mi(sual).com

adxpits-a alien post azarah ka lehkhabu ziah lai ami ka rawn post ve e.

…Chutia chak lutuka van lam pana kan thlawh fur fur lai chuan Omnus khua chu kan thleng ta hlawl mai le!! Omnus hmun chu fang turin kan chuanna rocket atang chuan kan chhuk ta a. Kan kal zela, kawng sira lung lo inphunah chuan Omnus-2 tih hi a lo intar kulh maia. Kms. hnih chauh a awm tawh ani tih kan hriatin kan lo chak thar leh taa, thui vak lo kan kal leh hnu chuan signboard-a Welcome to Omnus, Omnus Branch YMA tih a lo intar leh meuh chuan phurna nasa lehzual min siam a.

Thui vak lo kan kal leh hnu chuan ‘Reception Office cum Main counter’ tih intar kulhna te tak te chu in report na tur a nih ringin ka va lut a. A lo ni ngei bawk renga. Tichuan kan kal chhan leh kan kal duhna hmunte kan hrilh hnu chuan ticket leh nula pakhat min hruaitu tur hi min rawn thehchhuah sak ta a. He nula hi a pianhmang chu a dangdai ve asin, silver suit-in a inthuam a; feet thum leka sang a ni a, lu lawk ber bur a ni a, tin, a din mar zat paw’n lei a khawih pha a ni.

Pu Gandhi-a khup khawih pha pawh kan awt a nih chuan he nula hi chu awhawm tak tur a ni. Tin, a kutphah hi varak ang maia inphan duar mai a ni a, kei, ler tia tlang hriat pawhin ka it chhin lo reng reng. Itawm tertur hek lo. Mahse a fing pherh erha. He nula hian Omnus khuaa mi chengte en turin min hruai hmasa a.

Room no 1: Mi pali, silver rawnga inthuam hi an lo awm a, heng mite hi an tawi hle a, an ruhrel kimtlang a hriam bawk a, mit lian tak, sen rimrem an nei a, en mai chuan mipa leh hmeichhia hriat hran theih an ni lo.

Room no 2: Mi pakua an ni a, hmeichhia vek anni. Saruak vekin an awm a, ui bauh ang mai hian an inbia a, feet li leh a chanve vela sang anni. An sam a laiah bari an then kak phak mai a, mitmu lian tak, dumpawl raih mai an nei a, an mit hi a tungsawl deuh a ni. Biang ki sang deuh, khabe zum tak, hmui pan deuh, ban thuangvuak de thak, kumkar hmul sen deuh thar an nei a ni. Saruak veka awm annih avang hian kan zinga hmeichhe thenkhat chu an lo zak vel.

Room no 3: Heta mite zet hi zawng an mak a ni. Lu an nei lo. Taksa dum zenzun, varak ke ang maia inmphan duar, bak ang maia thla neite an ni a, thau metmut, tawi takte anni. Mi 36 anni.

Room no 4:Heta mite hi chu an rapthlak kher mai, mi 36 bawk anni a, mit senduk khuih mai, ni ang maia eng an nei a, silver rawng suit, tle neuh neuhvin an inthuam a, mihring pangngai ang tak anni. Ketli hmawra tuiso bawrh bawrh ri ang hian an thaw a, pheikhawk rawng sang, keartui zum deuh an bun vek a, kawnghren hlai hlephlawp an hreng vek a, a baggle chu lunghlu thami ang mai hian a tle neuh neuh mai a ni.

Room no 5: Mi pali an ni a, Feet li leka sang anni. Kawr leh kekawr inzawm an ha vek a ni. An hmel thup nan hmaikawr an vuah vek bawk.

Room no 6: Heta mite hi 16 an ni a, feet ruk laiin an sanga, mit lawk tak, hmui pan deuh leh chal kawlh tak tak hlir anni.

Room no 7: Heta mite hi 81 lai an ni a, te tak te te, feet thum leka sang, lu lawk birber anni. Tin, an makna em em dang leh chu chaw kalkawng heng: hrawk hrui, pumpui, ril leh zahmawhte an nei miah lo. Tin, thisen pawh an neilo. Red blood leh white blood hriat hran a har ngawt ang.

