Hre rengin ngaihtuah reng lo mah ila a hming sawi chhuah chang leh a thlalak duhawm tak hai chhuah chang chuan rilruah a rawn thar leh a, kum tam liam tawh mah se ka bulah hian a nui leh sen sen hian ka hre thin. Tunah hian khawnge a awm a, pasal neiin hlimtakin a khawsa ta nge, pialralah riah run a rem tawh zawk tih pawh hriat ni tawh hek lo, ani paw’n ka chanchin hriat zui a nei tawh bik hauh lo ang le.
Kan naupan lai (han ti ve khang lang ila)a, thing lukham tur te,vawk chaw tur changel te pu a, tlai sikul bana Leipui lam pana kan liam thlak thin lai kha chuan ngaihzawng reng rilruah a lang lova. Thaw a veng em em mai thin. Tleirawl kan han ni chhova ngaihzawn kan hriat hnuah pawh Hmangaihna kawng hi a mam vekin min nuihtir rengtu a ni emaw kan ti thin a, mahse tun hnuah erawh hmangaihna kawng hi a lo chhuk chhoh zia leh min tahtir fo thintu a nihzia a fiah tulh tulh mai a nih hi.
Zirnaa pawl sawn chhoh ve zel chuan mahni in lum atanga zirna in belh chu a lo theih reng bik lova. Hmun hla zawk panin mahni in lum chhuahsan a lo ngai a. Hnam dang karah kan tal ve naw naw mai a ni.
Kan college-ah chuan a tam zawk hnam dang an ni a. Kan luh tirhin kan senior mizo te’n awmdan tur min hrilh a. An sawi tam ber leh mizo zirlaite zinga harsatna lian ber chu Hnamdang ngaihzawn chung chang a ni. A bikin hmeichhia hnamdang ngaihzawng nei te, sawi neuh neuh an kai thin avang leh, hnam dang mipa te’n a sihhnip zawnga kan nula te an sawi rik zauh zauh thin avangin kan u te chu an khauh hle a. Tumah hnamdang ngaihzawn loh tur tih kha dan ding lai a ni tawp mai a ni.
Mahse, mihring induhna te, hmangaihna kan sawi fo thin te hian chi leh sakhua a thliar hrang lo a ni tih hi sawi nawn kher a ngai awm love.
Nikhat chu library-a ka awmlaiin kan senior hnamdang nula pakhat hi a lo lut ve a. Lehkhabu a lachhuak tur chu a thlauh palh hlauh mai a, rang takin ka chhar sak a. Lawmthu min hrilh pahin min rawn nuih vara, a hmel a tha chiang kher mai. Zawlaidi min tat ta em ni tih theih tur khawpin, a maka makin khami ni atang khan ka vei nghal tlut ta mai a. Nitina han hmuh zui tak phei chuan amah a no nalhin a mizia pawh ka rilrem zawng tak a ni bawk nen, a zunah chuan ka uai ti tih ta der mai. Mumang pawha ka la mangphan ngai loh ‘hnam dang nula’ zunah chuan chhawl ang ka uai ta a ni ber e.
A class bang rawn haw te hi ka room tukverh atangin ka thlir vawng vawng thin a, a liam hma loh zawng ka tukverh hi khar theih reng a ni lo. Amah hmuh chak vangin riltam lo chung pawh College canteen-ah ka kal phah fo thin. Chutianga nitin hun ka hman hnu chuan, zep rual lovin ka thian te pawh chuan an lo hre darh a, amah pawh chuan a ralkhat hriat tawh ngei a ni tih a chezia atangin hai rual a ni lova. Mahse, nula fel ta ngang a nia a thup thiam em mai a ni.
Ka duhna chu nitinin a zual zel a. Chuti ta sa sa tia inpet ruhin City lama weakends hmanpui turin ka huaisenna zawng zawng nena inthuamin ka sawm ve ta rawih a. Ani chuan a hnial lem loh thu min chhang a. Nilengin kan inzuia, a duhna hmunah ka kalpuia chawchhun te ei dunin hun hlimawm tak kan hmang dun a. Ka duh thu leh ka hmangaih thu sawina hun ka zawng char char a, mahse ka zam em avangin hun remchang pawh ka bawhpelh zel a. Tlaiah college canteen-ah inhmu turin min tiama, ka lo nghak vang a. A ni, chu hmunah ngei chuan a ni hmangaihna rose par chu kan phun tak ni.
