mi(sual).com

1st. Wednesday: An lo tum lawk tawh dan angin MIFCO hnathawkte chuan thla sarih hlawh an lâk theih loh avangin tiamchin awm lova office kai loh an tan. Hetih lai hian mi thenkhat chuan, ‘Sumdawng an ni a; hlawh lak nan chauh an thawk aniang chu, a remchan lai hian thiat daih sela a ni mai alawm,’ anti.

2^nd. Thursday: Synod Finance Committee thut­khawm vawi 93-na chu Synod Conference Centre-ah neih a ni a, Synod Moderator Rev. C Chawngliana’n a kaihruai. He hunah hian, Synod sum kum kal mek, April – August, 2010 chhunga sum hmuh tawh zawng zawng chu Rs.2,24,197,427.00/- a nih thu Rev. Zosangliana Colney, Finance Secretary-in report pein a tarlang.

3^rd. Friday: Science Promotion Wing SCERT leh Birla Industrial & Technological Museum, Kolkata chuan ‘India & World Science : Are We There?’ tih thupui hmangin Chanmari YMA Hall-ah State Level Students Science Seminar vawi 30-na an buatsaih a, Education Minister Lalsawta’n a hmanpui.

4^th. Saturday: Chief Minister Lal Thanhawla te nupa chuan USA-a Mizo Day vawi 25-na Siver Jubilee (6^th. Monday) hmanpui turin Washington DC, USA an thleng a, Mizo Society of America hruaitute leh Indian Embassy-a Head of Councellor leh Head of Chancery ten an lo hmuak. Chief Minister hian USA-a mi pawimawh hrang hrangte a kawm nghal ang.

5^th. Sunday: President hlui, zirna lam a mi tangkai S.Radha Krishnan pianchampha anih avanga chawimawi nana tih Zirtirtute Ni (Teachers Day) a ni a, India ram hmun hrang hrangah he ni hi hmangin, President Pratibha Devi Singh Patil chuan Vighyan Bhawan-ah zirtirtu hna thawk thate chawimawi-na National Award a hlan a, heng zingah hian Mizoram atangin zirtirtu tha thlanchhuah pahnih Ngurthankhumi Sailo, Aizawl leh Rozika, Lunglei-te an tel. Teacher’s Day hi Pathianni a nih avangin Mizoram-ah chuan school hrang hrang te’n naktukah an hmang ve chauh dawn a ni.

6^th. Monday: Thla sarih chhung hlawh lak theih loh vang lungawilova pisa kai  chawlhsan lailawktu MIFCO-a hnathawkte chuan Mizoram sorkar-in an hlawh atan cheng nuai 250 a pek avangin pisa kai an chhunzawm leh ta.

7^th. Tuesday: Brig. SK Verma, 23 Sector Assam Rifles-a Commander chuan   Ailawng-ah Mizo Pasaltha huaisen Khuangchera hriatrengna lungphum a phum a; Khuangchera Memorial Committee Chief Patron, Prof. Laltluangliana Khiangte lehkhabu ziah “Mizo Patriot Khuangchera” chu tlangzarh nghalin Pasaltha Khuangchera chu Mizo tan mai nilo, India ram tana martar dik tak a nih thu a sawi bawk. He lehkhabu hi Mizo tawng leh saptawnga ziah niin Ailawng khaw mipuite chuan an khaw pasaltha Zofate zalenna atana a nun hlantu chawimawia a awm chu an lawmthu an sawi a ni.

8^th. Wednesday: Pu John Rotluangliana, Deputy Speaker chuan Commonwealth Parliamentary Conference vawi 56-na neihna a tel turin Nairobi, Kenya khawpui panin Aizawl a chhuahsan.

