mi(sual).com

Misual tling lo ka ni

Hei hi chu thuhma, kei leh Pathian inkar ni lovin, kei leh Misual inkar zawk a ni. Hun engemaw chen atang tawh khan Misual hi ka hmelhriatin ka in-register ve a. Ngaina viau mah ila, kei misual riangvai hi misual ni tur hian tling lo ka intiin ka insit em em thin. A chhan chu mahnia internet connection nei ka ni lo va, on-line reng te chu khawi lamah a ni ringawt. Mahse ngaina ve nafam chuan internet hman hi chuan misual.com hi ka hawng tel ngei ngei a.

Thu pawh ka post tawh a, a chang chuan tlai khawhnu deuha han comment pek changte pawh ka nei bawk. A chang chuan, ‘aw, he thu an discuss lai hian awm ve ila aw…’ ka ti vawng vawng thin. Hetiang anih vang hian ka luh ve chang pawh hian archives lam hawngin Ask&Help  leh religion lam hawi phei chu engemaw zat phei chu save in ka computer-ah hian ka dah khawm ruih ta mai. Hetiang taka Misual ngainatu leh Misual puitling nih ve chak pawh ni ila, misual ni tur hian tlinglo ka inti thin. Huap zau viau e ti lo hian thu post te pawh a inthlahrunawm lek lek a, a chhan chu ka thu post in lo discuss laiin kan lo awm hman tawh si lo ang a, a controversial ve si ang a, misual ho hian min chuk rawn hrep ang a tihte pawh a hlauhawm si a!!

Misual  nihnaah pawh tling lo tia insit viau tan chuan Pathian thianghlim leh ropui hmaah phei chuan insit a na duh khawp mai. Mahse Pathian thu ngaina tak tak kan awm tih ka hria a, chuvangin kei misual tawmkai lo ber hian ka rilrua awm Pathian thu ka sawi dawn!! Ka thuziak hi a sei deuh a, tuman in chhiar peih loh pawhin keima thiam loh a ni ang.

Kristian hma Mizo Sakhua

Mizote hian sakhua mumal tak biain engkim chunga roreltu leh thuneitu chu Pathian, Khuanu, Khuavang tiin kan sawi thin a. Chu Pathian chu chhungkuaa biain Sakhua bia kan ti a, rahbi hrang hrang awmin chu sakhaw biakna zawh chhuaktu thangchhuah kan ti thin. He sakhaw biakna hian vantlang tana malsawmna nih a keng nasa hle. Hei bakah hian hlauh vangin ramhuai an tlawn thin a, hei hi inthawina tia sawi a ni ve thung.

Mizo rin danah chuan thih hnu khawvelah mipui vantlang tan miithi khua leh thangchhuah tan pialral a awm a. Pialral hi thangchhuahte kalna tur, hnathawh ngai lo buhden pawh ngai lo a nih avangin thangchhuah theiu nih an chak hle. Kan rama Kristianna a lo luh khan kan biak lai thin Pathian chu a chanchin leh a hnathawh te, mihringte nena kan inkar thute chiang zawkin kan hre chho a, kan Pathian hriatna chu tipungin kan biak dan pawh kan thlak kan ti thei ang (cf. Heb 1:1,2; Tirh 10: 1-48).

Ringtu hmasate Pathian thu dawn

Mizo Kristiante hla hmasa ber chu Isua Vanah a awm a (KHB-130) tih hla niin, he hla atang hian khawthlang missionary-te hnena atanga Mizote Pathian thu dawn hmasak chu Isua Krista chanchin leh a hnathawh te, sual lak ata mihringte chhandamtu a nih zia te niin a lang. Mahse missionary Pu Buanga khan Mizote chuan sual inhriatna an neih loh vanga leh sual laka chhandamtu mamawh an intih loh avangin sual laka Chhandamna thuchah chu an hrethiam thei lo niin a sawi a (L.H. Lalpekhlua, Contextual Christology: A Tribal Perspective, 92).

He Pathian thu hriatthiam lohna hi harhna hmasa ber 1906-a thleng khan engemaw chen a chinfelsak ang tih a rin theih, a chhan chu kha harhnaah khan sual nih inhriatna leh sual puanna kha a zepui ber a ni si a. Tin, Mizote mamawh zawngin Isua Krista chanchin chu sawiin Isua chu mi chak leh thiltithei, ramhuaiho aia huai zawk a ni a, chuvangin Kristiante (Pathian thuawih) tan chuan ramhuai hnena inthawi a ngai tawh lo niin an sawi a (C.L Hminga, The Life and Witness of the Churches in Mizoram, 57).

