Nimin, 28 October 2010 khan Archives Hall, Babutlang-ah Mizoram Watch vawi 5-na chu tluang taka neih a ni a. Kalkhawm te hnenah hian RTI chungchang ziahna leaflet Prism in an sem nghal a ni.
He programme hi Prism leh a thawhpui pawl 6 – SOSA; FOMTU; Y4M, Lunglei; SDYC, Serchhip; LDDVF, Lawngtlai leh SDDVC, Saiha te tangho buatsaih a ni a. Sorkar kalphung leh hmalakna ngaihven mi 29 an kalkhawm a. Programme chhawng khatna chu Prism President Vanlalruata’n kaihruaiin sawihona hun chu SOSA member Rual Zakhuma IAS (Rtd.) in a kaihruai a. Programme tan tirhah Y4M founder chairman Lalhmachhuana Fanai sunna hun hman a ni.
Programme sawihawngin Prism President chuan Mizoram Watch buatsaih chhan leh kalphung te a sawi a. April 2, 2009 te, October 31, 2009 te, December 14, 2009 te leh April 29, 2010 te-a programme neih anih tawh thu a sawi a. “He programme hian sorkar sawisel emaw, fakmawi emaw a tum lo a. Sorkarin an party election manifesto an bawhzui dan chungchanga thudik puanchhuah a tum tawp mai a. Kan duh chu ‘constructive criticism’ a ni tih min hriat sak u la. Fak tlak fak ngama sawisel tul sawisel ngam turin ka ngen che u a ni,” a ti.
Thusawi hmasa ber SOSA President SL Sailova chuan, “Hun engemaw lai atang khan sorkar kan rinna a bo tial tial a. Tunlai tawng takin ‘trust deficit’ a nasa ta,” tiin tun Ministry chu majority nei nasa anih avangin hemi siamtha tura hmala thei anih thu te, amaherawh chu an kalphunga beisei san ngam a har tak thu te a sawi a. Manifesto hi vawilehkhata tihhlawhtlin theih anih loh laiin tun hun thlenga tihhlawhtlin theih tawh tur la tih loh a tam hle thu te; corruption do chungchanga sorkar hmalakna a that tawk loh thu te a sawi a.
Sports lama sorkar hmalakna erawh chhuanawm khawpa tha anih thu a sawi a. Sorkarin an manifesto thenkhat ti leh lo tur anga a insawi chungchang sawiin, “Manifesto hi ‘min vote tlin chuan heng hi kan ti ang’ an tihna a ni a. Tih an tum leh loh chuan a vote tute lakah chang ni lovin democracy-ah chuan a vote lo tu te tan pawh sorkar an siam dawn avangin mipui lakah thupha chawia an tih leh loh chhan tur chipchiar taka sawi an ba a ni,” a ti a. Oil leh Gas exploration chungchanga state chanvo tura 10 % vela sorkar a lungawi chu dik a tih loh thu sawiin Supreme Court in tribal te tana hetiang thila 20 % aia tlem lo ni tura thuremna a siam tawh thu te a sawilang bawk.
Prism Vice President Lalrinzuala Chawngthu chuan manifesto tihhlawhtlin tawh te, bawhzui mek te leh la bawhzui loh an neih te tarlangin sorkar hmalak dan tlangpui a sawi a. Sorkar hmalaknaah fak tur tam tak a awm ruala beitham tak tak a awm thu te a sawi a. Congress sorkar in an manifesto an bawhzui dan leh hma an lak danah, “Mipui beisei an pha lo lam niin a lang a, tan lakna tur tam tak an nei a ni,” a ti a. Sorkar hmalaknaah chiang tawk lo a awm theih thu sawiin Ethics Committee pawh manifesto-a an intiam anga din a nih rualin an thuneihna leh hnathawh dan tur chiang taka tarlan anih loh thu a sawi a. Sorkarin information an pek chhuah a chian tawk loh nual thu a sawi bawk a ni.