Room no 8:Heta mite hi 36 an ni a, te tak te te, inches 38-44 leka sang anni. 1890 hun laia Mizo inchei dan niawm taka ngaih theih turin an inchei a ni. An thuamhnaw hi a mak danglam hle. Puan pawh a ni lova; wool pawh a ni hek lo. Tet theilo a ni tawp mai. Thuilohkawr pawh a ni chuang lo.

Room no 9: Heta mite hi chu 190 lai an nia, an lian hlawm ropui mai mai bawk si. An room an luahkhat thawthang a ni. Feet 9-15 vel laia sang an ni a, hmai sen hlur mai, tai si lo hi an nei a, mit de hring nghulh mai leh pawng pur mai hi an nei bawk a, tin, an mit leh mit inkar hi foot khat laia inhlat a ni.

Room no 10: Heta mite hi chu pathum chauh anni thung a; feet nga vela sang anni. Thuamhnaw uk hlirin an inthuama, an vunte chu rapthlak khawpin a chuar tup mai a ni. Nghawng an nei lova, an bante chu a hmawr lamah zungtang pahnih chauh neiin a zuihral a, ke pawh a hmingin pahnih chu an nei ve bawk a, mahse a in thuizawm tlat mai a ni. Pheichham ni awm takin a sawhin an sawt ouh ouh mai a ni.

Room no 11: Heta mi chengte pawh hi pathum bawk an ni a, kut mak tak tak an nei a, an hmaite chu awm ze mumal pawh nei lovin pat ek ang mai hian a hring nghulh maia, tin, sam, mit, beng leh hnarte an nei hauh lo. Feet 5:7 vela sang, ria thalh mai hi an ni a, an thuamhnaw duhzawng chu rawng da deuh lampang a ni.

Room no 12: Heta mite hi 25 an ni a, an eng deuh phet reuh mai a, beng zum, hlai deuh mai an neia, an mit khur chu artui ang deuhvin a sawl a, hnar lian leh zum tak an nei bawk a ni. An tukhum pawh a eng deuh phet.

Room no 13: Heta mite hi pali an ni a, mihring ruangam an pu a, mahse hluma siam nilovin dar hlanga siam an ni thung. Hmai pali leh thla pali an nei theuhva, an ke an thluang a, bawng tin ang an nei a ni. Mihring kut ang pali an nei theuh bawk a, an thla hnuai zelah an kut chu a awm a ni. Chung mite chuan an thla an zar pharh theuh chuan an thla hmawrte chu an intawk pha a, kil li neiin an dinga, an chet sawn pawhin an zain inher lovin an che sawn thei a ni. Sawi tak angin heng mite hian an hma lamah mihring hmel ang an pu a, an ding lamah sakeibaknei hmel ang. An vei lamah bawng pa hmel ang. Tin, an hnung lamah mupui hmel ang an pu bawk a ni. Tit chuan tluk lo tak anni. Tit ve le’m an lu lam sakeibaknei. An mawng lam savawm. A hmingin a lai rul a ni ve bawka, tumah chuk thei bawk si lo. Ke a ngah tam thlawn mai a ni.
Room no 14: Heta mi pawh hi mi pali bawk ang ni a, mahse an inang lo vek thung. a) Cherub hmel ang.b) Mihring ang. c) Sakeibaknei ang. d) Mupui ang.

Room no 15: Heta mi pawh hi mi pali bawk anni a. Hma lam leh hnung lama mita khat tlat anni. An vaiin thla paruk theuh an neia, hetiang an ni tawh chung hian mitinin danglamna an la nei vek zui.I’n tarlang teh ang.
a) Sakeibaknei ang.
b) Se bawng no ang.
c)Mihring ang.
d)Mupui thlawk lai ang.

Room no 16: Heta mi hi pahnih chauh an ni ve thung a, sakawr var chungah an lo chuang a, cowboy angin jeans kekawr an ha a. Mahse cowboy lukhum khum ta lo chuan nunna Lallukhum an khum thung a ni. An kawr awma an badge belah chuan an hming a langa. Chu’ng hmingte chu Mizo hming ang chiah mai hi a lo ni a, mak ka ti hle. Lalrinawma leh VL Rindikate anni.