Hlimtakin hun leh ni te kan hmang dun thin a. Mahse, sawi tawh angin kan senior te dan siam ka bawhchhiat miau avangin harsatna neuh neuh kan tawk ta fo mai a. Ka mizopuiten min enhrang tan a, hrehawm ka tia, mizo thil tihnaah pawh ka inkil-tawih tan a. A ruk takin inthiam lohna ka neia hrehawm ka ti hle thin.Mahse, ka hmangaiha then har ka ti bawk si.
Amahah sawi selna tur ka nei hauh lova, a hnam leh a sakhua a zahzia te hi mak ka ti a. Dik tak chuan ka bulah khan a hnam a chawisang thiam a, zahawm takin a awm a, a sakhua-ah a rinawm em em thin. Ama zia atang thlir chuan a hnampui nula dangte pawh chu an ngaihsan awm hliah hliah hian ka hria a. Tun hma ka lo ngaihdan thin pawh min thlak hlawk tir thei hial a ni. Mizo tawng zir nuam a tih zia leh har a tih si zia te kha a van hlimawm thin tak em! Thiam leh thiam lova “Ka hmangaih che” a tih tawngkam te kha a thlum bika a, a duhawm hliah hliah bik a ni.
Tlai khat chu kan college chhak tlangah kan leng dun a. Zo thlifim a rawn thaw heuh heuh a, a sam dum hlap mai chu a chhem leng delh delh a. Kut insuih rialin kan thu duna, khua a lo hnimin tlang karah ni pawh a her liam tep tawh a.
Chutia kan thut dun reng lai chuan, a rawn hawi phei haw a, ka mitah fiah takin min rawn en kalh a.“Kei chu…” a ti ringawta, a ngawi vang vang a. Sawi duh a nei a, a sawi duh pawh a eng lam aiin a thim lam a ni tih a hmel atang chuan hai rual a ni lo. Eng nge sawi rawh ka ngaithla che lawm, aw dam diaia ka han tih chuan, hnuk-ulh teuhva bianga mittui lung ngiai chungin ka awmah a bei thlawpa a sawi thei lo.
Sawi rawh vawi enge maw zah ka tih hnu chuan… “K’, kan innei thei dawn chuang lova, Ka chhungte’n an remti lovanga, chutiang bawkin i chhungte bakah i sakhua leh i hnamin min pawm hek lovang, kan inthen a ngai dawn ta a nih hi” a ti a. Inhnit fap fap chungin.. “ Ka tana i inpekna zawng zawngah ka lawm a, i rilru ka tihnat thinna zawng zawng min theihnghilh sak la; keimah avanga diriam i tawrhna zawng zawngah min ngaidam ang che aw… engpawhnise, Thank you for loving me”.
A va’n na tak em! Aw, kan hnam kan nun dan a danglam lam vang maia hmangaihna kuhmum duhawm tak parchhuah tir thei lova kan chunga a rawn thleng ta mai chu tawrh thiam a hara mahse, tawrh thiam a tul si!.. Kei chuan kan intawn tirh pawh khan heng zawng hi ka hmu tlang vek a, mahse hmangaihna chuan ka mit a tidel a, ka hai der lui tlat a. Kan tawn tawn kan tawng anga kan nih nih kan ni mai a niang chu tiin Hmangaihna ka hlan ta kha a ni a.
Ni e, sawi tur ka nei lo. Ka ngaihtuahna a bing mupa hun engemaw-ti -chen chu ngawi rengin kan inkuah vawng vawng a. Khua a rawn thim dawn tana, hostel lam panin kan chhuk a, an Hostel gate thleng ka va thlah a. Muang changin ka let phei a, kawng atanga ka hriat theih tawk turin Bonjovi hla, Thank you for loving me chu a rawn play riai riai , tichuan kum tluanga in tawng leh ngai tawh lo turin mittui nen kan invai liam ta a ni.
Similar Posts:
- Pui thei in awm em?
- What is Love? What does it mean to me?
- Hmangaihtu ngawi chawi
- Ka pu Shakespeare-a love story
- Hnam phatsan nge, Hmangaihna?
November 13th, 2010 at 11:03 pm
Bonjovia’n ” thank you for loving me” tih a sak kha min ti hre chhuak rum rum mai..
Report this comment
November 13th, 2010 at 11:04 pm
Chhiar a nuame!!
Report this comment
November 13th, 2010 at 11:21 pm
A va thui tha reuh ve….
Report this comment
November 13th, 2010 at 11:23 pm
zawngchhuak leh rawh.. :cry:
Report this comment
November 13th, 2010 at 11:23 pm
Sialton Official min ti hrechhuak daih mai
Report this comment
November 13th, 2010 at 11:25 pm
@ evergreen leh mi dangte,
1. ngaihtuah a ti thui hle mai, mizo mipa hnam dang nei sawi tur hriat i(n) ngah em ?? Mizo mipa te hi hnamah kan chiang tihna nge hnam dang hmeichhiate hi an hnamah an chian avanga nei kan tam lo zawk ?????
