mi(sual).com

Ka post hmasa ‘YMCA Mizoram aiawh zu in’ tih kha comment a hlawh phian a, a lawmawm khawp mai. Tun dinhmunah98 comments a awm tawh a ni. Ngaihtuahna hi a tha zawng leh a chhe zawng hian sen tur a ni reng a ni. Kan comment leh dawn tho avangin a hran pa a article angreng hnuaia comment zawk hi a that ka ring a ka han post leh a ni e. Dimapur YMCA conference a kal, state hrang hrang a an hruaitute khan an in deuh vek tih ka han belh leh hram a nge.

“Zu in hi kristian te tan sual a ni em?” tih hi khawvel pum huapa debate vawiin thlengin a la ni reng a ni. Mizo tam tak zu chungchanga ngaihdan sawi a rak vak vak thin te hian kan source neih chhun film, internet, sermon, lehkhabu tih te a ni tlangpui a. Khawvel hmun hrang hrang a awm kuala kristian nundan zirtute leh khawvel kristiante thusawi hrang hrang han lak khawm hian ‘thil tha aiin thil chhia a thlen tam zawk, chuvangin zu in  hi sual a ni’ ti tu an tam ber tlat.

Bible kan en chuan thil thianghlim tehnan te hman a ni a. Tin, hun bik(occasion)ah chuan Isua ngei pawhin a ti pungin, tehkhin thuah te a hmang a nih kha. Tirhkoh Paula ngei pawhin Timothea uaiin tlem in turin a chah a nih kha. Pathian malsawm kan dawn a ni a, kan in hi chu a phal a lawm. Mahse chin tawk kan hre lo a, suala min hruai lut tu lian ber te zinga pakhat anih miau avangin kristian te chuan zuin hi sual ah kan ngaih phah ta a ni. Zu, dawhkana awm hi sual a ni lo, i in pawhin sual a ni lo.

(Matt 15:11)

Kaa lut chu mihring tibawlhhlawhtu a ni lo va; kaa chhuak chu, chu ngei chu mihring tibawlhhlawhtu a ni zawk e,” Kan kawchhunga awm zu hnathawh avang khan sual a lo chhuak thin a ni.

Thufingte 23:29-30

Tute nge chungpik thin a, tute nge lungngai thin a, tute nge inhau thin? Tute nge thubuai nei thin a, tute nge a vang awm lova hliam tuar thin a, Tute nge mit sen rem rum thin le? Zu hmuna awm reng thinte,

Ephesi 5:18

Tin, uaiin ruiin awm suh u, chu miah chuan insum lohna a awm si a; Thlarauva khatin awm zawk rawh u.

IKorinth 10:31

Chutichuan, in ei pawhin, in in pawhin, in tih apiangah pawh, Pathian ropuina tur hlirin ti rawh  u.(zu hi Pathian ropui nan a ni em le?)

Leveticus 10:9

“Nang emaw I fapate emaw pawhin inbiakna puan in chhûnga in kal laiin uaiin leh zu reng reng in suh u, chutilochuan in thi ang: in thlahte zel thlenga kumkhaw dan tur a ni ang a;

I Korinth 6:19-20

A nih leh, in taksa chu,in chhunga awm Pathian hnen atanga in hmuh Thlarau Thianghlim in a ni tih in hre lo em ni le? Mahni ta pawh in ni lo va, Mana lei in ni tawh asin, chuvangin in taksaah chuan Pathian chawimawi rawh u.

Zu chu:

1. Kristian awm hma pawha chhungkaw nun ti buai ber tu chu zu hi a ni.

2. Fate, nupui te, thian te sualpuia ralmuanga siam lotu tibuaitu chu zu a ni.

3. Zu hi damdawi anga hman chuan sual a ni lo.

4. Zu hi damdawi atana ka inlai ka kristianpui, rinnaa chak lo zawk ten min

hmuha an lo tluk chuan sual a ni.(IKorinth 8:13)

5. Khawvel pum huapa kristian tha tih pawha kan sawi thin te hi zu ah an

inhnamhnawih ngai lo.

6. Zu hi thil tha ni se, rui chunga motor khalh hi sawrkar pawhin a phal ngei

ang. Kristian te tan lek pheichuan tih loh tawp tur thil a ni.

