mi(sual).com

- Zirsangkima : March 21, 2008 : 21.45 – Lengzem June 2008

Eichawp dapa hah thi kûla hna thawh tur hmuh changa lawm thin ka ni. Bawlhhlawh paiha inhlawhna ka hmuh hian ka lawm a, a tawp zawh poh leh hlawh a san avangin ka tan chuan rohlu a ni mai. Mi huan thlawh leh hung te, êk-in khur laih leh thenfai te hi ka tan chuan thil pangngai a ni a, car neih aiin car silfaia inhlawhna hmuh hi kan tum ve phâk tawk a ni. Khua a têt a, thawh hreh neih lem loh chuan, hmelhriat pawh ka ngah ve khawp mai. Mite hian an thatni chuan min hrechhuak ngai lova, awmpui tur an khaihlak chang te, ui bual an duh chang te, an pangpar huan a hnim chang te hian min hre chhuak ve thin.

Mite chu an ni khat hlawh ringin kar khat lai an nung thei a. Ka ni khat hlawh hian kei chu ni khat mi daih ngawr ngawr a. Hlawh lâk leh hmanral inkar rei lo lutuk chuan ka nun a tiderthawng a. Thawh mek laiin thawh leh tur ngaihven a ngai a, hmuh loh rualin fairel bel a ruak zel bawk si a. Hamthatna dang ka zawng thiam bawk si lova, heti hrim hrima lo pian ve tak mai chu tia hrehawm tih ngawih ngawih ni pawh ka ngah mai.

Rethei teh mah ila, nula chhia leh tha hre hrang theia siam hi ka ni ve roh a. Mahse, retheih miau chuan, insum reng reng hian hun ka hmang a, nupui chu sawi loh, ngaihzawng pawh hi ka suangtuah chhin ngam ngai lo. Nula chu sawi loh, a ke chhehna khawvel chawp hian ka phu lo ni berin ka inhria.

Phu loh Thahmingliani
Chuti khawpa ka dinhmun a chhiat lai chuan, insum zawh rual loh khawpa ka lunglai luahtu ka tawng ve ta tlat mai a. Theihnghilh luih tum chu muthilh luih tum ang tlata har a ni ta mai. A tana thil han tihsak châkna thlengin ka nei ve a, mahni pawh inchawm zo mang lo chung chuan a ngaihna a awm hlawl si lo.

Mahse ka thlah thei si lo. Bansan ka tum zawh poh leh ka ngaih a zual a. A tel lo hian dam zo turah pawh ka inngai lo. A hmel vawi khat hmuh pawh hi ka thlahlel riau ta mai le. Ka buai chhiava a ni!
Ka buaina hi mi tan chuan ho deuh a ni. Ka tan erawh chuan muthilh ngaina a awm lova, chaw ei tui ngaihna lah a awm hek lo. In tana a hohzia leh ka tana a hoh lohzia chu, i chhiar zel ang a, i hre mai ang.
Ka ngaihzawng chu a hmel a thain a pian a nalh takzet a, kan khuaah chuan he nula tluka duhawm hi an awm lovin ka hria.

A mitmeng, a aw ri, a ban vai, a hawiher, a… engkim mai chu kei ka tan chuan ‘tha ber’ a ni vek mai. “A bawp lehlam hi sakei sehah hlawh rawh,” pawh ti se, tîm miah lovin sakei ka pan nghal ang. Sakeiin min seh duh loh pawhin, a sakei zawk chu ka seh hrim hrim a.

An ka biak loh Lungruni
Mahse, mi ngaihzawng nei ka an lohna ber chu hei hi a ni. Ka ngaihzawng hian min hre lo! Khawvelah hian ka awm ve tih pawh a hre lo. Ka ngaizawng tih pawh a hre lo. Min hre lo fai vek!
Kan intawn dan… ni lo, ka tawn dan pawh ho deuh a ni. An thenawmten an êk khur min thentir a, ek khur atanga ka han hawi chho chuan he nula hi ralkhatah ka hmu vuai a ni. Chuta tang chuan ‘Ka hawi kir leh tawh lo’ng,’ tiin ka intiam a, ka nun pumpui hi vawilehkhatah tihdanglamin a awm a, ka piangthar a ni ber awm e, mahse vanram kai ai chuan êk khur atanga he nula thlir hi ka thlahlel fe zawk.