2. Mizo hmeichhia hnam dang nei an va tam si ve???? hnam ah an chiang lo nge ?? hnam dang hmeichhia an tluk lo nge??? ka khaw hawi zim vang a hre lo ka ni zawk em???
Conclusion, Mizo mipa te hian hnam a kan chian avang ai mahin hnam dang hmeichhiate hian an hnam ni lo na zawng neih an duh lem lo,kan hnam hmeichhiate erawh chuan hnam dang neih an hreh lem lo, chak zek zek pawh an awm.(Mipa tan a ngai nge hmeichhia te inen let a ngai?)
Post atan em chuan sawi thui tur ka hre lem si lo, i post zarah hian sawi ho a rem em ang chu ??????
Report this comment
November 13th, 2010 at 11:35 pm
Ziak ngaihnawm thiam hle mai! Sawi zawm tur erawh ka hre lo! :?
Report this comment
November 13th, 2010 at 11:36 pm
va ngaihnawm mai2 ve……zin hlanin thil ngaihnawm a kal bo zo mai dawn lawm le
Report this comment
November 13th, 2010 at 11:48 pm
doc, tamil nula a mi? i hman hun ah chaw lo ei teh aw.. i sawi dun teh ang. :wink:
Report this comment
November 13th, 2010 at 11:55 pm
@lalkhawpuimawi
Tamil nula a ni bawk lo aw.. :lol: :lol:
Kan la sep dun ang chu. chaw eia sawm chu ka awlsam khawp mai. :lol: :lol: :lol: Kan MI ve dawn nia. :lol:
Report this comment
November 13th, 2010 at 11:59 pm
lawks.. tamil terima? te in tih nawk2 kan ring ngawt mawle…a sam a jasmin par hnim veng2 chang a tam ngawt lo maw..lolz!
Report this comment
November 14th, 2010 at 12:02 am
Ka rawn comment ve e.
Report this comment
November 14th, 2010 at 12:05 am
Nula hmangaihna intih teh fo hi engnge maw ni le? Nula hi ka ngaina lem lo khawp mai.
Report this comment
November 14th, 2010 at 12:12 am
Dr.Green chu tamil nula zunah i lo uai der twh a ni maw kha. .eng pawh nise i ziak ngaih nawm e.
Report this comment
November 14th, 2010 at 12:22 am
Dr.Green ih maw khawpuia ang khan lo luck ve teh chuan i bunghai ve hu mai ang..lolz….nge tibet nula i hmuh tai chanchin kha mi i rawn ziah hi. .lolzzzzzzzzzzz
Report this comment
November 14th, 2010 at 12:32 am
Hnuk i ti ulh reuh mang tak e maw,… :cry: :cry:
Report this comment
November 14th, 2010 at 12:40 am
Ngaihnawm ve!! A title ka en khi chuan hlathu i rawn ziak chhuak anga i nuna thil thleng nen i rawn hmehbel vel dawn emaw ka tia mahse ka rin loh ang deuh. Ziak thiam e. Part 2 te han siam la, college reunion ah te khan inhmu vel ula, ngaihnawm ngawt ang.
Report this comment
November 14th, 2010 at 12:54 am
@lalbuai..khawpuia chu Bunghai lam maw? wow..ka hre ve chiah.
@aduhi, nia part 2 siam chak awm khawp mai..Thui deuh post hi a inthlahrunawm deuh thina, tawi lah hi a ngaihnawm hman lovang tih a hlauhawm ve bawk nen..:lol: :lol:
“college reunion-ah te in hmu vel ula ” i tih khian min ti phur tlat :lol: Ka hmu chak khawp mai. Kan inhmu leh mahna :lol:
Report this comment
November 14th, 2010 at 1:21 am
dr.green ‘city lamah weekends hmanpui tur in’ chnai city ah maw i awm ka tia chnai thingtlangah (palavrm) ni maw i awm..lolz..chuan marina beach vel ah mi in len dun a.haha
Report this comment
November 14th, 2010 at 1:23 am
In college kal laia i sitar, in senior, sikkim nula (vel pawh ani mahna) lo in ngaizawng ta ula. . . . . tih i suangtuahna khawvel mai mai ani lo maw?