9^th. Thursday: Chanchinbu mi anga insawia mi bum thin, Rozarliana Hmar, Ramhlun Vengthar chuan chanchinbu mi anga insawiin mi bum a tum leh a, mahse anni hian an lo hrechhuak sia; a ni hian an hre chhuak tih inhriain a tlanbo ta a ni. Rozarliana hi chanchinbu mi anga insawiin vawi tam tak mi a bum tawh a, mi challang leh politician-te inah kalin, a interview hnuah pawisa a dil thin. A lakah hian MJA-in FIR a thehlut tawh a, police pawhin man thin mah se, bail-in a chhuak leh zel nia thu dawn a ni.

10^th. Friday: Chief Minister mawhphurhna la mektu, R Lalzirliana, Home Minister hoin   Chief Secretary Conference Hall-ah  Cabinet meeting neih a ni a, ACB a police awmte tan Special Incentive pek an remti.

11^th. Saturday: Indian Dental Asso­ciation, Mizoram State Branch chuan Dinthar Veng hall-ah a thlawna ha entirna an buatsaih. Free dental clinic hi Hospital & Medical Education Director, Dr D Baruah-in a hawng a; ha doctor 40 rualin mi 500 chuang an en a, ha phawi ngai eng emaw zat an phawisak bakah, ha hnawh ngaite an hnawhsak a, a thlawnin damdawi an sem bawk a ni.

12^th. Sunday: Hortoki khawtlang hruaitute chuan sorkarin Mizoram atanga Tuikuk tlanchhiate lâk lêt turah, Hortoki leh a chhehvela chhungkaw 138 dah belh a tum chungchang an ngaihtuah a; Hortoki vela Tuikuk chhungkaw 138 dah belh chu remti loin, chhungkaw pakhatmah awm belh tawh lo turin an rel. Hortoki Jt. YMA President, Lal­ringliana chuan, “Tunah hian Hortoki ram chhunga Rajdali (Zodin)-ah Tuikuk chhungkaw 86, Dilzau-ah chhungkaw 32, Tiauzau (Thosibawk)-ah chhungkaw 15, a vaiin chhungkaw 133 an awm,” tih a sawi a; chhungkaw 138 dah belh leh a nih chuan, Hortoki khaw mipui zatve vel an tlin theih dawn avangin, Tuikuk dah belh an duh lo tih a sawi a ni.

13^th. Monday: Chhun dar 12:30 vel khan Tuikual ‘B’ Muala HB Ramtiama leh Lalhmangaiha te in inkar kawng chhak lamah lei a min a, he leimin hian HB Ram­tiama fanu, R Laltanpuii (33) chu chhilhin, a hmunah a boral nghal.Leiminin Laltanpuii a chhilh hnu hian veng chhung tlawmngaite’n chhanchhuah hna thawkin, an rin zawn a, minute 20 hnu velah an la chhuak thei a ni. Chhanchhuah hna thawk tur hian police lam pawh Aizawl South SDPO, J Lalmuankima hoin rang takin an thleng bawk a, hmunhma tihfel ngaite tihfel a nih hnuah, Aizawl Civil Hospital-ah post-mortem a ni. He chhiatna thlenna hmun hi Cabinet Minister, Zodintluanga, veng pa ni bawk leh DM&R Minister, NK Chakma ten an tlawh nghal a; Aizawl DC aiawhte leh Central YMA hruaitu thenkhatte an kal nghal bawk. Minister NK Chakma hian tanpuina Rs. 1,000/- a pe a, MNYF President Lalruatkima, Dr Lalkailiani, Tuikual MHIP leh PC Rokima ten Rs. 1,000/- theuh tanpuina an pe nghal bawk.

14^th. Tuesday: Mizoram Truck Ow­ners Association chuan Bawngkawna an office-ah Mizoram hmun hrang hranga kawngpui a chhiat lutuk avanga harsatna an tawh dan leh an mangan dante an sawiho a, Mizoram kawngpuite chu siamtha thuai turin sorkar an phût.