Chulai hmuna hnathawh ka phurzia leh ka taihmak nasatzia chu min ruaitute chuan an hria a, tlangval fel chungchuang ka ni emaw tiin, an pangpar enkawla an huan tui petuah min chhawr zui leh ta nghal a. Ka lawmna leh ka rilru hahna chu a intiat a ni ber e.

Tlai a lo ni a, ka hnathawk haw pah te chuan, rem lo chung chung hian ‘ka ngaihzawng’ in lam chu ka hawi tawk tawk a. Ka hmuh fuh ni aiin ka hmuh fuh lo ni a tam zawk. Mahse, ka hawi lo thei lova, hmu lo mah ila, an kawt zawna kal theia ka dam ringawt pawh chu ‘luck’ ka inti ve thin.

Val dang tawna Lungheri
Mahse… dang a awm leh ta. Tlai khat chu an kawtah chuan, car chhuak thar changkang zet mai hi a inhung riau ta mai. Chhungkaw car a ni lo, a pain chutiang car a nei lo, hai rual lohin tlangvalin nula pakhat chiah a leupui theihna tura siam, sports car a ni tlat. Aw, finfiahna engmah awm si lovah ka thîkthu hi a lo va han chhe tak em!
Ka ngaihzawngte in chu ka pel tam tual tual a, chu car phiangsen chu a ding tam tual tual a, kar tawpah phei chuan a thang kam ila kan awk ziah thei ang. Ka ngaihzawng min rawn chuhpuitu chu tu nge tih hriat châkna thlarau chuan min man leh ta.

Cho rual loh val Annema
Tichuan, zanriah ei thulh thakin ralkhat hnimbuk phen atangin ka chang ta a. Zan dar riat velah chuan ka chang chhuak ta tak tak a. Chu in atang chuan tlangval hmai fai veng vawng, ka hmanrua ang thirtiang leh bawngtuthlawh hmang ve ngai miah lo tih hriat tak mai hi a lo chhuak ta. Amah maiin a lo chhuak lo, a nula rim, ka ngaihzawng chuan a rawn zui chhuak. Nia, inlengte chu thlah ngai a lawm, thîk zel tur a ni lo. Mahse kut invuanin inkai kher lo se ka va ti em! Car-ah chuan an lût dun dawn ka ti. Aw! Khawnge a nu leh pate pawh hi an awm le? An fanu saw sawtia tlangvalin an fawr chhuahpui mai mai tur a ni hlei nem. An inphur chhuak ta tak tak ka ti!

Thikthu chhiat loh phawt mai chu ka tih theih awmchhun niin ka hria a. An duh duhin awm sela, kawtkaia a chevel ka hmuh theih hian lungawi ta mai zawk ila, bathlara a puan pho lai hmuh fuh phei chuan dam man awm ngawih ngawihah ngai zel ta zawk ila a hahdamthlak dawnin ka hria. Tichuan, tlaia pangpar tui ka pêk lai hian a khawilo kal haw lam ka hmuh fuh hlauh chuan ka chaw ei a tui ve tawp ta mai a ni. ‘Naktukah chuan ka be tawh ang’ tiin tuk tin ka intiam a, mahse ka huangtau lutuk ang a, ka malsawmna dawn chu ka dai baw palh ang tih ka hlau tlat a, ka be ngam lo pawh a ni lo, ka be phal lo zawk a ni.