Room no 17: Hetah hian mi pakhat chauh a awm thung. Chu chu Hmanlai Rome-ho pathian Janus kha a lo ni a, mak ka ti hle. He pathian hi a hmai a lian hle a, a lu ai mahin a lian a ni. A hmai vei lamin kumhlui ral ta a thlir a, a hmai ding lamin kumthar lo thleng tur a thlir thung a ni.

Room no 18: Heta mite hi 19 an ni a, thuamhnaw tle zur maiin an inthuam a, ke pawh pen lem lovin a tawlhin an tawlh zel zel mai a ni. Tin, anmahni hi thir pheka khawr chawp mai anni.

Room no 19: Mi 56 an ni a, kan inan lohna chu an mit a lian bik hi a ni. Kut phah tiat zet mit zu han nei a!! Thil an hmu chiang thei ngawt ang.

Room no 20: Heta mite hi za lai an ni a, naupang kum sawm mi tiat vel anni. Pilot angin thuamhnaw inzawm an ha a, a siamna hmanrua erawh chu lei lam thil a ni lo thung. Chaw kawng pawh an nei lova, pumpui pawh an nei lo. Chaw pawh an ei ngai lo. An thisen chu a var a ni.

Room no 21: Heta chengte hi zawng an mak a, an mak leh lo. Rin loh lutukte annih avangin mak ka ti a ni. Heta chengte hi khawvela mihring pangngaite an ni a, an insawi dan chuan heta an awm chhan hi Bermuda Triangle (North America & Europe inkar tuipui) leh New Devil’s Triangle (Malaysia ram dep, China sea hrul vel) leh Lack of no return (Arunachal Pradesh leh Burma inrina lai vel) vela thlawhna, lawng leh motor vela an kal laia bo tate kha an nia, UFO (Unidentified Flying Object) ho rukbote an lo ni hlawm a. Bermuda Triangle a bote insawi dan chuan, “Kan thlawh laiin kan kal fo tawh naah khan hmun thim tak mai hi a lo awm reng mai a, pan loh kan tum paw’n kan pan lo thei silova, tichuan kan luta, chutah chuan arsi de zeuh pawh hmuh tur an awm lo. A thim kher mai. Aigupta khawthim kha nge thim ang aw? kan ti. Aimitthlawn chu nep te a ni. Tichuan helai hmun hi kan thleng ta hlawl mai a ni,” an ti. Hetia an rukbo nachhan hi mihringte hi min thlir reng thin a, remchang an hmuh apiangin khawi nun atan emaw leh chithlah atan an rubo thin a lo ni. Duh angin kan fang chipchiar hman lo naa, kan mi hmuh ho tlemte hi ka’n tarlang hrim hrim ange:

1, Lt. Charles Tailor-a 5th. December 1945 chawhnu 2:10-a America khawmual vaukam chhaklam Florida State-a khawpui pakhat Fort Lauderdale thlawhna tumhmun atanga thlawk chhuakte,
2, Pilot Robert Linguist-a Jamaica atanga 17th. January 1939-a bo tate,
3, 1st January 1973-a Fort Lauderdale atanga Freeport lam pana an thlawh laia bota ‘Cessna-180’ an tih maia pilot Ringoni leh co-pilot Bob Corner-te,
4, Lt. Charles Tailor-a bo ruala thlawkchhuak ve tho, Marine pilot Captain Stiver-ate,
5, 26th. January 1948-a Azores-Bermuda passenger thlawhna (Star Tiger) pilot Sir Arthur Conningham-te,

6, 17th. January 1949-a Star Arial pilot Captain Mc. Phee-te,
7, 27th December 1948 zan dar 10:30-a San Juan airport atanga thlawkchhuak (DC-10) khalhtu Captain Robert Linguist-te,
8, 7th. June 1964-a Bahamas chung zawna an thlawh laia bota hmeichhe private pilot Carolyn Cascio-ite,
9, 17th. February 1974-a baloon hmanga Atlantic tuipui thlawhkhum thin, Thomas Hatch-a Azores atanga chhimthlang mel 900 vela bo daih maite,
10, Indopui II na hun laia British sipai hotupa General Stillwel a leh a hote, Lack of no return hmuna bote leh
11, Heta mi pawh hi British sipai ho bo hnua an bona ngaia rawn bo ve Japan sipai hote kha anni.
Room No 22: Mi pahnih an ni a, mihring zawng hmaikawr vuah an ang berin ka hria.

