Tun laiin thlahtu chhui lamah Mizoten buaina namen lo kan tawk a. Israel leh Chhinlung/Mongolian ah kan buai a. Buai lohna turah kan buai a, kan nihphung atanga chhuta chiang reng mai chu ‘Chhura thlah ngei kan ni’ tih hi a ni.Mizote hi eng ang nge kan nih ? Kan nihna dik tak chu mi tih theih ti thei lova inngai, mi tih dan hriat reng pawh tih ve ai chuan an tihdan sawi sawi ringawt, ‘Japanese ho chuan..’ ‘Israel te chuan…’ ‘Americaah chuan…’ tia nileng zankhuaa infuih thin hnam kan ni a. Chakai nufa kal inzirtir an sawi ang chauha mi tih atana thu tha sawi zuah zuah a mahnin ti peih chuang si lo kan ni in a lang.
Kan Politician ho anga tih tur hre tha thei hi ram dangah politician an nei ve ang em ? A nih loh leh kan Officer ho anga huan siam leh lo neiha tui, kuthnathawh thatzia sawi tur hria hi ram dangah officer an awm ve ang em ? A ni, kan ram hi chu mahni tih ngai loh tih dan tha hriaa leh hriai te vek kan ni.A nih leh kan politician te hian an tih tur tha hriat hi an ti ngai em ? Kan Officer ho hian kuthna an thawkin emaw an tu leh fate tan kuthnathawh tur an ngaihtuah ngai em ? Hnai lo ve, An sawi liam mai mai a, “Mi chuan an ti” an ti ral mai mai a ni.
Mizo pi leh pute chuan ‘sunhlu kungah thei dang a rah ngai lo’ an ti a, an taimain hnathawk peih lo chu an hmusit em em thin a. Mahni intodelh ngei tumin hma an la thin.Tun laia Mizo, mahni thlahtu pawh hre chiang lo te hi tu thlah nge kan nih i rin ? Israel te leh Japanese chu an taimaa an thlahte pawh an taima. Mizo pi leh pute pawh an taimaa an thlahte pawh an taima ve tur a ni dawn lawm ni ?
Tuna kan dinhmunah hi chuan kan pipute thlah pawh kan ni lo va, Israel thlah pawh kan ni lo va, Chengkek tuai tuai a ‘Naa chu ni se ti hian a lo mai tur’ titu, naupang pawhin an nuihzat Pu Chhurbura thlahte kha kan ni ta ber lo maw?
