‘PATHIAN FATE KAN NI’ kan ti thin. Ka Arpui chuan Note a awp keu tih ka hriat chuan ka hlim hle a. Thlasik khawvawt kara a puiin a hruai tur chu ka khawngaih a. Pahnih chauh an keu bawk si. A pui awplum lai chu ka laksak a, in chhungah, bawm nuam takah, electric power in ka tilum a. Ka hmuh phakah ka vulh ta a. Min tihlim reuh em em a. Ka hunawl leh vawt ka tihzual changin ka pawmlum thin a. An hmelthain an cute ka ti ngawih ngawih a. Tun Sunday khan ka laptop chungah ka dah a. Pawisawilo hmel (Innocent) ngawih ngawih a min en kiau chung hian an unau chuan an chiap leuh leuh a. Ka thinlungah thumak tak mai hi a lo thar/inziak zawt zawt mai a.
Ka Arpui chuan chaw kawpuar pawh ei lovin ni 22 teh meuh Note awp keu tumin, cher-dang lep khawpin a awp ngat ngat a. An lo keu ta cheng a, a ngamlohin kan laksak daih mai a. A fate zawngin a theihna zawng zawng leh aw rawl tawp a au in, zawn hmuh ngei tumin Ar inchhungah chuan a van ruai ruai mai a. A hmangaih, a fate chu a enkawlin, a chawm pha ta hauhlo mai si a. Arnote pahnih lah chuan an anpui ni hauhlo kei chu min bel lo thei ta si lova. Hmangaiha awpkeutu hmel an hmu pha si lo.
Pathian hian anmahni (Trinity) anpui (like his own image) in vaivut atangin mihring ruangam a siam a. “NUNG” kan lo nihve theihnan ama hnar atang ngeiin chu vaivut hnarah chuan ‘Nunna’ thaw a thawlut a. “Minung” kan lo ni ta a. Siamtu (Creator) chuan duh leh hmangaih takin, buh tuhlo, at hek lovin, Edena huan chhakah chuan a dah a. Euvi leh Adama tiin an hming a phuah a. Hlim takin a zu pawl fo thin a. Vohbik chanvo, thilsiam zawng zawng chunga thuneihna a pe a. Chutih lai chuan Setanan a rawn chhuhsak ta daih mai le…Tlai a a hmangaih, a siam, a fate pawl tum a alokal leh chuan, a hnen atanga lakbo, a tan hlim taka pawl chi a ni tawhlo tih hriatna thinlung Na chuan-‘Adam khawnge i awm..?’ ti a auvin a hmangaihte chuan an hransan ta si a.
Keini mihringte lah hian-min siamtuin min enkawl seilianin a duh ang a a hruai theihloh kan ni tih in hre miah lovin chhungkuaah te, Office ah te, Biak In chhung ngeiah te pawh pawisawilo hawiin kan hawi veuh veuh mai si a. Arpuiin a Note te a hnena koh let tuma theih tawp a chhuah ang khan, Pathian chuan a Fapa neihchhun chu khawvel mihring zawng zawng aiawhin taksa in leiah a rawn piantir a. Krista taksa Kraws a khenbeh kha i taksa kha a ni tih hre map lovin, khawvelah hian phakar deuhte, a deuh te, sual leh tha deuh- mize hrang hrang puin kan leng za a ni si a.
Tichuan,Hmangaih taka min enkawl duh ngawih ngawihtu Pathian chuan-Kan tan Eden kawngkhar hawn leh nan Isua kraws a khenbeh a rawn thlang ta a. Chu chu hremna, a thinurna avang a kan tuarah pawmin-a tholeh taksa ang a a hnen kan thlen leh theihnan khawvelah a rawn tir ta a. He kan taksa leh kan rilru,keimahni a awm zawng zawng, sual Setana telna hi a pawl theih tawhloh avanga-pawl tlaka kan awm leh a, a hnena chatuan a kan awmve theihnan-vankhua ah ro an rel ta a ni tih hi ka Arnote te avang hian ka rawn share ve a ni e.
‘Aw, a thukin a va sang em,
Ranthleng leh Thing anchhedawng leh
Vana Lal Lukhum a inzawm,
Lei Eden leh Salem thar nen.’
Isua Krista in Eden kawngkhar min hawnsak leh a lut ngei tur hian, Misualdotcommers zawng zawng thinlung Bawngin a Isua a lo pianthar leh nan, 2010 Krismas lo thleng turah in zavaiin duhsakna ka hlan che u a. Krismas damtaka in hman ka duhsak che u a, in za vaiin Krismas chibai ka buk nghal che u a ni e.