@Ngente, Hnamdang nula te hi ngaihzawn an har lo khawp mai. Chutiang bawkin mizo nula te hi chawhrualin hnamdang tan ngaihzawn an har lo, Mahse mizo mipa tan chuan mizo nula hi an hlutzia hnamdang nula bula kan chen tam poh leh kan chiang! Mipa nunphung chu lo dahtha ta ila, Hnam hrang hrang hmeichhia te nunphung ah hian mizo hmeichhia te nun hi a awhawm ber. chutiang bawk chuan hmeichhia te pawh in mizo mipa te min ngaih ve pawh ka beisei. Amaherawh chu, hmeichhia te hi rilru nem zawk leh an duhloh na ah pawh hruai awlsam zawk anni. Hnamdang mipa ten an zia thup a, an thatna tinreng nen a an han thlem chuan inneih thlengin an tlu ve mai thin ni in ka hria. (ngaihtuahna kal lai a tawp thut chu! ti zawng hi ni phawt mai teh se, a ziak tupa hi….)
Report this comment
November 14th, 2010 at 1:24 am
Fire House ho hla Love of a Lifetime kha min ti hrechhuak. Mahse in thenna biahthu inhlan ngai khian he ti hian a hla thu min ngaihtuah chhuah tir, “I guess the time was right for us to say Goodbye”
Ngaihnawm hle mai.
Report this comment
November 14th, 2010 at 1:30 am
hmangaihna hi a awm a ni..ka sawi thui peih lo
Report this comment
November 14th, 2010 at 1:32 am
A nia sin
Report this comment
November 14th, 2010 at 1:34 am
va ngaihnawm mai mai e. Hringnun hi chu chanloh leh neihloh apiang hi it a zual mai anih hi maw. A dang rawn ti leh rawh, i la nei hrim hrim, i lerh dan ah hian :lol:
Report this comment
November 14th, 2010 at 1:34 am
A ngaihnawm hle mai.
Hnam dang zuna ka uai lo hi ka va’n nihlawh tak em!!Chutinilosela chuan ka then thei awm tawp silova…
Report this comment
November 14th, 2010 at 1:43 am
lunglen thlak ve oooo….
Report this comment
November 14th, 2010 at 1:44 am
RosangaD mai mai chu aw….an awih tak tak palh ange. :lol:
@vanchhawng..”I guess the time was right for us to say Goodbye” tih chu a har khawp mai an ti a tawng tawh te’n . :lol:
@zoho..
nang aiin ka ler lo fe zawk aw..DNA lam rawn post ve teh!
Report this comment
November 14th, 2010 at 1:46 am
A ngaihnawm dap dap khawp mai..
Report this comment
November 14th, 2010 at 1:51 am
i CHAWH!!! ka naute (medical students’) tam tak hi in duh thlan na a ni a, kan sawi ve phak a awm lo, induh tak ngaihzawng nei ula amaherawh chu SIHHNIP in awm suh u tih hi ka hrilh dan thin a ni!!!! :twisted: Pathianthu in la awih awm deuh, a tak a zawm chuang der si lo……….ka sawi treuh nang a……. :mrgreen:
Report this comment
November 14th, 2010 at 1:56 am
@wonderboy..sawi teuh teh. Guwahati in awm lai vel kha
Report this comment
November 14th, 2010 at 2:11 am
wonderboy, GHY thianu Luna te movie hla hairehai :mrgreen:
https://www.youtube.com/watch?v=rfaQ41qGpZI
Report this comment
November 14th, 2010 at 2:58 am
@evergreen, kan guwahati awm lai chuan maw….. in la Pathian thu zawm…nunpui silo… aaaaa…..i hre zawk daih ang…….ka sawi leh duh lo :mrgreen:
Report this comment
November 14th, 2010 at 3:03 am
wonderboy, GHY a inhmuam up thei deuh mai pakhat min mitthla tir chu a hairehai
Report this comment
November 14th, 2010 at 4:05 am
A va ngaihnawm tak em…I thil rawn post hian ka sawi chhuah duh lem loh pakhat ka nunhluia ka thil tawn min ti hrechhuak vawng vawng mai. Hmangaihna khian i mit a tidel lova, a ti var zawk alawm….. I thian dangte hmuh ve loh “amah” ah khian a hmuh fiah tir tlat si che a. Post tha tak a ni e.
Report this comment
November 14th, 2010 at 7:04 am
Tragi-comedy ziak thiam tak i ni!
Report this comment
November 14th, 2010 at 11:10 am
Ngaihnawm riap riap hle mai… Pawngsual thu ngawt ai chuan chhiar a nuam zawk daih
Report this comment
November 14th, 2010 at 11:55 am
J&J hla ‘I hmangaihna vangin lawmthu ka hrilh che, ka tan i rinawm vangin lawmthu ka hrilh che…’ tih daih ka rilruah alo lut.
Report this comment