AMFU Vice President Dr. H Vanlalhluna chuan Mizoram Watch programme tha a tih thu sawiin a ngaihtuah chhuaktu Prism a fak a. Synod Social Front-a a inhman lai sawiin, “Thingtlang mite hnenah Minister leh MLA te an manifesto hmanga chhuahchhal turin kan hrilh thin a ni,” a ti a. AMFU in NLUP ‘in principle’-a tha an tih thu te, sorkarin tih tak tak tuma an hriat thu te, muang mah mah an tih thu te a sawi a. Sorkar in thlai chi supply kalphung siamtha tura hma an lak mekna fakin thil thaah chuan sorkar thlawp zel an tum lai a tha tawk loah chuan an dodal hreh loh tur thu te a sawi a ni.
Hemi hnu hian chairman inthlakin Prism President Vanlalruata chuan Rual Zakhuma IAS (Rtd.) hnenah chairmanship a hlan a. Chairman in thusawi apiang te thu awmze nei, insiamthat theihna tur chi sawi turin a ngen a. Sawiho nghal a ni.
SOSA Treasurer Bualhranga’n sawi hmasa berin education reform tura sorkar hmalakna chu tha a tih thu sawiin, sorkar leh mipuiin change hmuh kan tum laiin zirtirtu te an la inpeih lo hlea a hriat thu sawiin zirtirtu te buatsaih kawnga hmalak a tul zia a sawi a. NLUP chu mipui moral tichhe lo tura theihtawpa fimkhura hmalak a tul thu a sawi bawk a.
C Laltanpuia, Chanmari chuan Congress election manifesto a chiri mah mah thu leh tihhlawhtlin vek a har tur zia te a sawi a. Sorkarin VAT kalphung a siamthat chu sumdawng anih avanga a hriatchian thu sawiin, “Tuna an siam that hi a hma aiin sumdawng tan a buaithlak a ni,” a ti a.
Prism Secretary Lalthuamliana chuan corruption dona leh change thlenna kawnga sorkar chu hnungtawlha a hriat thu a sawi a. An sorkar hlima an hmalakna tha tak, mipuiin beiseina an neih phahna chu an hnungtawlh san nia a ngaih thu sawiin sorkar chu inenfiah a, insiamtha tura a duh thu a sawi.
RK Thanga, Mission Veng chuan sorkar chu inenfiah tul hlea a hriat thu uar taka sawiin tun sorkara pawisa indaihlohna nasa hle a a hriat thu te, education reforms commission in trained teacher lak tura an ruahman laia sorkarin train loh lak a tum tlat te, essential commodities-a harsatna awm reng mai te, crime rate sang zel te chu ngaihthah chi anih loh thu a sawi a. Chutih laiin opposition party te pawh inenfiah se a duhthu sawiin ‘destructive criticism’ zawnga sorkar khalh tum tlata a hriat thu te a sawi a.
SOSA President SL Sailova chuan sorkar kalphung chu mawhphurhna inhnawn zawnga kal nia a hmuh thu sawiin siamthat tul hlea a hriat thu a sawi a. Tin, sorkar chu infrastructure awmsa hman tangkai kawnga inzir ngai tak nia a hriat thu sawiin Chhingchhip-a Fruit Juice Concentration Plant enkawl dan chu example atan a sawichhuak nghe nghe a ni.
MPCC atanga lo tel Lalthanglawra Ngurte chuan sawitu tam takin an manifesto-a mipui hipna chi, tih tak tak hleih theih loh leh tul vak lo an ziah tam thu an sawi chhangin, “Mipui rilru hip tumin kan ziak ve bawk a, hriatthiam kan ngai a ni,” a ti a. Manifesto tihlawhtling tura sorkarin theihtawp a chhuah thu leh hunin hna tam tak thawhna a la daih loh thu a sawi a. An hun hman atanga chhut chuan thawk tha hlea sorkar a hriat thu a sawi thung.