Ka thlir zel dawn i tuanna mual
Hna tawp tak pawh thawk ila ka vui ngai lova, ka hah pawhin ka hlawhah thei zel a. Ka ngaihzawng chungah erawh hi chuan, ralkhat atanga tlangval nena an fawr chhuak tur thlira lungawi ringawt hi chu, tum mah ila a tih reng theih tlat loh. Heti ngawt tur a ni lo, ka hriat chian deuh a ngai a ni – tih ngaihtuahna chuan a tur hian min tur ve si a. An inah ka leng ngam lova, hmaichhanah ka be ngam bawk si lova. Amah hi ka hre chiang lo a nih pawhin ka ngaihzawng bialpa hi tu nge a nih tal ka hre tur a ni tiin ka ngaihtuah a.A bialpa nena an inzui chhuak chu zui ruk mai ka rilruk ta a ni.

Tichuan, kâr tawp a lo thleng leh a, car nalh tak maiah an chhuak dun leh ta ngei a, keiin an hnungah taxi-in ka ûm a. An tlan chak leh ka thin a rim a, an tlan muan leh ka ngaih a tha bawk si lo. Car chhungah chuan engtin nge an awm ang? Eng thu nge an sawi ang? An inmelh ang em? Khaw’nge an kut an dah ang? tih te ka ngaihtuah lai chuan khawpui lairil lamah kan hmahruai chuan min kalpui zel a. Hei pui, ka duh lohna hmun min panpui tlat.

Lawi lo lamtluang i chhui Parte
Helai kher kher hi chu Lawilo dawrpuiah pawh, hmangaihna ni lovin, hmangaihna hmanrua hmanga an sumdawnna kawtthler a ni. Eiruk ching te, chhiah awl ruk ching te, dan kalha hausak chu dan emaw titute nuam tawlna kawtthler kher kher engah nge kan pan aw? Tlangval, tu pawh ni la, ka ngaihzawng hi he kawtthlerah kher kher hi chuan dinpui teh suh. I duh chuan khawpui dai fianrial zawng mai zawk teh. Tlan muang suh, kawng sir pan suh, ding suh… Aw! Ka thu lah hi i awih si lo, i awih lo satliah pawh ni lovin, ‘ti suh’ ka tih ang apiangin i ti tak si a maw! Kawng sira car dahnaah chuan an ding ta tak tak ka ti!

Kawtthler ral lehlamah, taxi chhung atangin ka lo thlir a, tlangval chu car atangin a lo chhuak a, sa pan ve tak mai hi a ni lehnghal a, ngaihzawng hi tharuma inchuh tur ni ta se ka va han cho tak em! Mahse, ka thahrui, ka thiamthil leh hmanruate hi he thilah hian hman ngaihna a awm der si lova. Chilpûtin ka thlir ringawt mai a nih hi.
Tlangval chuan a ngaihzawng chu… ni lo, ka ngaihzawng chu car kawngkhar a hawnsak a, duat takin a kai chhuak a, an innuih a, aw… he kawtthlera i nui hmel hmuh hi hremhmun kawtthlera vantirhkoh nui hmel hmuh ang maia inhmeh lo a ni si a, i va han pamhmai tak em! I awmna hmun nena i inhmeh loh zawh poh leh i duhawm tawlh tawlh mai si taka maw!

I nun a rawng mange Hmeltha!
Tichuan, inkai bawkin car dahna atang chuan kawtthler zau kaltlangin ka awmna lam an rawn pan, an rawn pan hnai zel a, a ep kawtthler lehlama hmun pakhat, nawmsip bawlna hmun rau rauvah pawh tawp chin leh tiam chin awm miah lova tisa châkna nawmsip an bawlna hmunpui ber kher chu an pan dawn a ang hle mai. He Lawilo Dawrpui kawtthlerah rau rau pawh, he hmun kher hi chu, luh chu sawi loh melh ringawt pawh hi mi nupui ngaihmelh ai daiha sual nasa zawkah kan ngai si a, tlangval, engti tiha, he hmunpui kher kher panpui nge maw i nih le? Tlangval, lo kal hnai zel teh, tu nge i nih?