15^th. Wednesday: Governor MM La­khera chuan “Driving the People of Mizoram to Self-Employment” tih thupui hmanga Mizoram University conference hall-a seminar buatsaih a hawng.He seminar hi In­dian Council of Small Industries (ICSI), MZU-a Department of Extention Education & Rural Development leh Mizoram En­tre­preneurship Net­work buatsaih a ni a. A hawnnaah hi ICSI Secretary General, Prof. KK Sarkar-in a kaihruai a; MZU hotute leh Sikkim Manipal Technology-a Management Studies HOD te pawh an tel a ni. Seminar-ah hian MZU Department of Economics-a HOD, Prof. Lianzela; Dr Ajeya Jha, KVIC Mizoram Director, RK Dhamija; Industries department Dy.Director, Lalzabiaka; MSME-Development Institute-a Asst Director, DS Kambhre; MEN Secretary, Joseph L Ralte leh, ICSI Secretary General, Prof. KK Sarkar ten paper an buatsaih zirho a ni.

16^th. Thursday: Chief Minister hlui, Zoramthanga chenna in, Ramhlun Venglaia mi chu Anti Corruption Bureau (ACB)-in an dap. Zoramthanga chuan, a in ACB-in an dap chhan chu ACB leh Vigilance-te pawhin chhui tlâka an ngaih tawh loh, politics-a inbeihna avanga tharthawh leh a ni tiin, “Hlauhthawn tur a awm lo,” a ti.

17^th. Friday: Sports Minister Pu Zodintluanga chuan Mizoram Snooker and Billards Association  Hall thar Sikulpuikawn a mi chu hawngin, International Standard Snooker Table, Mizoram State Sports Council hmalakna a an neih chu a tlangzarh nghal.

18^th. Saturday:  Ruah tam tak a sur avangin tlai dar 5:15 vel khan Rangvamual thlen hma deuh, four lane-ah Lalhmingliana (38) s/o T Tlanthanga, Ramhlun North chu tuihâwkin a lên a, hun eng emaw chen zawn a nih hnuah thia hmuh a ni.

19^th. Sunday: Mizoram Synod hnuaia Senior Department naupangte chuan anmahni bial theuhvah inkhawmpui an nei. Hetih lai hian an hnuaia department dangte chuan chawlhni hmasa( 12^th. Sunday) lam khan inkhawmpui hi an lo hmang tawh thung a ni.

20^th. Monday: Mizoram State Election Commissioner C.Ropianga chuan Aizawl Municipal Council (AMC) inthlan hun atan November ni 3, 2010 ruat a nih thu a puang.

21^st. Tuesday: Nimin 20^th. Sep. atang khan naktuk 22^nd. Sep. thleng tura Europe khawmualpui leh khawvel hmun hrang hrang a Scientist te leh Business Biotechnology lama mithiam filawr zali (400) chuang te fuankhawmna hun Central European Congress of Life Sciences Eurobiotech 2010, Krakow, Poland- ah neih mek a ni a; hetah hian Tv. H. Lalhruaitluanga (Mahruaia) S/o Pu Lalrithanga, Zohmun, Mizoram,  tuna Ph.D (Plant Science) University of Hyderabad a zirlai mek  chuan Research Paper “Potential use of Melocanna baccifera (Bamboo) raw and activated charcoals for removal of Cd(II) from aqueous solutions” tih a present.

22nd. Wednesday: AR Ground-ah artificial grass phah hna tan a ni. Lammuala phul siam chawp ‘artificial grass’ (Astroturf) phah tur hian khawvel pum huap pawha company lian Fied Turf Tarkett, USA te chu rawih an ni. Ruahman dan chuan artificial grass phah hian thla thum chhung vel hun a duh dawn a ni.

23^rd. Thursday: Mizoram University Convocation hmanpui tura lo kal President Pratibha Devisingh Patil chuan Aizawl a lo lut a, Raj Bhavan-ah thlengin ama puala Civic Programme Raj Bhavan Circular Lawn a buatsaihah a telpui nghalin kum 1986 a Sawrkar Laipui leh MNF te’n inremna an ziah rah chhuah tun thlenga hmuh theiha a awm chu lawmawm a tih thu a sawi.

