Wallace Purling-a chu hemi kum hian kum kaw mi a ni ve ta a. Pawl li zir tawh awm tak a nih vei nen pawl hnih-ah a la thu ran mai a. A pumrua pawh a lian uaih tawh na-a, mi che phelh pheng phung; a chevel reng reng pawh muang churh mai hi a ni a. Amaherawhchu, mi tu pawh pui peih reng leh naupang zawkte tana vengtu leh chhantu duhawm tak a nih thin avangin, tute mai pawh chuan an ngaina a. Pawl 2 naupang nih pawh a tan chuan thil hrehawm lam aiin thil nuam leh a nihna tur, a chanvo-a a pawm hmiahna chuan School pawh nuam a tihtir hle zawk a ni.
Chumi kuma an school-a Krismas Drama an chan turah chuan Wallace-a chuan phenglawng kenga berampu lemah tan a chak em em a. Zirtirtu hnena han sawi tawp chu a ngam chiah si lova, a changtu tur an puan hma hun chu rei a tiin a tan chuan hun hrehawm tak mai a ni nghe nghe a. Zirtirtunu hmuh lai phei chuan berampu mizia ni thei awm bera a ngaih ang chuan a nung tam hle reng a ni. Chu chuan a che chu a ti khawr zovin tunhma zawng aiin a che phelh nasa a.
Mahse, an zirtirtunu Pi Lumberd-i chuan chu aia pawimawh zawk, Wally-a’n a beisei ngam hauh lohvah a chantir ta hlauh mai. Khualbuk vengtu atan chuan Wally-a aw lian tak mai chu tha dawn hle pawhin a hria a ni. He hun hlimawm takah hian kan nauva chuan ropui ta sawt hian a inhria a, thu pawh a awih kher mai.
An drama chan chu an khua a mi chi tinrengin an hlutin an en vek thin. An khua-a an School neih chhun hian hetiang hun hi kum tin buatsaih thin lo sela chuan thil danglam leh hlimawm dang hi a vang em em dawn a ni. Chu drama an chan dawn zan pawh chuan Wally-a ang reng renga helhhawlh nasa an awm lovang. A titha duh bawk a, School mai bakah in lamah a zir taima-in a zir nasa bawk a, a thiam lah a thiam hneh. Drama an chan hma-a a thih emaw, mitthi an neih thut emaw a hlau ber tawh.
Khai le, Wally-a te’n Krismas drama an chang tan ta.
Joseph-a chuan dim leh duat em em-in khualbukah chuan Mari, raipuar teuh chu a rawn kuah thleng a. An lo kalna a hla tham bawk a, Mari pawh a chau em em a, dik takin, kal pawh a kal tha thei meuh tawh lo a ni. Joseph-a chuan kawngkhar, rawng uk an hnawih chu a’n kik karh karh a. Wally-a, khualbuk vengtu chuan phur takin a lo nghak reng bawk a. Rang fahrana kawngkhar pawh hawn pah chuan, “Engnge in duh a?” tiin a lo zawt a. “Riahbuk kan zawng a,” ti-a a lo chhan chuan, ding taka enin “Hmundangah va zawng tawh u, he khualbuk hi chu a khat tawh a ni,” tiin a hrilh a. “He khuaa khualbuk awm zawng zawng hi kan zawng chhuak vek tawh a, a khat vek tawh; kan chau em em tawh asin” tiin Joseph-a chuan a chhang leh a.
Wally-a chuan khauh tawk takin “Kan khualbuk pawh hi a khat tawh a, in tan khualbukah hmun a awm tawh lo,” a ti leh a. Joseph-a chuan, “Khualbukvengtutha, min khawngaih hram teh. Ka nupui hian nau a nei tep tawh a, pindan pangngai kan chang lo a nih pawhin, i In kil khawimaw lai tal kha a la ruak lo maw?” a’n ti leh hram a. Khualbuk vengtu hmel thip tak chu a eng tan ta. A hmel chu khawngaihnain a khat a.
A ngawih rei tak em avang chuan an zirtirtunu Pi Lumberd-i mangang chuan bang phen atangin, “A theih loh ti rawh, Wally… a theih loh ti rawh,” a lo ti sek bawk a. Wally-a te ang mi rilru muang leh rilru chaklo lutuk chutiang chanvo pawimawh a lo pe chu a inchhir hman hial a ni. “A theih loh, a awm tawh lo, kal mai rawh u,” a ti thei hram a. A aw pawh a lawi chhe zo vek tawh.
Joseph-a chuan lungngai leh beidawng takin Mari chu a kuah a, beidawng em em-in a hawi a hawi a. Mari lah chuan a pasal dara lu va nghat chungin na tuar hmel nen a khawngaihthlak kher mai. Pan lam tur bik pawh hrelo ni awm takin, kal chak thei tawh lovin, muangchang leh dim em emin khualbuk chu an chhuahsan ta hnak hnak a. Rimawi lung kuai raih mai chu a ri fan riai riai bawk a. An thiam bawk a, mipui pawh an ngawi thup mai.
An zir danah leh Drama kalphungah chuan khualbuk vengtu pa chu ngawi reng a lut mai tur a nih lai chuan kawngka atangin chumi te nupa chu a thlir zui ta vung vung mai a. A mitah chuan hai rual lohvin khawngaih mittui a luang nguai nguai bawk a. Bang phen atangin Pi Lumberd-i chuan, ‘Wally, lut rawh, lut rawh, engti zia nge?’ a lo ti sek bawk a.
Thawklehkhatah chu Krismas lemchan chu a danglam ta daih mai le! Wally-a chuan, “Joseph, kal mai teh suh u, Mari kha han hruai leh rawh,” a ti ta mai a. Hai rual lohvin a hmel ngui tak pawh chu a lo eng tan ta. “Ka pindanah in riak mai dawn nia” a ti ta rohva. Zirtirtunu pawh a hawi phawk chiang kher mai. A hnu lam zela chang chhunzawm turte pawh an hnual rawih mai bawk a.
Chutia pindan a pek tak tlat si-ah chuan an lemchan chu a khawlo zo ta a ni. Mahse, mite thinlungah chuan chu naupang thinlunga Isua’n pianna hmun a lo neih tak avangin kumdang zawng aiin leh Krismas lemchan an en tawh zawng zawng aiin a Krismas zawk tlat a ni.
Ram pumpui han thlirin he hunpui duhawm tak kan nghah dan hi nawm chen nan leh chak zawng tih nan te, intihhlim nan te a ni fo a. He hunah hian hun dang zawng aiin kan thinlungah Isua a leng lo fo mai. He hunah hi chuan misualte pawhin a puala hun hman a, serh ve zawk awm tak a nih laiin thahnemngai taka Kohhrana inhmang thinte pawhin Biak In piah lama zalen kan tum lai a ni thin lawi a!
Kan hmabak Krismas erawh hi chu ka tan leh i tan Krismas duhawm leh Isua tana khualbuk kan kenna hun tha ni hlauh teh se. I tan leh ka tana kan chatuan Lal tak tak ni tura a lo pian thar lehna kutpui han ni hlauh mai teh sela aw…!!!
Kan thinlungah hian Remna Lal fa Isua Krista chu hnawng tawh lul suh se. A vahvaih nan Judai ram kha tawk rawh se.