Ka rem tih loh dan zelin he tlangval hian ka ngaihzawng hi a ‘pawt’ miauva. He nawmsip bawlna hmunpui hi an rawn pan ngei dawn nia ka hriat avangin ka tlankhalh a, hmachhawn siah thei turin a kawtkaiah ka lo ding a. An pahnih chuan an rawn pan phei zel a, ka ngaihzawng chu a lo hnaih ang zelin a hmel a tha a, a duhawmin a thianghlim zual sauh hian ka hria a. A hruaitu tlangval erawh chu a lo kal hnaih ang zelin ka rinhlelhna a zual a, kan inhmachhawn ta. Ka hre ta che, tlangval, i pa atangin ka hria che.

Tu hrai leng chawi nge i nih le?
Kan khuaa retheite retheih chhan, kei leh keimah anga hna hnuaihnung thawka retheite changkang ve thei miah lo tura min hrêktu misual fapa i ni. I pa chuan kan hamthatna leh remchang neih ve tur zawng zawng min chhuhsak a, thlahte thlenga rethei kumkhua turin min siam a, i pa vang hian leiba nei sain kan piang a, rul zo hman lovin chhungkaw tamtak chu thlanah kan liam a, chu misualpa fapa chuan, ka ngaihzawng chu kuahin nawmsip bawlna inah luhpui i tum mek a nih hi. Pastor fapa chu biak inah a tlangnel ang bawkin misual fapa chu nawmsipna inah a tlangnel thin. Chu thudk tifamkimtu tlangval chuan zan engzat nge ka ngaihzawng hi he hmunah hian a khurbinpui tawh le?

Aw, vante u, dikna hi khawiah nge a awm a, mahni hmangaihte meuh pawh be ngam lova hnuaihnunga min awmtirtu fapa chungah hian phuba ka lâk hi a thiang lovem ni? Pathian tehreng pawh hi, dikna lal tiang nena lokal tur i nih chuan tun hi lokal hun dik a ni dawn lo’m ni? Mei leh kât i sawi fo chu he nawmsakna in halna atan hian… ka ngaihzawng an luhpui hma ngei hian rawn leih baw ta che. I hman remchang lo a nih pawhin, A…. Bin Ladena leh Al Qaida te pawh phungbawmah ka sawm hnial ta lo ka ti! Hei ka kut ka hum ruh a nia. Lungral keng lo pawh hian ka inring tawk a sin! Min dawm suh u, he tlangval hi ka khawih dawn.

Mittui nen… Hringnun
Mahse, kut ka thlâk rualin police an lo lang ang a, retheih nâk a laiin ka tang ang a, huanpu hna takngial pawh ka hmu leh tawh lovang. Ka ngaihzawng hian min chhinchhiah ang a, ralkhat atanga ka thlir apiangin a tlanchhe tawh ang. Chu ai chuan, an thenawm huanpu ni chunga, an kawtkaia a chevel hmu phâka awm leh mai chu ka chantawkah ngaiin, thinrim mittui sur zung zung chungin, an duhtawka nawmsip bawl zankhua turin ka ngaihzawng chu ka hawsan ta zawk a ni.

He takes you out and he takes you up
’Coz he can show you so much
I go to bed and tomorrow again
There’s a lot of work to be done
He gives you gold and he’ll promise you
The whole world will be yours
I just can tell you I love you so
Even though my odds are low

The dirty games and the neonshows
This is the world he knows
Watching the stars satisfies my soul
Thinking of him makes me feel so cold
The fancy cars and the restaurants
You’re just so fond of the man
Sometimes I wonder if you are blind
Can’t you see, he’s got dirt on his mind
- “The Actor” (MLTR)

Similar Posts:

• I cham reng thin asin
• Pui thei in awm em?
• Lungphun pakhat
• Hmangaihna Chhunzawmna
• Hringnun khawhar

Recent Posts:

• MIZORAM CHU AIZAWL (Aizawl Khawpui zauh a tul kher em?)
• Comedian Search 2012 Top 10-ah mi 12!
• MIZO SAKHAW BIAK DÂN LEH A TOBUL ~ 3
• IPS bo zawng ang.(Detective chet a hun e)
• Kum 2013 atan YMA kumpuan ‘Ram leh Hnam humhalh’

This entry was posted on Tuesday, October 12th, 2010 at 6:05 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.