24^th. Friday: Multipurpose Hall, Mizoram University Campus, Tanhril ah MZU 6th Convocation hman a ni a, India President Pi Pratibha Devisingh Patil chuan khuallian niin a hmanpui. President chuan Mizoram tlangram hmun mawi taka awm Mizoram University Convocation a rawn hmanpui thei chu lawmawm a tih thu a sawi.

25^th. Saturday: Mizoram University Convocation hmanpui a lo zin India President Pi Pratibha Devisingh Patil chuan Mizoram a chhuahsan ta. Khua in a bumro deuh avangin President haw tur hi a tlai deuh a ni. President hi Governor MM Lakhera, CM Lal Thanhawla, Chief Secretary Van Hela Pachuau leh DGP Lalrokhuma Pachuau te’n airport thleng an thlah.

26^th. Sunday: Lunglei Excise & Narcotics staff-te chuan a Mc dowell’s um 72 leh Contessa um 240, Gypsy MZ 01 C 4897, a hnung leh hma lama ‘Police’ tih intar atangin an man.   Zu  neitu nia puh Zothanpuii (35) d/o Thankhuma Hualngohmun leh zu phurhna motor khalhtu Vanlalchhuanga (26) s/o Raldothanga Edenthar, Aizawl te chu manin, thubuai siamsak nghal anni. Zu hi Sairang atanga phurh a ni a, Excise te hian an report dawn bawhzuiin, Lunglei Bazar Veng-ah an lo chang a, phar din an tum chu tlan tlangin Excise-te hian an umzui nghal a; Lunglawn-ah an umpha ta ni.

27^th. Monday: Mimkut Organising Committee huaihawtin Vanapa Hall-ah Mim Kût hman a ni a, chhungte thi tawh, mi engemaw-zat kalkhawmte chuan hmanlaia an tihdan angin thlaichhiah an nei. Thlaichhiah atana an sum thawhkhawm Rs. 5,265/- chu Cancer Society of Mizoram hruaitute hnenah an hlan a. He hun hmangtute hian Mizo thawmhnawin an inchei a, kût an hman chhungin Darkhuang vuak reng a ni. Inkhawm hi B. Lalthlengliana, Mimkut Organising Committee Chairman-in a kaihruai a, thupui hi pahnih awmin ‘Mim Kût leh Kristianna’ tih chu Vanneihtluanga  LV Art neitu’n a sawi a; Hnam Chhantu President Ramhmangaiha’n  ‘Mim Kût Pawimawhna’ tih a sawi bawk.

28^th. Tuesday: Hmar tlangdung (Sinlung Hills) a khaw hrang hrangte chuan, an huam chhunga luite, Dam siamna atana khuah tura hmalak mekna duh loh lantirnan, pawndum nen, thuziak hrang hrang kengin Chanmari atanga Aizawl Tennis Court thleng kawng an zawh.

29^th. Wednesday: Mizoram Upa Pawl (MUP) chuan ‘Upa Ni’ an hmang a. He hunah hian kum 100 dam tling mi 55 hnenah chawimawina an hlan.Heng an mi chawimawite kum chawhrual hi kum 101.75 an ni a, an zing-ah hian 1900-a piang C.Lairi d/o Sathy, Lungbun Saiha District chu upa berin, kum 110 a upa a ni.

30^th. Thursday: NLUP Apex Board Meeting vawi 6-na chu Secretariat Conference Hall-ah Pu Lal Thanhawla, NLUP Apex Board Chairman leh Chief Minister ni bawk kaihhruaina hnuaiah neih a ni. He meeting hi Central sorkar pawhin a ngaih pawimawh avangin Planning Commission atangin Dr.J.S.Samra, CEO Rainfed Area Authority of India pawh a rawn tel tir nghe nghe a ni.

Kum khat chhunga hun nuam ber ‘Khuangchawi thla‘  pi leh pu vanglai pawha sawi nuam an tih em em chu kan lo thleng leh ta. Dam takin ule.

This entry was posted on Friday, October 1st, 2010 at 7:58 am and is filed under Information. Both comments and pings are currently closed.