Hei hi ramhuai hlaua khawsa Mizote tan chuan chanchin tha a tling an mamawh a phuhruk a, pawm pawh a nuam viau ang. Tin, hei bakah hian Isua chu Mizoten Pialral tia kan sawi vanram kalna kawng angin an sawi bawk a. Hei hian thangchhuah thei lo tan pawh pialral kalna kawng a hawn avangin mipui nawlpui tan a hlu hle ang. Tin, he thuchah hi hremhmun insawithaihna nen a inkawp tlat bawk (Lalsawma, Kristian Thurin Zirna, 307).

Harhna leh Mizote Pathian thu

Harhna lian tham deuha sawi Mizote zinga thleng hi vawi li anga sawi a ni tlangpui thin a. Chungte chu 1906, 1913, 1919 leh 1930/1935 te an ni a. Heng harhna te hian thupui ken bik nei theuhin  sual inhriatna te, Isua lo kal lehna te, Kraws leh Isua tuarna te, Thlarau Thianghlim hnathawhte a ni hlawm a. Hei hian Isua rinna chu vanram/pialral kalna kawng a nih thu a nemnghet a. Tin, hun hnuhnung buaipuina hian Mizo Pathian thuah hmun laili chang zuiin kohhran chhuahsan hmasa ber pawh hemi kaihhnawih hi a ni a. Tin, tun hmaa kohhran chhuahsan zawng zawngte kha hun hnuhnung thu buaipuina avanga chhuak an ni hlawm a.

Mizote Pathian thu leh Piantharna

Kum 1928 vel atang khan Mizoram hmarchhak lam (Ngopa) atanga lo chhuakin hmun tinah a darh a. He pianthar harhna hian Aizawl a thlen chu kum 1955 kha a ni. Tin, he harhna hi Mizoram pawna lehkha zirten an tilar bawk a. Hmun danga an hmuh leh hriat angin Mizoramah piantharna atan crusade leh Campaign te buatsaih a ni ta a ni. He piantharna tia kan sawi hi misual chhandamna ai mahin chhandam nih inhriatna angin a ngaih theih a (Liangkhaia, Mizorama Harhna Thu, 66, 67) . Pastor Saiaithanga kha chuan hriatna za zawk tiin a sawi. He harhnaah hian rinna avanga thiamchanna chu thupui ber a ni a. Mihring suala tluk thu te, Isua thihna avanga Pathianin mihringte thiam a chantir thu te an uar a, Isua leh an chhandamtua an pawm thu puangin Pathian fa nih inhriatna an nei a, an hlim em em a ni.

A chunga kan sawi ang deuh bawkin pianthar harhna hnulama tualto kohhran leh rinna kalpeng deuh chu rinna leh chhandamna lam hawi an ni ta a. Chutichuan Missionary-te din kohhran atanga kalpengte chu kawng hnih lian tak – hun hnuhnung tuipuitute leh Rinna sawihfiah buaipuitute angin a then hlawk theih a ni.

Mizote Pathian thu chu

Mizote thinglungah hian pialral hi a riak reng a, kan thisen zam a fan chhuak vek a. Hei vang hian kan Pathian thu pawh pialralah a inthlung lut raih a ni. Chuvangin kan Pathian thu dawn leh harhna thupui zawng zawngte pialral nen kan sawi zawm vek a. Tun thleng hian hremhmun leh vanram ngaihtuahna hian kan Pathian thu ngaihtuahna hi a hruai thui em em a. Isua chhandamna pawh hremhmun atanga chhanchhuahna ang deuhin kan ngai a; a hnung kan zui chhan pawh hremhmun pumpelh nan a ni. Vanram kalna tura mihring leh Pathian inzawmna chu piantharna tiin kan sawi.  Hmanni a William Ralte post Thutak nge Rinthu tihah pawh khan “Anih, Vanram a kai loh hlauh vangin a ni lom ni Pathianni apianga I inkhawm a, I tawngtai thin?” tiin a sawi a, a comment tute khan helai thu hi kan hnial lem loin a ngaih theih.

Hmana kan lawmna Pialral chan mah ila,

Kalvari-ah khua a var leh ta,

‘Zion ram nuam an hawng leh ta,’ an ti e,

I tho vang kan zalenna kawl a eng e. (KHB 456) titute kan ni miau a.