R Lalawia, Ex Speaker chuan sorkar chu ei leh bara chungchanga dem hlawha a hriat thu te, kuthnathawk tu tana sum an haichhuak hnem fakawm a tih thu te, Mizoram Watch leh Prism hmalakna vanga a tha zawnga thil a inher theih a beisei thu te a sawi a. Vigilance Commission din lo tur anga Chief Minister in a sawi chu a thu sut leh hram se a duh thu te, MPSC chairman ruat hunah fimkhur tura sorkar a duh thu te a sawi a.
RC Rohmingthanga, Tuirial chuan NLUP hmalaknaah marketing lam uar leh nasa zawka bei tura sorkar a duh thu a sawi bakah, NLUP sem hmanhmawh aia uluk a tul zawka a hriat thu a sawi a.
F Lalremsiama, Ex MLA chuan sorkarah good governance ziarang a duh khawp a la hmuh loh thu te, ACB-a dah tura mi tha thlan pawimawh zia te, corruption chungchanga fast track court mamawhna nasat zia te a sawi a. Sorkar chu thiltha tih kawnga tan la zual tura a duh thu a sawi uar hle.
Dr. H. Vanlalhluna, AMFU Vice President chuan higher education ngaih pawimawh a tul thu sawiin Mizoram college zingah principal nghet nei pahnih chauh an awm thu a sawi a. “Ram hmasawn nan higher education lama tan lak loh chuan hma a sawn theih chuang loh,” a ti hial a.
RK Thanga, Mission Veng chuan buhfaia tan lak a ngaih thu uar taka sawiin, “Supreme Court in truck te buhfai quintal 90 chauh phurh a phalsak tawh lai hian rang taka chet a ngai a ni,” a ti a.
C. Laltanpuia, Chanmari chuan Minister ten thurawn pe duh tana hmuh theihna hun bik siam se ramin hma a sawnpui a rin thu a sawi a.
SOSA General Secretary F Hmingthanga chuan mipui te kawng dika hruai tura hruaitu pawimawh zia sawiin ram hruaitu te chu inenfiah tura a duh thu a sawi a.
Rual Zakhuma IAS (Rtd.) chuan sorkar chu sports lama fak tlaka che tha a tih thu te, corruption prosecution leh recruitment lama an kal dan enfiah tul a tih thu te a sawi a.
MPCC Spokesperson Lalrozara chuan Mizoram Watch programme changtlung zawka kalpui tul a tih thu sawiin programme awm leh turah a hmuna Minister te tel tir dan zawn tha a tih thu a sawi a. Tun programme atana Prism in RTI hmanga information an lakkhawm chhang ve hman lo Department 3 te enfiah tul a tih thu te, sorkarin hma a lakna kawngah chak leh hlawhtling taka kal anih theihnan mipui an pawimawh zia te a sawi a.
Programme kharna tura thu sawiin Prism President Vanlalruata chuan sawihona atanga manifesto zinga hun kaltawha tih tawh 8 leh tuna sorkarin a tihhlawhtlin tawh 7 awma manifesto tihhlawhtlin tawh zat 15; bawhzui mek zat 77; hma la lak loh 49; manifesto ang lova hmalak 7 leh information hmuh loh 18 awm thu te; April 29-a Watch neih tuma manifesto hlawhtling tawh 13, bawhzui mek zat 72, hma la lak loh 78, manifesto ang lova hmalak 3 anih thu sawi chhuakin,
“April-a kan thlirho hnu-ah khan Manifesto tihhlawhtlin 2 in a pung a, bawhzui mek 5 in a pung a. Information hmuh loh 18 lai kan neih avangin hei hi a dik tawk lo thei a. Hmasawnna kan hmu a. Chutih laiin thil lungchhiat thlak pahnih a awm a. Manifesto-a an ziah loh ang leh a letlinga hmalakna kan tih ang chi hi 4 in a pung a. Hei hian an thutiama an rinawm dan chin a tilang thui viau mai thei a. Tin, April thlaa RTI hmanga information kan dil zawng zawng kan hmuh kim vek laiin tun tumah hian information hmuh loh 18 kan nei a. Hei hi RTI tihhlawhtlin kawnga sorkar inthlahdah vang a ni chiang hle a. Eng ang chiahin nge heng te hi kan ngaih tih chu mimal ngaihdana innghat a ni,” a ti a.