Tichuan Omnus khuaa mi chengte kan en zawh hnu chuan min hruaitu nula bawk chuan Omnus khuaa an motor velte en tur chuan min hruai leh ta a:

Room No 1:An motor pakhat chu meizial ang tak, feet 100 laia sei, eng phet mai a nia, tukverh dumpawl a nei.
Room No 2: An motor dang leh chu artui ang tak, feet 35 laia sei leh feet 23 a hlai hi a ni a, a eng phut mai a ni.
Room No 3: Heta an motor dang leh chu kan khua Sihphir leh Lungdai vela feh nana kan tawlailir hman thin ang tak a ni a, mak ka ti hle.
Room No 4: Heta mi ve thung erawh hi chu chaw ei thleng ang tak, hang ren run, feet 11 laia hlai a ni.
Room No 5: Heta mi ve thung hi chu lung anga awm tawp mai, mahse rangkachak anga tle tak hi ani.

Room No 6: Heta mi hi chu eng tak mitin ti eng thei ni awm tak hi a nia, a var a, a bial sawl deuh a ni.
Room No 7: Heta mi pawh hi room no 5 ami anga awm tawp mai, feet 28.5 laia lian a ni.
Room No 8: Heta mi hi chu satel hnungzang ang mai hi a ni a, a chhungah hian room 15 zet a awm a ni.
Room No 9: Heta mi hi chu bawm kil thum nei, a chhip lama zuih chho pat mai a ni.

Room No 10: Heta mi pawh hi room no 4 ami ang deuhvin thleng pahnih khaikhupa in belhkhawm hi a nia, Alluminnium ang deuhva tle a ni. A lai hawl velah chuan a kaw chek chuk mai a ni.
Room No 11: Heta mi hi chu he Omnus khuaa kan kal dawna kan rocket ang deuh chiah mai kha a nia, mak kan ti hle.
Room No 12: Heta mi hi chu thir bawm lian pui mai leh bial chui mai a ni a, a pang velah chuan tukverh a tlar thut mai a ni.
Room No 13:Heta mi chu room no 3 ami ang deuhva tawlailir ke pali nei a ni a, leiah a innghata, inher lovin khawi lam hawi zawng paw’n a che sawn thei a ni.

Room No 14: Heta mi hi chu chair ang tak, saphhir lung hlanga siam a ni.
Room No 15: Heta mi hi thil mum tlawn zuah mai a nia, a sir hmun hnihah a pawp bawk.
Room No 16: Heta mi chu helicopter a chung vir leh a mawng lam awm lo ang tak, a maka maka eng a ni.
Room No 17: Heta mi hi chu bial kum phut mai, chhawng li ang deuhva awm a ni a, a hniam berah chuan barel ang deuh hi pathum a awm bawk. A chhawng chung berah tukverh pahnih a awm a, chhawng linaah tukverh pali a awm thung. Tin, a lai takah thil sei tak a inkham tlang ruaha, chu chu chung lamah tlem a lawr chho a ni. A pangah hian ‘HOT’ tih ang deuhvin hawrawp inziak a awm.
Room No 18: Heta mi hi chu thli khawl (wind turbine) ni awmtak a nia, feet 290 laia lian a ni. Blade feet 65 vel zeta lian a nei bawk.

Omnus kan fan zawh hnu chuan planet Ni hnaih ber tu, Mercury-a tum tur chuan kan chuanna rocket hmang chuan kan thlawk chhuak leh ta a.

Similar Posts:

• I thil hmuh hi i chiang maw?
• Helicopter Crash!
• International Paris Air Show 2011
• Pyramid Valley
• Dawn ti sei…….

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Saturday, October 30th, 2010 at 10:30 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.