mi(sual).com

Nupui te u,

“Zaninah Pulpit tuisik têm phaka ka lo ding ve nawlh mai hi ka lawm viau rualin, ‘awm ve tawh viau e a…’ tihna chin erawh ka nei ve a. Kar hmasa khan, kan Upa pakhat bulah ka lo vui niah niah hman pek a; khami rahchhuah kha anih ngei pawh ka ring. Tin, he chanvo hlu tak hi– vui chhuah theih/ phut chhuah theih chanvo a lo ni tih te ka hriat phah ta zel a. Zaninah hian sawi tur ka pài hnem hrep a; thupui bik pawh nei loin, a rem rem kan chuk lawr dûn dún ang.

In hriat angin, he ramah hmeichhe pawl a pui a tam ta hle a; he’ng thu te hi in hriat loh ka duh lo e. Kohhran (nu ho)-ah chanvo beiseia in vir chêng lai hian, chunglamah chanvo in hloh dah ang e. Buhfai tham buaipuia in campaign mup mup lai hian, khawvelin in fate a tham mek tih theihnghilh suh u. MHIP-ah nihna khela in phèt sek lai hian, in fate khawsa ziain MHIP (Misual Hurherh Intelkhawm Pawl) a hnaih hret hret tih hre bawk rawh u. Bhavan-ah Mahila in tih nitin laiin, fianrial-ah val âwm nghengin an Mahila… ooh! an Mu hil a. Hnam rûn-ah Women Front in tuipui laiin, khumlaizawl-ah Women on Top an tuipui thung! Thildang zawngte aiin, in fanu/fapate chezia hi chik ula; ral thlir mai loin an nunah luhkhung rawh u.

Mipate nena intluktlanna in aupui dum dum lai hian, mipate zaidamna leh dawhtheihna ang innei tawp si lo. Mi awmpui (Burma nula) hi vawi tam ka titi pui tawh a, “ka pu chu a fel, a zaidam… Mahse, ka pi a sual lutuk, a thinchhe rapthlak…” an ti zel mai. Zaidam zir ula; rilru tha neih tum rawh u. Chhungkuaa hrawn hreawm ber leh thenawm khawvenga boruak chhe irh-chhuahna bûr inni fô! Sim rawh u. “Nu lalna In chhung a nuam ngai lo” tih thu te atang hian harh mawlh rawh u.

Kum 20 kal taah khan– kan khuaah nula hmeltha zet mai a awm a, an Ina leng lo rimtu a nei zantin a, an dawr thil te pawh an hralh theih phah hle. Chù nula chu, a nu (pi mawii) pawhin a chhuang hle a, chhuan chikimin a chhuang a ni ber. Chhuan tui-èk theih nise a sam zai zawng zawng nen lam a chhuang tui-èk vek ta ve ang.

Chutia, lal fanu chhuan taka a chhuan em em lai chuan, khaw thenawm atanga hmeithai rawn pem lut chua’n fanu hmeltha(chungchuang) zet mai a rawn chhawm lut a. Kar loah a hmelthat zia leh a len mawi zia chu a khaw khahin a khat a, tlangval te titi ber a lo ni ta. Pi mawii chuan chu nula, a fanu aia lar ta chu a thik em em mai a; pawngsual tawk se… a hmel hmai chhe vek khawpin hliam tuar se… a ti em em thin a, a rilru tawngtainaah hial a chham thin a ni awm e. Kum 2 hnuah chuan, chù nula chunga a rilru put ang leh a chungah thleng se a tih ang chiah chu- a fanu chungah a thleng ta! A fanu chu pawngsual a, nâ taka sawisak a ni.
Mi chungah rilru chhe tak kan put hian mahni bawkin kan tuar a, an chungah thleng se kan tih ang hi kan chungah a thleng duh khawp nia.

Bible mah in chhiar chhuak peih anih chuan, in nuna in chin tha lo leh ze tha lo te kha chhiar chhuakin paih ngai chu paih rawh ula; then ngai chu thian rawh u. Insiamthatna tel lo chuan vawi za tam Bible hi chhiar chhuakin tahpui thin mah ula; Dar ben thlek ri pawh tluk loin, Vut laka vawih ang lek inni ang. Hriat ril, chhiar zau aiin rilru tha leh nun tak neih tum zawk rawh u.

Aw le! Duhthawh luatah kan han insel chiam thin tak na-a, kan ram leh hnam, kan nunphung leh khawtlang nun hi ala chhe lutuk lo e. In fate leh naupang reng rengte bulah he hnam hi hnam chhe lailet der angin sawi fô suh u. Chutiang chu an thinlungah tuh tum hlek suh u. Chuti lo zawngin, hnam chhe ber/ khawlo ber leh sual ber atanga zi chhuak emaw an inti dah ang e. Chu chua’n an nun kal zel turah thil tha a thlen dawn si lo a.” ka ti piap piap a.

Inkhawm kan han bang chu min chibai tum nu ho an rawn inpang-aw-zial tup tup a! A hmasa ber chu ka lo chibai a, min thlah duh ta reng reng lo. Ka kut chu a hit mup mup a, a hmer nâ tual tual a, a nâ chuan ka taksa pum a rawn fan a, ka harh ta a! Harh lo zia reng ka ni ne’m le… Kg 85 zeta rit kan nuin ka bân ding lam a lo delh bet miau a.

Similar Posts:

• Enge kan chanvo?
• Chhangchhe Thufing
• ..Leh ngawt ang…
• Pafa inbarakhaih
• Rotuiburi..!!

Recent Posts:

• Bawihpuia kha
• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si
• ZU HI SUAL A NI LO, A IN A TE PAWH AN SUAL HEK LO

This entry was posted on Thursday, October 21st, 2010 at 3:34 pm and is filed under Advice. You can follow any responses to this entry through the RSS 2.0 feed. You can leave a response, or trackback from your own site.