A khuhhawnna
Miin tunge a ni an tih che? He leilung dan hian nakinah chuan i kumkhaw hmun tur panin i liam anga, i hmun nghet tawhtur a vang lam ban chen vel leh a dung lam hlam leh tawng vela thuiah an mut dawn che. Chu niah chuan i chenna hmunah khan mi an lo pungkhawm anga, i bul vela mite chuan nangmah kha an la tah ang che. Chutih hunah chuan i mar a awm tawh lo anga, i lungphu pawhin i thlah tute lungphu zawmin a chawl hahdam ve tawh ang. Tlangval tlawmngaiin i kumkhaw hmun tur an siam sakah che khan khawhar taka awm turin an hnutchhiah che anga, nangmahin chu hmun chu i luah tawh ang. I lei taksa chu hmuhtheih a ni tawh dawn lova, mite thinlungah engtin nge hmun i khuar dawn le?? Kha mi huaisen kha chuan tun thlengin hriat a la hlawh a sin.
Hmartiang ngurpui hraichawi dawntuai vangkhawmawii,
Chhimtiang rengpui chhuihthang valpui lal nuthaia’n
A lo lawi e, ni leh thla kar a leng lanu
Khuanu samsuihin an leng e chim tlang mawiin
Kha mi huaisen kha maw.. lal ropui, ni leh thla kara leng.. hlauh awmzia hre lo, anmahni lo chu tumah midang awm ve lo a ngai sailo thlah, lal ropui Vanhnuailiana fanu a nih vang hrim hrim pawh khan sakhaw neilo tan chuan biak tham dawn khawpa ropui a ni tawh a sin! Chutah Denglung lal fapa huaisen Vandula nupui a han ni leh zel pawh kha mi chhinchhiah tlak tak chu a ni sa reng a ni. He zoram tana hriatreng tlak ni turin he ni lo chhuak hian an pahnih khan a inhmangaih zualtira, hlim takin an lengdun thin.
Thihna kut vawt chuan a pasal a man sak a, thlan chhungah a pawt then ta. Kha a tawrhna kha beidawnnan hmang lovin chhelnan a hmang a, a pasal a chawimawia, a ram a dinchhuah tir a sin!
Kum za hlei sualin a liampui tin(?) chhingzo tu,
Sappui miril, thaikawi zia tial a mawi kim ngei..
Laisuih tuahrem thiamsang hawng e zofa lengte’n
Mi hrang ramchhan lalnu ropui a vul leh ta!
Kum tam a ral tawh. Hnamdang mithiam tam tak te’n min chhiahpiahin mizote pawhin khawvel hriatah kan hnam kan pho lang tan a, khawvel pawh kan dai darh hneh ve tawh hle. Chung mithiam hmun hran hrana khawsaa mi ropui tak tak te pawh chuan mizo history kan chhui apiangin he mi huaisen hi kan nghilh tawh lo anga, a hming kan lam ve ziah tawh ang.
Ngur zawng saiin vailian tawnah ding zo awm lo.
An hran a na, tlangtin khuatin tui ang nem zo..
An hril lallai lungliani zawng a nem ngai lo,
Hren thir an ban ta maw? lungduh hnutiang chhawnin
Han chhiar nawnin han ngaihtuah leh teh u.. hnamdang tawnah kan zoramin a parmawina a thliah lai kha. Khawtin leh tlangtin chu hnamdangin an la a. Chappui kang vanglai ang maiin ram an la duai duai a nih kha. Lalte chu tlawmin an ram chu hnamdang hnenah an hlan a, an thlah tute taksa leilung chu hnamdangin an nuih a nih kha. Kha hunah khan kan mi huaisen kha chu a tlawm duh lo. Ni e, a pasal leh a thlahtute taksa kha hnamdang nuih atan a phal tlat lo a ni. A ram a hmangaihna chu tawngka mai ni lo, a taka a lantir avangin tanin hmunah an dah ta maw? Kha taninah pawh khan a la tlawm lo a sin.
Fam chan a huam anpai bawiha kun ai chuan,
Thingserh sat a lam ang let lo hnam martar kha
Chawimawi NOPUI i hlan ang u, thang leh thar hian
A ram leh hnam tar puiin a fampui ta e..
Ram hmangaihtu kan tih hian eng rilru puin nge kan sawi thin le? Tuna ram tana thil tha lo kal lo tichingpen thin tute hi em ni kan sawi dawn? Ni lo, ram hmangaihtu dik tak chuan ram tana thih a huam a, hnamdang thuhnuaia a ram awmtur hmuh ai chuan thih a thlang a sin. Ram hmangaihtu dik tak chu a ni mai lo’m ni? Kha mi huaisen a ram leh hnam chhan nana thingserh sat a, hawikir leh tawh lo, a taksa chaknain a tlin dawn tawh lo pawh a hnam phatsan duhlo tu kha thangtharte hian entawnin chawimawina sang ber pein, hmanlai tlangval chawimawina NOPUI kha kan dawm tir dawn lo’m ni? Ram tana nunhlan mi huaisen a ni si a.
A tlawm ve lo Ropuiliani sappui tawnah,
A zam ngailo pheisen darfeng doral hmaah..
Thlang kawrvaia anpai jail run nghaka fam hnu,
Kan chawizel dawn sakhming mawi ROPUILIANI…
Sipai tawrawt tak tak leh hmanraw nei tha tak tak hlau lovin a ram leh hnam boral a hlau zawk a, a nunna thaw a tawp hlau lovin a ram hnamdang ta tur a ni mai ang tih a hlau zawk a. Hnamdang hnuaia a ram a awmtur chu hmu duh lovin a nun a hlan ta. Kha mi huaisen, ram leh hnam hmangaihtu dik tak kha mizo hnam awmchhung hi chuan a nung reng ang! Ni e, kha mi huaisen- ROPUILIANI kha!
