28th September, 2010: Vawiin chawhma dar 11.00 khan Sinlung Indigenous People Human Rights Organisation leh Mizoram hmar lam tlangdung mite huaihawtin Chanmari kawn atangin kawng zawh a ni a, Tuiruang leh Tuivai khuah tur chuan hmar lam tlangdung khaw 14 a khawih chhiat dawn avang leh tuikhuahin hmar mipuite tawrhna nasat tak a thlen dawn avangin tuikhuah tumte hi titawp turin an ngen a. Vawiin hian Chief Minister Lal Thanthawla hnenah Memorandum an thehlut nghal bawk.
An memorandum thehluhah chuan Mizoram hmar lama awm Sinlung Hills huam chhunga lui te leh lui lian zawng zawng- Tuiruang leh Tuivai-Tipaimukh Dam (1500 MW), Tuivai (210 MW), Tuirial (60MW), Serlui (12MW), Tuivawl (40MW) te khuap vek tura sawrkar hmalakna chu a hmun luahtu mipuite hnena chhiatna rapthlak tak thlentu a nih dawn avangin ti tawp turin sawrkar an ngen.
Manipur-in Tipaimukh Dam Project a kalpui mek chuan Mizoram hmar tlangdunga khaw 14 laite chu luah tlak lohin a tichhe dawn tih an tarlang bawk a, chung khuate chu Sawleng, Darlawn, New Vervek, Sailutar, Sakawrdai, Khawlek, Vitin, Vanbawng, Khawpuar, Suangpuilawn, Ratu, Phullen, NE Tlangnuam leh Lungsum te an ni.
“Kan dam khawchhuahna tur, kan nun hrui min chhahsak tum angah kan ngai a, chu chu kan remti ngai lo ang,” tiin Memorandum-ah chuan an tarlang.
Hmar mipui aiawhte chuan ngenna siamin lui, ram, thing leh mau, ramsate leh nungcha tinrengte him taka an inthlah chhawn zel chu hmasawnna leh damna tur a nih avangin tuikhuah chu an phal loh thu an tarlang.
“Hmasawnna hming vuaha a ram mite ral hlenna tur projects tam tak ruahmanna awm mekte hi tihawp vek ni se, kan ram leh kan hnam humhalhna turin sawrkar hin Constitutional Safeguards tha tak siam hmasa rawh se,” an ti.
Hmar mipuite chuan Dams siamnaa hmalatu Mizoram sawrkar, corporation leh company chu inhnukdawk vek turin an nawr bawk.
Memorandum-ah hian hmar tlangdung khuaa NGO hrang hrang YMA, MUP, MHIP, MZP leh zirlai pawl dangte leh Village Council Member-te’n hming an ziak hnan bawk.
=====
Thu belh: Tukin zing dar 7:30 khan MP (Lok Sabha), MZP Gen. Secy hlui ni bawk CL Ruala chuan MZP Pisa hmun Treasury Square, Zenics office bula mi chu a tlawh a, MZP ten office hmun nghet an nei ta leh a sakna tur DoNER Ministry atanga Cheng nuai 170 chuang an hmu fel ta chu lawmawm a tih thu a sawi. MP hian MZP te chu zirlai pawlte inpui an nih angin Mizoram pawna zirlai pawlte kuahkhawm tura a duh thu a sawi bawk. MP hi MZP hruaitute bakah chanchinbumi thenkhat ten an tawiawm a ni. MZP chuan kumin hian kum 75 an tlinna Platinum Jubilee an hmang mek.