7. Zu hi thil tha ni se, vantlang mit hmuha hian kristian te hian zu in kan tim

hauh  lo ang. A ruka tih ngai hi chu thilsual tiin kan sawi thin.

8. Zu avang hian i pa, i nau, i u kha tawngthu chheloah lo thi tawh ta se, zu i

ngai sual ngei ang. Thihna a thlen miau a.

9. Zu hi sual a ni lo i tih chuan a rukin in tawh lo la, ringtu tha kan tihte nun

dan hian han nung tho teh. Khawvelah hian khawiah mah i tuitla lo ang.

10. Zu hi i fak chhung chu i la in tam tawk lo a ni mai.(Pawisa neih loh vang

emaw, chhungte hlauh vang emaw, i rilru tak tak a zu in tha i tih loh vangin)

11. Zu fak mawi thin ringtu tha an awm ngai lo.

12. Kristian ni lo te takngial pawhin zu in hi sual an ti ve tho a nih chu.

13. Zu rui chunga pulpita thusawi leh tha taka sermon ngaithla tura zurui chunga biakin a kal an vang khawp mai.

Zu hi Pathian malsawmna kan dawn te zinga thil hlu tak a ni. Amaherawhchu kan hmang sual ta hian sual a hring ta a ni. Sex pawh nupa kara hman chuan sual a ni lo. Nupa kar lova sex hman erawh sual a ni. Tin, nupa pawh nise mi hmuh laia sex an hman chuan sual a ni thei. Mizoram, context kan thlir phei chuan sual anihna ziah tur a tam leh zual ngei ang.

Engpawhnise, zu hi ka lo in ve tawh thin a, in reng chiah ka ngai lo a ka in lo mai a ni. A chhan chu sualah min hruai lut thin tlat a. Tun thlengin ka u in tlai tin deh thaw a la in a, ka pate an a in bawk, engtik nge zu vang hian an boral ang tih hi lungngai takin kan thlir a ni. Zu in hi kristian te zingah thil sual a ni lo ti a i tlangau dawn chuan kum 1000 chhung pawhin an rilru i hneh chuang lo ang. In hnialna atthlak Bible in a tih te zingah a tel ve hial mai lo’ng maw? Thil tha chhuak tur chuan inhnial te hi a tul ve a nia. Han comment leh sup sup teh ang u.

Thian pa Hruaite thuziak hian tlang kan kawm ange  ‘He thuziaktu hian i zu in dan a hriatpui lo che a, mahse, thil pakhat ti turin a ngen dawn che. Zu in mi i ni a, i in tawh dan zawng zawng kha bengsikin ngaihtuah ang che. Zu i in chhan te, zu ruih hi a nawm leh nawm loh te leh, zu hi a that leh that loh te i thil tawn tawh atangin ngaihtuah chhuah tur i nei teuh ang. I zu lo in tawh thin dan zawng zawng te leh, midang nun atangte pawhin Zu nena in inkar kha ngaihtuah la, he zawhna hi lo chhang ve ta che – ZU HI IN RENG CHI A NI EM?. ‘Ni lo,’ i tih chuan puitling takin i zu in thin kha sim la, nangmah bakah i chhungte an hlim ang. ‘Ni’ i tih chuan i in zel mai dawn nia, Zu avanga i nat hunah chuan ila nghei ve chêk ang chu!

Source: Zu hi in reng chi a ni em?

(https://www.kolasib.com/plugins/content/content.php?content.6)

Similar Posts:

• RINGTU DIK TAK AN NI LO (Kan ni. In ni lo. Kan ni…)
• Kristian chhungkua leh kan tehdan diktawk lo te
• Mizoram- Kristian ram
• Sual
• Natna hi sual a ni em?

Recent Posts:

• MIZORAM SUM LEH PAI DINHMUN IN HMA A SAWN NASA
• ZoRO Press Release
• MIZO KRISTIAN MARTAR THENKHAT TE
• BEIDAWNG SUH
• Bawihpuia kha

This entry was posted on Thursday, October 21st, 2010 at 9:32 am and is filed under Advice, Religion. You can follow any responses to this entry through the RSS 2.0 feed. You can leave a response, or trackback from your own site.