MNF Party in MLA Election lo awm leh huna an manifesto tur an buaipui tan nia a hriat thu sawiin, “Hei hi fak tlak a ni. Political Party zawng zawng te heti hian kal thei se, inthlan dawnah belhchian tlak leh tihhlawhtlin theih ngei election manifesto nei vek se, sorkar apiangin an manifesto chu tihlawhtling se kan ram hian chak takin hma kan sawn ngei ang,” a ti a.
Tlai dar 4:15-ah kham lo takin programme tihtawp a ni.
Similar Posts:
- Manifesto 16 chauh la hlawhtling
- Sorkar hmalakna belchiang ang
- Minister kum naupangte tangkai zawk
- Mizoram Watch in ngaihven a hlawh
- PRISM-in CM chungchangah PIL thehlut
October 30th, 2010 at 1:00 am
Bengvarthlak leh dawn hle mai, remchang thin e. Post tupa, thank you.
Report this comment
October 30th, 2010 at 1:06 am
tha e
Report this comment
October 30th, 2010 at 1:10 am
Mahni mita khanchhuk hmu lova; midang mita hmawlhte hmu thei em em ho khawmpui a nih ber awm hi maw!!
Report this comment
October 30th, 2010 at 1:48 am
Rah tha chhuah mawlh teh se… A sawi chauh thei, sawi tur chauhva fing leh taima, thawk tur leh bawhzui tura chak lo leh mahni pumpui chauh hmachhuan leh thin si. Hahthlak hlawm teh e.
ZH.Ropuia ngawt ai chuan Zodintluanga chuan fak a hlawh deuh maw?
Report this comment
October 30th, 2010 at 1:53 am
A tha e, hetiang hi ti fo rawh se. Inenfiah nan sorkar pawhin hmang ngam se ka ti.
Report this comment
October 30th, 2010 at 6:31 am
Andrew Khiangte-a’n ZNP chhuahsana Congress a zawm khan —a mak deuh va, Lalduhoma’n a zawm hian a mak ta lem lo va! Kan ram a survive-na tur hian Political Party hian survival game a khelh hmasak hi a ngai ve chawk a ni awm e.
Report this comment
October 30th, 2010 at 8:10 am
Sawrkar chu tan lak sduh a ngai a nih hmel, chu ti lo chu term khat bak an daih ka ring lo.
Report this comment
October 30th, 2010 at 11:15 am
Famkim lohna khawvel hi chhuahsan chak hi kan vang ang reng fu an ti!
Mi erawh an thuhmun thei lo ! Hmasawn lo ni a inhriat tlat hi a pawi…Hma zawng kan sawn chiang e. Ram dang anga hmasawn pur pur hi kan infra-structure hian a zo lo zawk niin ka hmu. :roll:
Report this comment
October 30th, 2010 at 4:53 pm
Post ngaihnawm khawp mai! A bengvarthlak bawk! Eng party mah hian an Election Manifesto hi an bawhzui tha tak tak ngai lo a nih ber hi a! Ei ruk bang hi chuan engmah a puitlin tak tak theih loh tih a chiang e! :?
Report this comment
November 1st, 2010 at 11:35 am
Mizoram Watch hi thiltha anih dawn hi. Party te hian mipui hi min bawl thin lutuk a, tihreh a hun tawh. MPCC atanga tel Lalthanglawra Ngurte in, “Mipui rilru hip tumin kan ziak ve bawk a, hriatthiam kan ngai a ni,” a tih khi a rapthlak ka ti. Election Manifesto hi an thutiam a ni a, mipuiin kan mandate-na a ni a. Tihhlawhtlin a batin an ba.
Mizoram Watch vang hian Inthlan awm zelah pawh party ten manifesto awmze nei an insiam siak a, an intihhlawhtlin siak theih ka beisei a. Mahse, a programme hi tun aia public a kalpui a ngai ka ti riau mai.
Report this comment