani hi Industries, Tourism, PHE changtu a ni. Politician senior a ni a, a talbuai lem lo. GAWSS Phase-II-ah Contractor leh PHE deptt inkarah buaina a chhuak chiam a, a chinfel a hautak hle niin a lang. Industries lamah chuan hmachhawp an ngah hle a, entreprenuers mithar lak tam an tum a, an hmalakna hi nakinah chuan la thra chho viau tura ngaih a ni. Tourism lam pawh a buaipui viau a, mahse mi tam takin kan tourism ‘approach’ hi a la fuh lo an ti thung. Ani hi Zothangliana’n parliamentary secretary niin a trawiawm.
PC Lalthanliana: LAD, Social Welfare ani hi Council of Minster niin LAD bik hi chu a department hi tihtet deuh tial tial a ni a, a chan chinah rau rau chuan a hnehsawh thawkhat a, Social Welfare Department hi thawktu an thra bawka tunah hian thra taka kalpui a ni a, a trangkai hle a ni.
Nihar Kanti Chakma: Vety, Disaster Management & Rehabilitation, Sericulture, Vety bikah hian hmalakna thar hmuh tur a awm nual a, Aizawl bikah chuan sathianghlim zawrhna hmunte siam thar a ni a, Slaughter House pawh hman mek a ni bawk. Disaster bikah hi chuan 2010 hian chhiatna a thleng nasa hle a, Minister tan pawh a luhai thlak viauin a lang, mahse a thawk thra thawkhat niin a lang. Sericulture lam pawh hmingthrat hluaina leh hmingchhiat hluiana a awm rih lem lo.