Tin, ramhuai ngamtu angin sawi tam tawh lo mah ila, Hnehtu a nih thu chu kan la tuipui reng a, Hneha chu Lalpa ta a ni tiin kan au rual thin a nih hi. Kan hlaa a lan dan chuan sual hnathawh te, thihna te leh Setana ngei a hneh niin kan ngai a. Hnehtu Lal lian, Hnehtu Lal ropui ti tein kan sawi thin. (KHB 77, 86, 233 te pawh en la).

Mizote Pathian thu hi a Biblical em?

Mizote Pathian thu hi Bible zirtirna nen a inmil em tih hi a chhanna awlsam tak chu inmil teh reng mai tih a ni. A inmil mai piah lamah a contextual bawk tiin a sawi theih ang. Hei vang hian Mizote tan Pathian thu hi a hlu a, pawm pawh a nuam a ni.

Mahse hmasawn leh thanzel duhna rilru atang chuan Mizote Pathian thu laipui hremhmun leh vanram hi Bible zirtirna laipui a ni lo deuh em aw a tih theih thung. Isua zirtirna laipui nia lang chu Pathian ram/Vanram (Kingdom of God or reign of God) a ni a. Judate beisei thin dan chu Isua hian awmze thar neiin a zirtir a, Mizote pialral ringawt hi chu a kawk lo deuh. Chanchin tha bute ah hian vawi 122 vel kan hmu a,  a awmzia chu keimahnia Pathian lalna hi a ni.

Isua khan Pathian ram pawh lo hnai ta tiin a thuhril a tan a (Mk 1:15), a thawhleh hnu he khawvela hun tlemte chauh a neih pawh khan he thu bawk hi a sawi thin a (Tirh 1:3). Johana chuan hei hi piantharna emaw chatuan nunna angin emaw a sawi a. Pianthar a sawi hi mahni duh dana nung thin, hmuh theih loh Pathian duh dana nung ta a sawina niin a lang; thli angin a tehkhin si a (Joh 3:8). Pentikost ni a mi 3000 laiin Baptisma an channa tura Petera thuhrilah pawh khan tildang vak chhui lovin, Isua kha Lal leh Krista (Messiah) a ni tih uar takin a sawi mai a ni (Tirh 2:36).

Paula chuan Pathian fate nih theih dan sawiin, Pathian Thlarau hruaia awm apiangte chu Pathian fate an ni si a (Rom 8:14) a ti bawk a. He Pathian ram – thleng tawh, thleng mek leh thleng zel tur, keimahnia Pathian lalna zau zel tur hi Isua khan a ngai pawimawh a, I ram lo thleng rawh se tia tawngtai thin turin min zirtir a ni.

Isua tuarna leh thihna in a tum ber pawh Isua Krista Lalna thu bawk hi a ni a (phil 2:5-11). Chu a lalna pawma mahni nuna lal tir tute tan chuan thih hnuah vanram a buatsaih sak nghe nghe a. Chuvangin, kan inkhawm chhan te, thil tha lo laka kan insum chhan te, Bible chhiar kan tawngtai fan fan chhan te hi Vanram kan beisei vang ngawr ngawr ni lovin, keimahni awm, lei leh van Lalber, hming zawng zawnga hming chungnung ber LALPA title neitu Isua duh dan  a nih vang zawk tiin kan Kristianna rilru innghahna her danglam ta ila a that zawk a rinawm.

Hei hi Mizo taka sawifiah dawn chuan Lal sut vuan nun atanga sawifiah chi a ni ang. Mizo pipute hunah miin tual a thah palh chuan Lal hnenah inhumhimna atan a tlan lut a, lal ina sut a vuan thin. Chutianga a tih chuan phuba latu lakah a him a, mahse amah leh a thlahte zawng zawng chu lai bawihah an awm kumkhua thin. Chutiang bawkin sual laka himna atana Krista leh a Kraws vuantute chu kan dam chhungin Krista bawihah kan awm a ngai a; mahni duhdan nung lovin ama duh danin kan nung zawk thin a ni.

Mahse Isu, riangvai ka ni,

Kraun leh ram ka nei lo ve,

Thinlung erawh i tan ka ti,

A chhungah lo lal  ta che.

Similar Posts:

• Chhandamna Thu
• Ka mumang
• PIANGTHAR LEH SUAL HUAT
• Misual te Felna
• Zawhna Pathum (3) han chhang teh le.

Recent Posts:

• Triau Trackx-Lungtat Par (official music video)
• Triau Trackx – LUNGTAT A PAR
• September 2016, Mizo(ram) Diary
• A VA LUNGLEN THLAK EM!!!
• August 2016, Mizo(ram) Diary

This entry was posted on Sunday, November 21st, 2010 at 9:00 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.